ເຊລຊີ ຕັ້ງເງື່ອນໄຂ 3 ຂໍ້ນັດອັນຕະລາຍຊີ້ຊະຕາ ຊາຣຣີ
ເດລີ ເມວ ສື່ຂອງອັງກິດ ລາຍງານວ່າ: ເຊລຊີ ຈະປົດ ເມົາຣິຊິໂອ ຊາຣຣີ ພົ້ນຈາກການເປັນຜູ້ຈັດການທີມ ຖ້າພວກເຂົາເສຍ 1 ໃນ 3 ເກມຕໍ່ຈາກນີ້ ໂດຍຖ້າເປັນແນວນັ້ນແທ້ ຈານຟຣັງໂກ້ ໂຊລ່າ ອາດຈະຖືກດັນຂຶ້ນມາຄຸມທີມແທນ.
ເມົາຣິຊິໂອ ຊາຣຣີ ຜູ້ຈັດການທີມ ເຊລຊີ ຍອດສະໂມສອນແຫ່ງ ພຣີເມຍລີກ ອັງກິດ ຈະຖືກປົດອອກຈາກຕຳແໜ່ງທັນທີ ຖ້າພາທີມເສຍພຽງນັດແຕ່ດຽວໃນໄລຍະ 3 ນັດຕໍ່ຈາກນີ້.
ເຊລຊີ ຫາກໍຕົກຮອບ 5 ຂອງການແຂ່ງຂັນ ເອັຟເອ ຄັບ ຈາກການເສຍ ແມນເຊັສເຕີ ຢູໄນເຕັດ 0-2 ຄາບ້ານ ໃນວັນທີ 18 ກຸມພາຜ່ານມາ ເຊິ່ງນັ້ນເຮັດໃຫ້ອະນາຄົດຂອງ ຊາຣຣີ ບໍ່ສົດໃສຄືເກົ່າອີກ ຫລັງຈາກກ່ອນໜ້ານີ້ມີຂ່າວອອກມາເລື້ອຍໆວ່າ ຜູ້ບໍລິຫານບໍ່ພໍໃຈໃນຜົນງານຂອງລາວແລ້ວ.
ທັງນີ້ ເດລີ ເມວ ລະບຸວ່າໃນວັນທີ 19 ກຸມພາຜ່ານມາ ຜູ້ບໍລິຫານຂອງ ເຊລຊີ ໄດ້ມີການສອບຖາມຄວາມເຫັນຂອງນັກເຕະທຸກຄົນ ເຊິ່ງພໍໄດ້ຟັງແລ້ວ ພວກເຂົາກໍຍອມຮັບວ່າ ຊາຣຣີ ອາດຈະຕ້ອງອອກຈາກທີມໃນອະນາຄົດອັນໃກ້ ແລະ ຕັ້ງເງື່ອນໄຂເອົາໄວ້ວ່າ ຖ້າເສຍອີກພຽງແຕ່ນັດດຽວໃນ 3 ເກມຕໍ່ຈາກນີ້ ຜູ້ຈັດການທີມຊາວອີຕາລີຕ້ອງຕົກງານທັນທີ.
ສຳລັບ 3 ນັດຫລັງຈາກນີ້ຂອງ ເຊລຊີ ຕ່າງກໍເປັນເກມສຳຄັນທັງໝົດ ເລີ່ມຈາກເກມ ຢູຟາ ຢູໂຣປາ ລີກ ຮອບ 32 ທີມສຸດທ້າຍ ນັດສອງ ທີ່ຕ້ອງເປີດບ້ານພົບກັບ ມັລໂມ່ ວັນທີ 21 ກຸມພານີ້, ເກມ ຄາຣາບາວ ຄັບ ຮອບຊີງຊະນະເລີດກັບ ແມນເຊັສເຕີ ຊິຕີ້ ວັນທີ 24 ກຸມພານີ້ ແລະ ເກມລີກທີ່ຕ້ອງຮັບການມາຢາມຂອງ ທ໊ອດແນ່ມ ຮ໊ອດສະເປີ ໃນວັນທີ 27 ກຸມພານີ້.
ຖ້າ ຊາຣຣີ ຖືກປົດອອກຈາກຕຳແໜ່ງແທ້ ມີຄວາມເປັນໄປໄດ້ສູງທີ່ ຈານຟຣັງໂກ້ ໂຊລ່າ ໜຶ່ງໃນຜູ້ຊ່ວຍຂອງລາວ ຈະຖືກແຕ່ງຕັ້ງເຂົ້າມາຄຸມທີມແທນໄປກ່ອນ.
