ໂອເປັກຫລຸດການຜະລິດ ໜຸນລາຄານ້ຳມັນດິບປັບເພີ່ມຂຶ້ນ
ລາຄານ້ຳມັນດິບເວສເທັກຊັສ ປິດຕະຫລາດວັນທີ 19 ກຸມພາ ປັບຂຶ້ນຈາກປັດໄຈກຸ່ມປະເທດຜູ້ສົ່ງອອກນ້ຳມັນ (ໂອເປັກ) ຫລຸດການຜະລິດ, ເຖິງວ່ານັກລົງທຶນໃນຕະຫລາດຈະກັງວົນເລື່ອງເສດຖະກິດໂລກຂະຫຍາຍຕົວຊ້າ ເຊິ່ງຈະກະທົບຕໍ່ຄວາມຕ້ອງການໃຊ້ນ້ຳມັນ. ນອກຈາກນີ້ ການທີ່ອາເມລິກາຂວ້ຳບາດເວເນຊູເອລາ ແລະ ອີຣານ ເຮັດໃຫ້ປະລິມານນ້ຳມັນຫລຸດລົງໃນຕະຫລາດ.
ສັນຍານ້ຳມັນດິບເວສເທັກຊັສ ສົ່ງມອບເດືອນມີນາ ເຊິ່ງມີການຊື້-ຂາຍໃນຕະຫລາດໄນເມັກ ເພີ່ມຂຶ້ນ 50 ເຊັນ ປິດຕະຫລາດຢູ່ 56,09 ໂດລາ/ບາເຣລ, ສ່ວນສັນຍານ້ຳມັນດິບເບຣນ ຫລຸດລົງ 14 ເຊັນ ປິດຢູ່ 66,36 ໂດລາ/ບາເຣລ.
ທັງນີ້ ການປັບຫລຸດກຳລັງການຜະລິດນ້ຳມັນຂອງໂອເປັກຊ່ວຍໃຫ້ລາຄານ້ຳມັນເພີ່ມຂຶ້ນຫລາຍກວ່າ 20% ໃນປີນີ້ ໂດຍການຜະລິດນ້ຳມັນຂອງໂອເປັກຫລຸດລົງ 797.000 ບາເຣລ/ວັນ ສູ່ລະດັບ 30.806 ລ້ານບາເຣລ/ວັນ ໃນເດືອນມັງກອນ ເຊິ່ງທຽບເທົ່າກັບການປະຕິບັດຕາມຂໍ້ຕົກລົງປັບຫລຸດກຳລັງການຜະລິດປະມານ 86%.
ສ່ວນ ອາຣັບບີ ຊາອຸດິດ ເຊິ່ງເປັນຜູ້ນຳໃນການປັບຫລຸດການຜະລິດຂອງໂອເປັກ ປະກາດວ່າຈະຫລຸດການຜະລິດສູ່ລະດັບ 9,8 ລ້ານບາເຣລ/ວັນ ໃນເດືອນໜ້າ ໂດຍຫລຸດລົງຫລາຍກວ່າ 500.000 ບາເຣລ/ວັນ ຈາກທີ່ມີການສັນຍາໄວ້ໃນໄລຍະທຳອິດ.
ໃນເດືອນທັນວາປີຜ່ານມາ ໂອເປັກ ແລະ ກຸ່ມປະເທດນອກໂອເປັກ ນຳໂດຍຣັດເຊຍ ເຫັນພ້ອມກັນຈະຫລຸດກຳລັງການຜະລິດນ້ຳມັນ 1,2 ລ້ານບາເຣລ/ວັນ ໃນປີນີ້ ເພື່ອປ້ອງກັນການຫລຸດລົງຂອງລາຄານ້ຳມັນ.
