ແທ້ ຫລື ບໍ່ ? ຜູ້ບໍລິຫານແມນຢູລົງມະຕິ ແຕ່ງຕັ້ງ ໂຊລຊາ ຄຸມຖາວອນແລ້ວ
ເດິ ຊັນ ສື່ຂອງອັງກິດ ລາຍງານວ່າ: ຜູ້ບໍລິຫານຂອງ ແມນເຊັສເຕີ ຢູໄນເຕັດ ມີມະຕິແລ້ວວ່າຈະໃຫ້ ໂອເລ່ ກຸນນາ ໂຊລຊາ ໄດ້ເປັນຜູ້ຈັດການທີມແບບຖາວອນຂອງພວກເຂົາ ໂດຍອາດຈະຖ້າປະກາດຕອນຈົບລະດູການນີ້.
ຜູ້ບໍລິຫານຂອງ ແມນເຊັສເຕີ ຢູໄນເຕັດ ຍອດສະໂມສອນແຫ່ງ ພຣີເມຍລີກ ອັງກິດ ຕັດສິນໃຈແລ້ວວ່າຈະແຕ່ງຕັ້ງໃຫ້ ໂອເລ່ ກຸນນາ ໂຊລຊາ ຜູ້ຈັດການທີມຊົ່ວຄາວຊາວນໍເວ ໄດ້ເປັນຜູ້ຈັດການທີມແບບຖາວອນຂອງທີມ.
ໂຊລຊາ ຖືກ ແມນເຊັສເຕີ ຢູໄນເຕັດ ດຶງເຂົ້າມາຄຸມທີມດ້ວຍສັນຍາທີ່ມີຜົນຈົນຈົບລະດູການນີ້ ໃນວັນທີ 19 ທັນວາຜ່ານມາ ໂດຍ ແມນຢູ ຫວັງຈະໃຫ້ລາວເຂົ້າມາກອບກູ້ສະຖານະການຂອງທີມທີ່ເຄີຍຕົກຕໍ່າພາຍໃຕ້ການຄຸມທີມຂອງ ໂຊເຊ່ ມູຣິນໂຢ ເຊິ່ງລາວສ້າງຜົນງານໄດ້ດີເກີນຄາດ ຫລັງຈາກພາທີມຊະນະເຖິງ 10 ເກມ ຈາກການຄຸມທີມ 11 ນັດໃນທຸກລາຍການ ແລະ ເຖິງຂັ້ນພາທີມຕິດ 4 ອັນດັບທຳອິດຂອງຕາຕະລາງຄະແນນໄດ້ແລ້ວ.
ຜົນງານອັນສຸດຍອດຂອງ ໂຊລຊາ ເຮັດໃຫ້ກ່ອນໜ້ານີ້ມີກະແສຂ່າວວ່າ: ຜູ້ບໍລິຫານຂອງ ແມນເຊັສເຕີ ຢູໄນເຕັດ ເລີ່ມພິຈາລະນາໃຫ້ລາວເປັນຕົວເລືອກອັນດັບ 1 ສຳລັບຕຳແໜ່ງຜູ້ຈັດການທີມແບບຖາວອນໃໝ່ແລ້ວ ຫລັງຈາກກ່ອນໜ້ານີ້ວ່າກັນວ່າເປົ້າໝາຍເບີ 1 ຂອງພວກເຂົາຄື ເມົາຣິຊິໂອ ໂປເຊັດຕິໂນ່ ໂດຍມີຂ່າວລືວ່າ: ຈິມ ໂຊລບັກເຄນ ເອເຢນຂອງ ໂຊລຊາ ໄດ້ຫາລືກັບຜູ້ບໍລິຫານບາງຄົນຂອງທີມລະຫວ່າງເກມນັດຫລ້າສຸດທີ່ ແມນເຊັສເຕີ ຢູໄນເຕັດ ບຸກໄປຊະນະ ຟູແລ່ມ 3-0 ໃນເກມລີກ ວັນທີ 9 ກຸມພາຜ່ານມາ.
ຫລ້າສຸດ ເດິ ຊັນ ລະບຸວ່າ: ໂຈເອລ ກັບ ອັຟຣາມ ເກລເຊີ ປະທານຮ່ວມຂອງທີມ ແລະ ຜູ້ບໍລິຫານຄົນອື່ນໆຂອງ ແມນເຊັສເຕີ ຢູໄນເຕັດ ມີມະຕິແລ້ວວ່າຈະໃຫ້ ໂຊລຊາ ໄດ້ເປັນຜູ້ຈັດການທີມແບບຖາວອນ ໂດຍພວກເຂົາອາດຈະຖ້າປະກາດຢ່າງເປັນທາງການຫລັງຈົບລະດູການນີ້.
