UN ປະກາດພະຍາດຫັດ ລະບາດໜັກໃນຟີລິບປິນ
February 12, 2019 - 5:08 PM
ໂຄສົກສະຫະປະຊາຊາດ ຖະແຫລງວ່າ: ພະຍາດຫັດລະບາດຄັ້ງໃຫຍ່ໃນເຂດເມໂທຣມະນິລາ ແລະ ເຊັນທຣັລລູຊອນ ຢູ່ຟີລິບປິນ ມີລາຍງານຜູ້ສົງໄສວ່າຕິດເຊື້ອຫລາຍກວ່າ 4.300 ຄົນ ແລະ ເສຍຊີວິດຢ່າງໜ້ອຍ 70 ຄົນ ນັບແຕ່ເດືອນມັງກອນຜ່ານມາ.
ທ່ານ ຟາຮານ ຮັກ ໂຄສົກ UN ກ່າວວ່າ: ພະຍາດຫັດທີ່ລະບາດໜັກໃນເມໂທຣມະນິລາ ແລະ ເຊັນທຣັລລູຊອນ ໄດ້ແຜ່ລະບາດໄປພື້ນທີ່ອື່ນໆແລ້ວ ໂດຍໃນປີ 2018 ມີລາຍງານຜູ້ຕິດເຊື້ອເກືອບ 22.000 ຄົນຢູ່ຟີລິບປິນ ເພີ່ມຂຶ້ນເຖິງ 376% ຈາກປີ 2017, ຜ່ານມາອົງການອະນາໄມໂລກໄດ້ໃຫ້ການຊ່ວຍເຫລືອທາງເຕັກນິກ ແລະ ທຶນສະໜັບສະໜູນແກ່ໂຄງການສ້າງພູມຄຸ້ມກັນພະຍາດແຫ່ງຊາດຂອງລັດຖະບານ ແລະ ຕິດຕາມໂຄງການໃຫ້ວັກແຊັງຄວບຄຸມພະຍາດລະບາດຢູ່ຟີລິບປິນ.
