ໂຣຊ ເຜີຍ ປາກຽວ ອາດລາອາຊີບ ຖ້າບໍ່ໄດ້ຊົກກັບ ເມເວດເທີ
ເຟຣັດດີ້ ໂຣຊ ຄູຝຶກຊາວອາເມລິກາ ກ່າວວ່າ: ແມນນີ ປາກຽວ ນັກຊົກຊື່ດັງ ອາດຈະລາອາຊີບ ຖ້າລາວບໍ່ມີໂອກາດໄດ້ຊົກກັບ ຟລອຍ ເມເວດເທີ ຈູເນຍ ຍອດນັກມວຍບໍ່ເຄີຍເສຍ ອີກຄັ້ງ.
ແມນນີ ປາກຽວ ຍອດແຊ້ມໂລກຊາວຟີລິບປິນ ອາດຕັດສິນໃຈລາອາຊີບ ຖ້າລາວບໍ່ໄດ້ຊົກລ້າງຕາກັບ ຟລອຍ ເມເວດເທີ ຈູເນຍ ນັກຊົກບໍ່ເຄີຍເສຍຊາວອາເມລິກາ.
ແຊ້ມໂລກຕາກາລ໊ອກ ໄວ 40 ປີ ຫາກໍສ້າງຜົນງານສຸດຍອດເອົາຊະນະຄະແນນ ເອດຽນ ໂບຣເນີ ອະດີດແຊ້ມໂລກຊາວອາເມລິກາ ໄປຢ່າງເອກະສັນ ປ້ອງກັນແຊ້ມໂລກສຳເລັດ ຮຸ່ນເວລເຕີເວດສະມາຄົມມວຍໂລກ (WBA) ໃນການຊົກຢູ່ລາສເວກັສ ສະຫະລັດອາເມລິກາ ໃນເດືອນຜ່ານມາ.
ກ່ອນໜ້ານີ້ ປາກຽວ ແພ້ຄະແນນ ເມເວດເທີ ຈູເນຍ ໃນການຊົກສຸດມັນເມື່ອປີ 2015 ໂດຍການຊົກດັ່ງກ່າວສາມາດສ້າງລາຍຮັບມະຫາສານເປັນປະຫວັດສາດຫລາຍກວ່າ 470 ລ້ານປອນ ຈາກການຖ່າຍທອດສົດແບບເປ-ເປີ-ວິວ ແລະ ຄ່າບັດຜ່ານປະຕູ.
ເຖິງຢ່າງໃດກໍຕາມ, ຖ້າ ປາກຽວ ບໍ່ໄດ້ຊົກກັບ ເມເວດເທີ ຈູເນຍ ເຈົ້າຂອງສະຖິຕິຊະນະ 50 ໄຟຣ໌ລວດ ລາວອາດຈະຢຸດອາຊີບໃນການຊົກກັບ ຄີ ເທີແມນ ແຊ້ມໂລກຮຸ່ນ ຊຸບເປີເວລເຕີເວດ WBA.
