ປະທານ ໂຮ່ຈີມິງ ກັບວຽກງານສື່ມວນຊົນ III ( ຕໍ່ຈາກຄັ້ງທີ່ແລ້ວ )
+ ປະຕິບັດຕາມຄຳສັ່ງສອນຂອງ ປະທານ ໂຮ່ຈີມິງ:
ກໍດັ່ງພວກເຮົາຮັບຮູ້ນຳກັນແລ້ວວ່າ: ໃນຫລາຍປີຜ່ານມານີ້, ສື່ມວນຊົນເຮົາສາມາດຕອບສະໜອງຄວາມຮຽກຮ້ອງຕ້ອງການຂອງໜ້າທີ່ການປະຕິວັດຂອງຕົນ ແລະ ຮັບໃຊ້ປະເທດຊາດ, ປະຊາຊົນດ້ວຍການເຕີບໃຫຍ່ຂະຫຍາຍຕົວຢ່າງແຂງແຮງຂອງຖັນແຖວນັກຮົບສື່ມວນຊົນ ແລະ ນັບຫລາຍຮ້ອຍຫລາຍພັນຂອງສຳນັກງານອົງການຈັດຕັ້ງສື່ມວນຊົນໃນລະດັບຕ່າງໆ ແລະ ມີຫລາກຫລາຍຜະລິດຕະພັນທີ່ອຸດົມສົມບູນໄປດ້ວຍເນື້ອໃນ ແລະ ຮູບແບບການນຳສະເໜີຢ່າງຈັບອົກຈັບໃຈ ສາມາດສ່ອງແສງບັນຫາຕ່າງໆໄດ້ຢ່າງວ່ອງໄວທັນການ ແລະ ຮອບດ້ານ ນັບແຕ່ບັນຫາຢູ່ພາຍໃນ ແລະ ຕ່າງປະເທດ. ຜະລິດຕະພັນສື່ມວນຊົນໃນປັດຈຸບັນບໍ່ພຽງແຕ່ຕອບສະໜອງຄວາມຕ້ອງການຂອງຊຸມຊົນແບບກວມລວມເທົ່ານັ້ນ ເຊິ່ງມັນຍັງສ່ອງແສງ ແລະ ລົງເລິກເຖິງແຕ່ລະກຸ່ມຄົນຜູ້ອ່ານອີກດ້ວຍ ຄືຜູ້ອາຍຸສູງ, ຊາວໜຸ່ມໄວໜຸ່ມ, ເຍົາວະຊົນ ແລະ ປັນຍາຊົນອື່ນໆອີກ ແລະ ບໍ່ພຽງແຕ່ຈະລົງເລິກເຖິງປະຊາຊົນໃນປະເທດເທົ່ານັ້ນ ເຊິ່ງຍັງນັບທັງຜູ້ຢູ່ຕ່າງປະເທດອີກດ້ວຍ.
+ ປະທານ ໂຮ່ຈີມິງ ກັບວຽກງານສື່ມວນຊົນ II ( ຕໍ່ຈາກຄັ້ງທີ່ແລ້ວ )
+ ປະທານ ໂຮ່ຈີມິງ ກັບວຽກງານສື່ມວນຊົນ I
ສື່ມວນຊົນປະຕິວັດແມ່ນຄັນທຸງນຳໜ້າໂຄສະນາສົ່ງເສີມອັນໃໝ່, ອັນດີ ແລະ ບັນດາຕົວແບບທີ່ຕັ້ງໜ້າ ແລະ ມີຄວາມຕັດສິນໃຈຕຳນິວິຈານຢ່າງແຂງແຮງຕໍ່ອັນບໍ່ດີ, ອັນເກົ່າ ແລະ ຄວາມຜິດພາດຕ່າງໆທີ່ຂາດປັດໄຈຕັ້ງໜ້າ ແລະ ບໍ່ພຽງແຕ່ເທົ່ານັ້ນ ສື່ມວນຊົນເຮົາຍັງລົງເລິກເຂົ້າໃນຕົວຈິງ, ສອງແສງຄວາມຂັດຂ້ອງໝອງໃຈຂອງປະຊາຊົນໄດ້ຢ່າງທັນການ, ສາມາດສ່ອງແສງເຫັນຕົວແບບທີ່ຕັ້ງໜ້າໃນດ້ານຕ່າງໆ, ການສ່ອງແສງວຽກດີ, ຄົນດີ ແລະ ເອົາໃຈໃສ່ຢ່າງຕັ້ງໜ້າ ເພື່ອຕໍ່ສູ້ຕໍ່ບຸກຄົນ ຫລື ລວມໝູ່ໃດທີ່ເຮັດເສຍຊື່ສຽງ ແລະ ຜົນປະໂຫຍດຂອງຊາດ ແລະ ປະຊາຊົນ, ຕ້ານການສໍ້ລາດບັງຫລວງ, ປາກົດການອາຍາສິດເຫັນແກ່ຕົວ ແລະ ອື່ນໆ. ພ້ອມນັ້ນກໍໄດ້ປະກອບສ່ວນບໍ່ໜ້ອຍເຂົ້າໃນການສ່ອງແສງສະພາບຊີວິດປະຈຳວັນ ແລະ ແນວຄວາມຄິດຕ່າງໆຂອງມວນຊົນ ແລະ ຊັ້ນຄົນຕ່າງໆໄດ້ຢ່າງອຸດົມສົມບູນ, ຊ່ວຍໃຫ້ພັກ-ລັດຖະບານສາມາດຊີ້ນຳ-ນຳພາໄດ້ຖືກທິດ ແລະ ທັນການ ຮັບປະກັນໃຫ້ການພັດທະນາປະເທດຊາດໄດ້ຢ່າງໝັ້ນຄົງ. ດ້ວຍຈິດໃຈດັ່ງກ່າວ ບໍ່ພຽງແຕ່ຊ່ວຍໃຫ້ອົງການສື່ມວນຊົນເຮົາເຕີບໃຫຍ່ຂະຫຍາຍຕົວເທົ່ານັ້ນ ຍັງຊ່ວຍໃຫ້ບັນດາຖັນແຖວນັກຮົບສື່ມວນຊົນບໍ່ໄຫວຫວັ່ນ ແລະ ຢ້ານກົວຕໍ່ອຸປະສັກ ແລະ ສິ່ງທ້າທາຍໃດໆ, ເວລາໃດເຂົາເຈົ້າກໍກຽມພ້ອມຕະລຸມບອນເຂົ້າສະໜາມຮົບສື່ມວນຊົນ, ຊອກຄົ້ນ ແລະ ນຳເອົາຂໍ້ມູນຂ່າວສານ ແລະ ສາລະຕ່າງໆທີ່ເປັນປະໂຫຍດ ແລະ ນັບທັງສິ່ງທີ່ບໍ່ທັນໂລ່ງລ່ຽນໃນຊີວິດ-ການເມືອງ, ວັດທະນະທຳ-ສັງຄົມ ແລະ ເສດຖະກິດ-ການເງິນຂອງປະເທດ ເພື່ອໃຫ້ສັງຄົມມີຄວາມເຂົ້າໃຈ ແລະ ປະຕິບັດຕາມ.
