“ໜຶ່ງແລວທາງ ໜຶ່ງເສັ້ນທາງ” ຄືຄວາມຫວັງແຫ່ງອະນາຄົດ
ໂດຍ: ທິດກໍ່າ
ກອງປະຊຸມເວທີປຶກສາຫາລືຂັ້ນສູງວ່າດ້ວຍການຮ່ວມມືສາກົນ “ໜຶ່ງແລວທາງ ໜຶ່ງເສັ້ນທາງ” (BELT AND ROAD FORUM FOR INTERNATIONAL COOPERATION) ໃນວັນທີ 14-15 ພຶດສະພານີ້ ທີ່ ສປ ຈີນ ເປັນເຈົ້າພາບຈັດ ແລະ ທັງເປັນຜູ້ລິເລີ່ມຄົ້ນຄິດໄດ້ສໍາເລັດລົງດ້ວຍຄວາມຈົບງາມ ແລະ ມີຄວາມໝາຍໃນດ້ານປະຫວັດສາດ. ກອງປະຊຸມຄັ້ງນີ້ມີຜູ້ແທນທີ່ເປັນປະມຸກລັດ ແລະ ຫົວໜ້າລັດຖະບານຫລາຍກວ່າ 20 ປະເທດຈາກອາຊີຕາເວັນອອກສຽງໃຕ້, ອາຊີໃຕ້, ອາຊີກາງ, ເອີຣົບ ແລະ ອາຟຣິກາ ພ້ອມດ້ວຍສາມອົງການຈັດຕັ້ງສາກົນເຂົ້າຮ່ວມ ຄືອົງການສະຫະປະຊາຊາດ, ອົງການກອງທຶນການເງິນສາກົນ ແລະ ທະນະຄານໂລກ. ໃນເວທີປຶກສາຫາລືຂັ້ນສູງຄັ້ງນີ້ໄດ້ມີ 3 ຫົວຂໍ້ໃຫຍ່ຄື: ອັນທີໜຶ່ງແມ່ນການປະສານສົມທົບດ້ານນະໂຍບາຍເພື່ອການເປັນຄູ່ຮ່ວມມືທີ່ໃກ້ຊິດກັນຂຶ້ນກວ່າເກົ່າ. ອັນທີສອງແມ່ນເວົ້າເຖິງສາຍພົວພັນລະຫວ່າງປະຊາຊົນກັບປະຊາຊົນຢ່າງໃກ້ຊິດສະໜິດແໜ້ນ ແລະ ອັນທີສາມແມ່ນເວົ້າເຖິງການຮ່ວມມືໃນດ້ານການເຊື່ອມຈອດເພື່ອການພັດທະນາເຊິ່ງກັນ ແລະ ກັນ. ເປົ້າໝາຍແມ່ນເພື່ອພ້ອມກັນຊອກຊ່ອງທາງແກ້ໄຂສະພາບເສດຖະກິດຂອງໂລກໃນປັດຈຸບັນ ແລະ ກໍານົດແນວທາງເສດຖະກິດໃນອະນາຄົດ ເປັນຕົ້ນການຮ່ວມມືດ້ານເສດຖະກິດ, ນະໂຍບາຍການເງິນ ແລະ ການພັດທະນາເສດຖະກິດຂອງພາກພື້ນ ແລະ ສາກົນ, ສົ່ງເສີມການເປັນຄູ່ຮ່ວມເພື່ອພັດທະນາ, ສ້າງຂະບວນໂລກາພິວັດໃຫ້ເປີດກວ້າງ ແລະ ກວມລວມ, ແລກປ່ຽນບັນດາຂະບວນການວິວັດທີ່ເປັນປະໂຫຍດແກ່ທຸກຝ່າຍ. ພ້ອມດຽວກັນນີ້ ກອງປະຊຸມຍັງໄດ້ຮັບຮອງເອົາຖະແຫລງການຮ່ວມກອງປະຊຸມໂຕະມົນຂອງບັນດາຜູ້ນໍາເວທີປຶກສາຫາລືຂັ້ນສູງວ່າດ້ວຍການຮ່ວມສາກົນ “ໜຶ່ງແລວທາງ ໜຶ່ງເສັ້ນທາງ”.
