ປະດັບຫລຽນໄຊແຮງງານ ໃຫ້ຄະນະຮຽບຮຽງປຶ້ມປະຫວັດ ທ່ານ ໜູຮັກ ພູມສະຫວັນ

ໃນວັນທີ 13 ກຸມພານີ້ ທີ່ຫ້ອງປະຊຸມ ຂອງຄະນະໂຄສະນາອົບຮົມສູນກາງພັກ ໄດ້ຈັດພິທີປະດັບຫລຽນໄຊແຮງງານ ຊັ້ນ I, II ແລະ III ໃຫ້ຄະນະຄົ້ນຄວ້າ, ເກັບກໍາ ແລະ ຮຽບຮຽງປຶ້ມປະຫວັດຂອງທ່ານ ໜູຮັກ ພູມສະຫວັນ. ທ່ານ ກິແກ້ວ ໄຂຄໍາພິທູນ ຄະນະເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ ໄດ້ໃຫ້ກຽດປະດັບຫລຽນໄຊດັ່ງກ່າວ.

ການຍ້ອງຍໍຄັ້ງນີ້, ແມ່ນຜູ້ທີ່ມີຜົນງານ, ຄຸນງາມຄວາມດີ ທີ່ໄດ້ອຸທິດເຫື່ອແຮງ ແລະ ສະຕິປັນຍາ ປະກອບສ່ວນເຂົ້າໃນການຄົ້ນຄວ້າ, ເກັບກໍາ ແລະ ຮຽບຮຽງ ຂຽນປື້ມພາລະກໍາປະຫວັດສາດ, ຊີວິດເຮັດການປະຕິວັດຂອງ ທ່ານ ໜູຮັກ ພູມສະຫວັນ ອະດີດປະທານປະເທດ. ຜົນງານດັ່ງກ່າວ, ເປັນການປະ ກອບສ່ວນອັນສໍາຄັນ ໃນການປົກປັກຮັກສາມູນເຊື້ອປະຫວັດສາດ ເພື່ອໃຫ້ຄົນຮຸ່ນຫລັງ ໄດ້ສຶກສາຮໍ່າຮຽນເອົາຄຸນສົມບັດ ສິນທຳປະຕິວັດຂອງທ່ານ ໃນການເຮັດວຽກ ແລະ ດຳລົງຊີວິດປະຈຳວັນ.

ຜູ້ທີ່ໄດ້ຮັບກຽດຍ້ອງຍໍໃນຄັ້ງນີ້, ປະກອບມີ 6 ທ່ານຄື:ທ່ານ ດວງໄຊ ຫລວງພະສີ ນັກປະພັນແຫ່ງຊາດ ໄດ້ຮັບ ຫລຽນໄຊແຮງງານຊັ້ນ I, ທ່ານ ນາງ ພູທອນ ພູມສະຫວັນ ແລະ ທ່ານ ຍອດອໍານາດ ຫລວງພະສີ ໄດ້ຮັບຫລຽນໄຊແຮງງານຊັ້ນ II, ທ່ານ ເອກອົງອາດ ຫລວງພະສີ, ທ່ານ ນາງ ແກ້ວມະນີວັນ ແລະ ຮ້ອຍໂທ ນາງ ຄໍາພວງ ພູມສະຫວັນ ໄດ້ຮັບຫລຽນໄຊແຮງງານຊັ້ນ III .