ກອງປະຊຸມວຽກງານ ຖວທ ທົ່ວປະເທດ ທົບທວນຄືນຫຼາຍບັນຫາສໍາຄັນ

ກອງປະຊຸມວຽກງານ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ), ໄດ້ຈັດຂຶ້ນໃນວັນທີ 12 ກຸມພານີ້, ທີ່ຫໍວັດທະນະທໍາແຫ່ງຊາດ ນະຄອນຫຼວງວຽງຈັນ, ໂດຍການເປັນປະທານຂອງທ່ານ ບໍ່ແສງຄໍາ ວົງດາລາ ລັດຖະມົນຕີກະຊວງ ຖວທ ແລະ ໃຫ້ກຽດເຂົ້າຮ່ວມຂອງຮອງນາຍົກລັດຖະມົນຕີ ສອນໄຊ ສີພັນດອນ, ຊຶ່ງມີບັນດາຮອງລັດຖະມົນຕີ, ຮອງເຈົ້າແຂວງ, ຫົວໜ້າກົມ ແລະ ຫົວໜ້າພະແນກ ຖວທ ແຂວງ ແລະ ນະຄອນຫຼວງວຽງຈັນເຂົ້າຮ່ວມ. ເພື່ອສະຫຼຸບຕີລາຄາຜົນສໍາເລັດຂອງວຽກງານ ຖວທ ໃນປີ 2018 ຜ່ານມາ ແລະ ກໍານົດທິດທາງແຜນການ ປີ 2019.

    ໃນກອງປະຊຸມ, ທ່ານ ບົວເງິນ ຊາພູວົງ ຮອງລັດຖະມົນຕີ ຖວທ ໃຫ້ຮູ້ວ່າ: ຕະຫຼອດໄລຍະໜຶ່ງປີຜ່ານມາວຽກງານຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ໄດ້ຮັບການພັດທະນາຢ່າງຕັ້ງໜ້າ ແລະ ມີຜົນສໍາເລັດໃນຫຼາຍດ້ານ ທີ່ສາມາດປະກອບສ່ວນສໍາຄັນເຂົ້າໃນການພັດທະນາເສດຖະກິດ-ສັງຄົມຂອງຊາດໄດ້ເຕີບໃຫຍ່ເຂັ້ມແຂງ. ແຕ່ຄຽງຄູ່ກັນນັ້ນ, ກໍຍັງມີຂໍ້ຄົງຄ້າງຫຼາຍຢ່າງທີ່ຈະຕ້ອງໄດ້ປັບປຸງແກ້ໄຂ ເປັນຕົ້ນແມ່ນ ຈະຕ້ອງໄດ້ເອົາໃຈໃສ່ພັດທະນາພື້ນຖານໂຄງລ່າງ, ວັດຖຸ-ເຕັກນິກ, ບຸກຄະລາກອນ ໃຫ້ພຽງພໍ ແລະ ມີຄຸນນະພາບ ສາມາດຕອບສະໜອງໄດ້ກັບຄວາມຕ້ອງການຂອງວຽກງານໃນໄລຍະໃໝ່ ແລະ ຈະຕ້ອງໄດ້ເພີ່ມທະວີການລົງທຶນຂອງລັດເຂົ້າໃນວຽກງານ ຖວທ ໃຫ້ມີປະສິດທິຜົນສູງຂຶ້ນ, ໂດຍສະເພາະວຽກງານຖະແຫຼງຂ່າວ-ສື່ມວນຊົນ ແລະ ພັດທະນາການທ່ອງທ່ຽວ ໃຫ້ມີຄຸນນະພາບສູງຂຶ້ນ, ສ້າງນະໂຍບາຍຊຸກຍູ້ສົ່ງເສີມສ້າງມູນຄ່າເພີ່ມຜະລິດຕະພັນການທ່ອງທ່ຽວໃຫ້ຂະຫຍາຍກວ້າງຂວາງ ສາມາດແຂ່ງຂັນກັບຕະຫຼາດການທ່ອງທ່ຽວຂອງພາກພື້ນ ແລະ ສາກົນໄດ້.

