UN ຂໍອິນເດຍ ແລະ ປາກິດສະຖານ ແກ້ໄຂເຫດຂັດແຍ່ງໂດຍໄວ
ທ່ານ ອັນໂຕນິໂອ ກູເຕີເຣັສ ເລຂາທິການສະຫະປະຊາຊາດ ຮຽກຮ້ອງໃຫ້ອິນເດຍ ແລະ ປາກິດສະຖານ ມີມາດຕະການຫລຸດຜ່ອນຄວາມເຄັ່ງຕຶງໂດຍໄວ ແລະ ສະເໜີຊ່ວຍເປັນຜູ້ເຈລະຈາໄກ່ເກ່ຍ ຖ້າທັງສອງຝ່າຍເຫັນພ້ອມ.
ອິນເດຍ ແລະ ປາກິດສະຖານ ມີເຫດປະທະກັນທາງການທູດຫລ້າສຸດ ພາຍຫລັງເຫດລະເບີດຂ້າຕົວຕາຍໂຈມຕີແຄວ້ນກາສເມຍ ສ່ວນທີ່ຢູ່ໃນການປົກຄອງຂອງອິນເດຍ ເຮັດໃຫ້ເຈົ້າໜ້າທີ່ກອງກຳລັງຮັກສາຄວາມໝັ້ນຄົງເສຍຊີວິດ 40 ຄົນ ແລະ ອິນເດຍໃຊ້ປະຕິບັດການຕອບໂຕ້ໃນພື້ນທີ່ດັ່ງກ່າວ. ໂຄສົກ UN ຖະແຫລງວ່າ: UN ກັງວົນຕໍ່ຄວາມເຄັ່ງຕຶງລະຫວ່າງ ອິນເດຍ ກັບ ປາກິດສະຖານ ທີ່ເພີ່ມຂຶ້ນ. ທ່ານ ກູເຕີເຣັສ ເນັ້ນເຖິງຄວາມຈຳເປັນທີ່ອິນເດຍ ແລະ ປາກິດສະຖານຈະຕ້ອງອົດກັ້ນໃຫ້ຫລາຍທີ່ສຸດ ແລະ ຫລຸດຜ່ອນບັນຫາກັນໂດຍໄວ ໂດຍ UN ຍິນດີເປັນຄົນກາງເຈລະຈາໄກ່ເກ່ຍຖ້າໄດ້ຮັບການຮ້ອງຂໍ. ສື່ລາຍງານວ່າ: ທ່ານ ຊາ ມາມູດ ກູເຣຊີ ລັດຖະມົນຕີຕ່າງປະເທດປາກິດສະຖານ ຮຽກຮ້ອງໃຫ້ເລຂາ UN ເຂົ້າມາຊ່ວຍແກ້ໄຂເຫດຄວາມຂັດແຍ່ງ ແລະ ຂໍຢ່າກ່າວຫາປາກິດສະຖານກ່ອນດຳເນີນການສອບສວນໃຫ້ຈະແຈ້ງ.
