ທຸກໃຈນຳທາງເພ

ໂດຍ: ທ່ຽງທຳ

ສະບາຍດີ, ເພື່ອນຜູ້ອ່ານທີ່ຮັກແພງ, ຫລາຍຄົນກໍຈະພົບເຫັນເຖິງຄວາມເປັນຈິງ ຂອງສະພາບເສັ້ນທາງບ້ານ ເມືອງເຮົາໃນປັດຈຸບັນ, ໄປທາງໃດ, ໝ້ອງໃດ, ຮ້ານສະພາກາເຟ ບ່ອນໃດກໍໄດ້ຍິນແຕ່ຜູ້ຈົ່ມທຸກເຖິງຄວາມຫຍຸ້ງຍາກຂອງການສັນຈອນໄປມາຫາສູ່ກັນຍ້ອນເສັ້ນທາງເປ່ເພຊຸດໂຊມລົງຫລາຍ, ພາຍຫລັງໄດ້ຮັບຜົນກະທົບຈາກໄພທຳມະຊາດ.

ເມື່ອລະດູຝົນຜ່ານມາເກືອບຢູ່ທຸກແຂວງໃນທົ່ວປະເທດຕ່າງກໍປະສົບກັບໄພນ້ຳຖ້ວມຢ່າງຮ້າຍແຮງ, ເສັ້ນທາງຫລາຍໃນຕົວເມືອງ ຫລວງເຮົາກໍເປ່ເພຈົນຈະນຳໃຊ້ບໍ່ໄດ້, ເພາະບໍ່ໄດ້ຮັບການປົວແປງແກ້ໄຂຍ້ອນເບື້ອງລັດເຮົາກໍຍັງປະສົບຄວາມ ຫຍຸ້ງຍາກເລື່ອງແຫລ່ງທຶນງົບປະມານ, ການເກັບລາຍຮັບໄດ້ໜ້ອຍແຕ່ຄວາມຕ້ອງການພັດມີຫລາຍດັ່ງນັ້ນ    ເພິ່ນຕ້ອງໄດ້ຈັດສັນບິແບ່ງໃຫ້ສອດຄ່ອງ, ອັນໃດກ່ອນ, ອັນໃດລຸນ, ວຽກໜ່ວຍໃດຄວນໃຫ້ບຸລິມະສິດ ແລະ  ບ່ອນໃດຈະຕ້ອງໄດ້ຮີບຮ້ອນ, ມີຫລາຍຄົນສະແດງຄວາມເປັນຫວ່ງອອກມາວ່າ: ບໍ່ຮູ້ວ່າປີທ່ອງທ່ຽວລາວ- ຈີນ 2019 ນີ້, ຈະບັນລຸຄາດໝາຍຫລືບໍ່, ຖ້າສະພາບເສັ້ນທາງຄົມມະນາຄົມໃນຫລາຍທ້ອງຖິ່ນຂອງປະເທດເຮົາ ບໍ່ໄດ້ຮັບການປົວແປງກໍຈະເປັນອຸປະສັກໃຫ້ການດຶງດູດນັກທ່ອງທ່ຽວເຂົ້າມາທ່ຽວປະເທດເຮົາຫລຸດໜ້ອຍ ລົງກໍເປັນໄດ້. ຄືປັດຈຸບັນສະພາບການຄົມມະນາຄົມຂອງເສັ້ນທາງຫລວງແຫ່ງຊາດ ເລກທີ 13, ທັງເໜືອ ແລະ ໃຕ້ກໍພົບຄວາມຫຍຸ້ງຍາກບໍ່ໜ້ອຍຄືຍ່ານທາງແຕ່ນະຄອນຫລວງວຽງຈັນ ເມືອຫາແຫລ່ງທ່ອງທ່ຽວວັງວຽງກໍເປ່ເພລົງຫລາຍ.

ຈົນຫລາຍຄົນບໍ່ຢາກ ໄປວັງວຽງອີກເພາະໃນເມື່ອກ່ອນໃຊ້ເວລາເດີນທາງດ້ວຍລົດກໍພຽງ 1-2 ຊົ່ວໂມງກໍ ຮອດວັງວຽງແລ້ວ, ແຕ່ດຽວນີ້ ຕ້ອງໃຊ້ເວລາຄູນສອງຈຶ່ງໄປຮອດໄດ້ຊ້ຳບໍ່ໜຳຍັງສົ່ງຜົນໃຫ້ມີຄວາມສ່ຽງຕໍ່ການເກີດອຸປະຕິເຫດ ແລະ ພາຫະນະເພກໍມີຍ້ອນເສັ້ນທາງ ດັ່ງກ່າວ.

ບາງບ່ອນເປັນຂຸມເລິກຈົນຈະຂີ່ລົດຜ່ານໄປບໍ່ໄດ້ ແລະ ຕໍ່ສະພາບດັ່ງກ່າວຖ້າພວກເຮົາຍັງຖືເບົາກໍຈະສົ່ງຜົນກະທົບຕໍ່ການພັດທະນາເສດຖະກິດ-ສັງຄົມຂອງປະເທດທົດຖອຍລົງກໍເປັນໄດ້./.