    ໃນໂອກາດອັນສະຫງ່າລາສີນີ້, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ໄດ້ໃຫ້ກຽດໂອ້ລົມສະແດງຄວາມຍ້ອງຍໍຊົມເຊີຍບັນດາຜົນສໍາເລັດຂອງຂະແໜງການ ຖວທ ຍາດມາໄດ້ໃນປີຜ່ານມາ ແລະ ພ້ອມນັ້ນ, ກໍໄດ້ຮຽກຮ້ອງໃຫ້ກະຊວງ ຖວທ ພ້ອມກັນເອົາໃຈໃສ່ຫາວິທີການ, ມາດຕະການໃນການແກ້ໄຂບັນດາຈຸດອ່ອນ ແລະ ຂໍ້ຄົງຄ້າງ ໃນປີຜ່ານມາໃຫ້ດີຂຶ້ນ ເປັນຕົ້ນແມ່ນ ຮຽກຮ້ອງໃຫ້ຄະນະນໍາທຸກຂັ້ນ ຕ້ອງມີແນວຄິດເປັນເອກະພາບຕໍ່ກັບແນວທາງນະໂຍບາຍຂອງພັກ-ລັດ, ມີຄວາມເຊື້່ອໝັ້ນຕໍ່ການນໍາພາຂອງພັກ-ລັດ ແລະ ມີຄວາມເປັນເອກະພາບພາຍໃນຢ່າງແທ້ຈິງໃນການດໍາເນີນວຽກງານຕ່າງໆ, ກໍາໃຫ້ໄດ້ແນວທາງນະໂຍບາຍຂອງພັກ-ລັດຢ່າງເລິກເຊິ່ງ ເພື່ອຄົ້ນຄວ້າ ແລະ ຈັດຕັ້ງຜັນຂະຫຍາຍເຂົ້າໃນວຽກງານຕົວຈິງຂອງຕົນຢ່າງເປັນຮູບປະທໍາທີ່ແທ້ຈິງ. ດ້ານກົງຈັກການຈັດຕັ້ງ ແລະ ບຸກຄະລາກອນ ໃຫ້ມີການຄົ້ນຄວ້າຄືນກວດກາຄືນ ໃຫ້ລະອຽດຖີ່ຖ້ວນ ແລະ ແທດເໝາະກັບສະພາບຕົວຈິງຂອງວຽກງານໃນປັດຈຸບັນ. ຄຽງຄູ່ກັນນັ້ນ, ຕ້ອງໄດ້ເອົາໃຈໃສ່ໃນການກໍ່ສ້າງພະນັກງານຢ່າງມີຈຸດສຸມ ຕາມຄວາມຕ້ອງການຂອງວຽກງານຕົວຈິງ, ນິຕິກໍາແມ່ນວຽກງານໜຶ່ງທີ່ມີຄວາມຈໍາເປັນທີ່ຂາດບໍ່ໄດ້ ຕ້ອງຖືເປັນວຽກຈຸດສຸມອັນໜຶ່ງ. ສູ້ຊົນຫັນຈາກລະບົບອະນາລ໋ອກມາເປັນລະບົບດີຈີຕອລທີ່ທັນສະໄໝ ໃນທົ່ວປະເທດ ແລະ ຂະຫຍາຍຕາໜ່າງໂທລະໂຄ່ງໃຫ້ໄດ້ຕື່ມ 350 ບ້ານ, ນີ້ແມ່ນຄາດໝາຍໃຫຍ່ຈະຕ້ອງໄດ້ພ້ອມກັນສູ້ຊົນໃຫ້ສໍາເລັດ ແລະ ຕ້ອງຫັນໄປຊົມໃຊ້ສື່ແບບໃໝ່ໃຫ້ຫຼາຍ. ພ້ອມທັງມີການກະຕຸກຊຸກຍູ້, ມີການຍ້ອງຍໍຊົມເຊີຍໃຫ້ລາງວັນ ດ້ວຍການຄັດເລືອກນັກຂ່າວ, ນັກຈັດລາຍການ, ນັກປະດິດຄິດແຕ່ງຕ່າງໆ ໃນແຕ່ລະປີຈະເປັນການສ້າງກໍາລັງໃຈ. ໃນປີ 