https://www.youtube.com/watch?v=mYWmicyKUcw
ໃນສະພາບທີ່ປະເທດຊາດ ແລະ ໂລກມີການປ່ຽນແປງ ແລະ ຜັນແປໄປນັ້ນ, ເມື່ອລະບົບອິນເຕີເນັດໄດ້ມີການຂະຫຍາຍຕົວກວມໄປທົ່ວໂລກ, ການຄົມມະນາຄົມ ແລະ ການສື່ສານເພື່ອຕິດຕໍ່ຫາກັນລະຫວ່າງປະເທດນັບມື້ມີຄວາມສະດວກ, ການກະຈາຍຂໍ້ມູນຂ່າວສານລະຫວ່າງປະເທດບໍ່ມີຜ່ານແດນ, ແຕ່ສິ່ງນັ້ນກໍບໍ່ໄດ້ສົ່ງຜົນກະທົບຮ້າຍແຮງໃດໆຕໍ່ອົງການສື່ມວນຊົນເຮົາ. ພ້ອມນັ້ນ ເຂົາເຈົ້າຍັງສາມາດນຳໃຊ້ທ່າແຮງດັ່ງກ່າວຢ່າງມີປະສິດທິຜົນ ດ້ວຍການຮູ້ເລືອກເຟັ້ນເຫດການ, ມຸມມອງ ແລະ ລັກສະນະຂອງຂ່າວນຳມາອະທິບາຍ ແລະ ວິເຄາະບັນຫາຂອງເຫດການຕ່າງໆດັ່ງກ່າວໃຫ້ປະຊາຊົນເຂົ້າໃຈໃນທາງທີ່ຖືກຕ້ອງ ປະກອບສ່ວນເຮັດໃຫ້ສັງຄົມມີສະຖຽນລະພາບ ແລະ ປະເທດຊາດໄດ້ຮັບການພັດທະນາຢ່າງໝັ້ນຄົງ ແລະ ພິເສດແມ່ນກຳລັງສື່ມວນຊົນພວກເຮົາສາມາດສະກັດກັ້ນເຫດການລົບກວນແຫລ່ງຂໍ້ມູນຂ່າວສານ ແລະ ບິດເບືອນຄວາມເປັນຈິງ, ພ້ອມປະຕິເສດຫລາຍບັນຫາທີ່ອາດຈະສ້າງຄວາມເສຍຫາຍອັນໃຫຍ່ໂຕໃຫ້ແກ່ຄວາມໝັ້ນຄົງ, ລະບອບການເມືອງ ແລະ ຊາຕາກຳຂອງຊາດອີກດ້ວຍ. ແຕ່ຄຽງຄູ່ກັນນັ້ນ, ໃນຍຸກສະໄໝການຕະຫລາດດັ່ງປັດຈຸບັນ ເນື່ອງຈາກຄວາມກົດດັນຕ່າງໆຕໍ່ການແກ່ງແຍ້ງແຂ່ງຂັນ, ຍາດເອົາແຫລ່ງຂ່າວ ກໍຄືຜູ້ອ່ານ. ດັ່ງນັ້ນ ຈຶ່ງເຮັດໃຫ້ການເຄື່ອນໄຫວຂອງສື່ມວນຊົນເຮົາມີຫລາຍອັນອ່ອນ ເຊິ່ງສະແດງອອກໃຫ້ເຫັນໃນການນຳສະເໜີຂ່າວຫລາຍອັນຄືກັນ, ຮູບພາບອັນດຽວກັນ ແລະ ຮ້າຍແຮງໄປກວ່ານັ້ນ ມີບາງແຫລ່ງຂ່າວນຳສະເໜີຍັງຂາດລັກສະນະຕົວຈິງ, ເວົ້າໂຍກເວົ້າຫລາຍ ແລະ ເວົ້າເພື່ອຜົນປະໂຫຍດໃດໜຶ່ງເກີດມີຂຶ້ນ.