ສ່ວນວ່າ ສປປ ລາວ ພວກເຮົານັ້ນແມ່ນທ່ານ ບຸນຍັງ ວໍລະຈິດ ປະທານປະເທດ ພ້ອມດ້ວຍຄະນະຜູ້ແທນຂັ້ນສູງ ໄດ້ເຂົ້າຮ່ວມໃນເວທີຂັ້ນສູງໃນຄັ້ງນີ້, ພ້ອມນີ້ທ່ານປະທານປະເທດ ບຸນຍັງ ວໍລະຈິດ ກໍໄດ້ປະກອບຄໍາເຫັນວ່າ: ຂໍ້ລິເລີ່ມ “ໜຶ່ງແລວທາງ ໜຶ່ງເສັ້ນທາງ” ທີ່ປະກາດໂດຍທ່ານປະເທດປະເທດແຫ່ງ ສປ ຈີນ ສີຈິ້ນຜິງ ໃນປີ 2013 ນັ້ນແມ່ນຖືກຕ້ອງກັບການເວລາ ແລະ ກາລະໂອກາດແຫ່ງການສົ່ງເສີມການຮ່ວມມືຜ່ານການເຊື່ອມຈອດດ້ານພື້ນຖານໂຄງລ່າງ, ເສດຖະກິດ, ການຄ້າ, ການລົງທຶນ ແລະ ການເຊື່ອມຈອດລະຫວ່າງປະຊາຊົນກັບປະຊາຊົນ ແລະ ໄດ້ຕີລາຄາສູງຕໍ່ຜົນສໍາເລັດໃນເບື້ອງຕົ້ນຂອງຂໍ້ລິເລີ່ມດັ່ງກ່າວ.
ຕາມທິດກໍ່າຄິດ, ນີ້ແມ່ນການຢັ້ງຢືນເຖິງຜົນສໍາເລັດໃນນະໂຍບາຍ “ໜຶ່ງແລວທາງ ໜຶ່ງເສັ້ນທາງ” ຂອງ ສປ ຈີນ ວາງອອກ ເຊິ່ງນະໂຍບາຍດັ່ງກ່າວກາຍເປັນປັດຊະຍາທີ່ຈະໃຫ້ໂລກນີ້ມີສັນຕິພາບ, ເຮັດໃຫ້ຄົນໃນພາກພື້ນ ແລະ ໂລກມີການພົວພັນໄປມາຫາສູ່ແລກປ່ຽນແນວຄິດ, ອຸດົມການໃນດ້ານຕ່າງໆ ນັບທັງຮ່ວມມືທາງດ້ານເສດຖະກິດ, ການຄ້າ, ການລົງທຶນ, ແລກປ່ຽນໃນດ້ານສີສັນວັດທະນະທໍາອັນຍອດຍິ່ງເຊິ່ງກັນ ແລະ ກັນແລ້ວ, ຄົນເຮົາທີ່ຢູ່ໃນພາກພຶ້ນ ແລະ ໃນໂລກໃບນີ້ກໍຈະຮັກແພງສາມັກຄີກັນ. ໃນເມື່ອຄົນເຮົາມີການພົວພັນສາມັກຄີຮັກແພງກັນດ້ວຍຫລາຍຮູບການ, ຫລາຍສີສັນຍິ່ງຂຶ້ນກໍຈະເຮັດໃຫ້ໂລກມີຄວາມສົດໃສ ສົງຄາມກໍບໍ່ເກີດ, ຂໍ້ຂັດແຍ່ງດ້ວຍກັນກໍຈະເຫືອດຫາຍໄປທີລະໜ້ອຍ.
ຂໍຊົມເຊີຍນະໂຍບາຍອັນສັດຈະທໍາທີ່ຍອດຍິ່ງຂອງສະຫາຍ ສປ ຈີນ ໂດຍສະເພາະແມ່ນແນວຄິດ ແລະ ອຸດົມການຂອງປະທານປະເທດຈີນ ທ່ານ ສີຈິ້ນຜິງ ຜູ້ນໍາທີ່ແສນເຄົາລົບຮັກຂອງປະຊາຊົນຈີນ ແລະ ປະຊາຊົນລາວ. ຍັງອີກບໍ່ນານເກີນລໍໂຄງການສ້າງທາງລົດໄຟຄວາມໄວສູງກໍຈະສໍາເລັດ, ປະຊາຊົນສອງປະເທດກໍຈະໄປມາຫາສູ່ກັນ, ສາຍສໍາພັນເພື່ອນຮ່ວມມືຍຸດທະສາດຮອບດ້ານກໍຈະປາກົດເປັນຈິງໃນອະນາຄົດຢ່າງແນ່ນອນ.
