ຢູເວນຕຸສ ເລັ່ງຍື່ນເງິນແຖມນັກເຕະດັງ ໃຫ້ ລິເວີພູລ ປ່ອຍ ຊາລາ
ຕຸດໂຕ້ສະປອດ ສື່ກິລາຂອງອີຕາລີ ລາຍງານວ່າ: ຢູເວນຕຸສ ຄິດຈະໃຫ້ເງິນ 50 ລ້ານເອີໂຣ ແລະ ແຖມ ເປົາໂລ ດີບາລ່າ ໃຫ້ ລິເວີພູລ ເພື່ອແລກກັບການຂໍເອົາ ໂມຮາເໝັດ ຊາລາ ໄປຮ່ວມທີມ ໂດຍພວກເຂົາເບິ່ງວ່າ: ດີບາລ່າ ອາດຈະຊ່ວຍຫລຸດຄ່າຕົວທີ່ຕ້ອງຈ່າຍໄດ້ ຫລັງຈາກ ລິເວີພູລ ຕັ້ງຄ່າຕົວຂອງ ຊາລາ ສູງເຖິງ 200 ລ້ານເອີໂຣ.
ຢູເວນຕຸສ ສະໂມສອນຍັກໃຫຍ່ແຫ່ງ ກັລໂຊ ເຊເຣຍ ອາ ອີຕາລີ ວາງແຜນຈະຍື່ນຂໍ້ສະເໜີຊື້ ໂມຮາເໝັດ ຊາລາ ປີກຄົນເກັ່ງຂອງ ລິເວີພູລ ດ້ວຍເງິນຄ່າຕົວຈຳນວນ 50 ລ້ານເອີໂຣ ແລະ ແຖມ ເປົາໂລ ດີບາລ່າ ກອງໜ້າຊາວອາເຈນຕິນາ ໃຫ້ນຳ.
ເຖິງວ່າຈະໄດ້ ຄຣິສເຕຍໂນ ໂຣນັລໂດ້ ດາວຍິງຊື່ດັງມາຈາກ ຣີລ ມາດຣິດ ໃນຊຳເມີ້ຜ່ານມາ, ແຕ່ ຢູເວນຕຸສ ຍັງຕ້ອງການເພີ່ມຊື່ສຽງຂອງພວກເຂົາໃຫ້ຫລາຍຂຶ້ນໄປອີກ ແລະ ເບິ່ງວ່າ ຊາລາ ຄືຄົນທີ່ເໝາະສົມສຳລັບເລື່ອງນັ້ນ ຫລັງຈາກດາວເຕະຊາວເອຢິບກຳລັງໂດ່ງດັງຈາກການໂຊຟອມໄດ້ໂດດເດັ່ນກັບ ລິເວີພູລ.
ຕຸດໂຕ້ສະປອດ ລະບຸວ່າ: ຄວາມຈິງແລ້ວ ລິເວີພູລ ຕັ້ງຄ່າຫົວຂອງ ຊາລາ ເອົາໄວ້ 200 ລ້ານເອີໂຣ, ແຕ່ ຢູເວນຕຸສ ເລືອກຈະແຖມ ດີບາລ່າ ໄປໃຫ້ ເພື່ອຫວັງຈະໃຫ້ອີກຝ່າຍຫລຸດຄ່າຕົວ ໂດຍນັບແຕ່ ໂຣນັລໂດ້ ຍ້າຍເຂົ້າມາຢູ່ກັບທີມນັ້ນ ດາວເຕະຊາວອາເຈນຕິນາ ຕ້ອງມອບຕຳແໜ່ງດາວຍິງຕົວເປົ້າໃຫ້ລາວ ແລະ ຖືກຍ້າຍໄປຫລິ້ນດ້ານຂ້າງຢູ່ເລື້ອຍໆ ຈົນເຮັດໃຫ້ຜົນງານບໍ່ໂດດເດັ່ນເທົ່າລະດູການກ່ອນ.