2019 ນີ້,ຕ້ອງສຸມໃສ່ການສ້າງຄອບຄົວວັດທະນະທໍາໃຫ້ໄດ້ຕື່ມ 30.000 ຄອບຄົວ, ສ້າງບ້ານວັດທະນະທໍາໃຫ້ໄດ້ຕື່ມ 250 ບ້ານ ຕາມຄາດໝາຍທີ່ກໍານົດໄວ້, ແຕ່ການສ້າງນັ້ນ ຕ້ອງເນັ້ນດ້ານມາດຖານຄຸນນະພາບຕື່ມ ແລະ ໃຫ້ເປັນເຈົ້າການໃນການຕິດຕາມຊຸກຍູ້ການສະ ເໜີເອົາທົ່ງໄຫຫີນ ແຂວງຊຽງຂວາງ ເຂົ້າເປັນມໍລະດົກໂລກ ແລະ ຮີບຮ້ອນສະເໜີເອົາພູຫີນໜາມໜໍ່ ແຂວງ ຄໍາມ່ວນ, ລວມທັງຟ້ອນລໍາວົງລາວ ແລະ ສີ້ນລາຍນາກລາວ ເຂົ້າເປັນມໍລະດົກໂລກ ໃຫ້ທ່ວງທັນຕາມແຜນການ ແລະ ສືບຕໍ່ປົກປັກຮັກສາ, ເສີມຂະຫຍາຍສິລະປະວັດທະນະທໍາອັນດີງາມຂອງຊາດລາວ ແລະ ຕ້ອງເລັ່ງແກ້ໄຂປາກົດການຫຍໍ້ທໍ້ຕ່າງໆທີ່ຢູ່ໃນຄວາມຮັບຜິດຊອບຂອງຕົນໃຫ້ໄດ້ ແລະ ໃຫ້ໄວ ເພື່ອອັດຕັນຫາງສຽງສັງຄົມຕ່າງໆນາໆນັ້ນ ແລະ ຮຽກຮ້ອງໃກ້ກະຊວງ ຖວທ ເປັນຫຼັກໃນການຈັດຕັ້ງປະຕິບັດສູ້ຊົນດຶງດູດນັກທ່ອງທ່ຽວຈີນ ແລະ ຕ່າງປະເທດເຂົ້າມາລາວ ບໍ່ໃຫ້ຫຼຸດ 4,5 ລ້ານເທື່ອຄົນ ແລະ ສ້າງລາຍຮັບໃຫ້ໄດ້ຫຼາຍກວ່າ 700 ລ້ານໂດລາສະຫະລັດ ຕາມທີ່ສະພາໄດ້ຕົກລົງ ແລະ ຮັບຮອງເອົາໄວ້. ນອກນີ້, ຕ້ອງເອົາໃຈໃສ່ຈັດຕັ້ງປະຕິບັດບັນດາກິດຈະກໍາທີ່ໄດ້ກໍານົດໃນປີທ່ອງທ່ຽວລາວ-ຈີນໃຫ້ດີ, ໃຫ້ມີຜົນສໍາເລັດ, ໂດຍຈະຕ້ອງໄດ້ປະສານສົມທົບວາງແຜນໃຫ້ລະອຽດໂດຍໄວ. ພ້ອມທັງຄົ້ນຄວ້າຈັດກິດຈະກໍາໃດເພີ່ມຢູ່ບັນດາແຂວງ, ນະຄອນຫຼວງ ທີ່ເຫັນວ່າເໝາະສົມ ແລະ ຈະມີປະສິດທິພາບ, ປະສິດທິຜົນດີ ເຮັດໃຫ້ປີທ່ອງທ່ຽວລາວ-ຈີນ 2019 ມີບັນຍາກາດອັນຝົດຟື້ນ. ນອກນີ້, ຕ້ອງເອົາໃຈໃສ່ແກ້ໄຂສິ່ງອຸດຕັນ, ກີດຂວາງແກ່ການທ່ອງທ່ຽວໃຫ້ໄດ້ໂດຍໄວ ເພື່ອເຮັດແນວໃດໃຫ້ສາມາດເອື້ອອໍານວຍຄວາມສະດວກ ແລະ ເປັນການກະຕຸກຊຸກຍູ້ແກ່ການທ່ອງທ່ຽວມີການພັດທະນາດີຂຶ້ນ.