ເດືອນ 3 ອອກໃໝ່ 3 ຄ່ຳ ວັດທະນະທຳຊົນເຜົ່າຜູ້ໄທ
ໂດຍ: ທິດກ່ຳ
ເດືອນ3 ອອກໃໝ່ 3 ຄ່ຳ ປີນີ້, ພໍດີກົງກັບວັນທີ 7 ກຸມພາ ຕາມປະຕິທິນສາກົນ. ເມື່ອ ຮອດເດືອນ3 ອອກໃໝ່ 3 ຄ່ຳ ທິດກ່ຳ ຄິດຫວນຄືນເຖິງ ອະດີດຕອນເປັນພະນັກງານ ປຸກລະດົມຂົນຂວາຍ ກໍ່ສ້າງ ຮາກຖານນັບແຕ່ສະໄໝປີ 1976 ຫາປີ 1978 ຢູ່ທີ່ ເມືອງເຊໂປນ, ບ້ານເມືອງ ແສນ, ເມືອງຈັນ, ອ່າງຄຳນ້ຳ ຈະໂລະ, ບ້ານນາ ບໍ່ທ່າໂຄ່ງ, ເວົ້າໂດຍລວມເມືອງ ເຊໂປນ, ເມືອງພີນແມ່ນເປັນຊາວຜູ້ໄທ ເກືອບທັງໝົດ.
ຈາກນັ້ນ, ກໍລາມລົງໄປ ຮອດແຖວຫີນສິ່ວນາໝາກ ເກືອ, ນາກຸດຈານ, ກຸດຫີນ ໄປຫານາກະລາ, ໜອງຂອນແກ່ນ, ໜອງໄຮ, ລະຫານ້ຳ ເມືອງສອງຄອນແຂວງສະຫວັນນະເຂດ.
ເວົ້າຄວາມຈິງແລ້ວ, ຮີດຜູ້ໄທເດືອນ3 ອອກໃໝ່ 3 ຄ່ຳເປັນວັດທະນະທຳທີ່ສະແດງອອກຕາມວິຖີຊີວິດຂອງຊົນເຜົ່າຜູ້ໄທທີ່ຄວນອະນຸລັກຮັກສາ ແລະ ເສີມຂະຫຍາຍໃຫ້ດີເລີດກາຍເປັນສີສັນ ແລະ ຈຸດໜຶ່ງຂອງການທ່ອງທ່ຽວໃນອະນາຄົດ.
ເດືອນ3 ອອກໃໝ່ 3 ຄ່ຳ ເປັນບຸນ ປະເພນີໄຂປະຕູເລົ້າເຂົ້າຂອງຊົນເຜົ່າຜູ້ໄທ. ໃນມື້ ນີ້ເຂົາເຈົ້າຈະພາກັນລຸກແຕ່ ເດິກໄຂປະຕູເລົ້າເຂົ້າ, ມີພາຫວານພາຄາວ, ເຫລົ້າຢາປາແປ້ງ, ບູຊາດ້ວຍທູບທຽນທຳພິທີສົມບັດສົມມາເລົ້າເຂົ້າຂໍຂະມາດ້ວຍຄຳທີ່ດີ, ຮູ້ບຸນຄຸນເຂົ້ານ້ຳຊ້ຳປາທີ່ໄດ້ລ້ຽງເກືອຊີວິດອິນຊີ, ກິນຢ່າບົກຈົກຢ່າລົງ, ທຳພິທີຜູກ ແຂນງົວຄວາຍທີ່ໄດ້ແກ່ຄາດ ແກ່ໄຖ, ບໍ່ໃຫ້ບາບໃຫ້ເວນ, ບໍ່ມີເຄາະມີເຂັນ.
ໃນຄອບຄົວເຮືອນຊານປັດກວາດອະນາໄມສົມມາ ຄາລະວະເຈົ້າຖິ່ນເຈົ້າຖານ, ມະເຫສັກຫລັກເມືອງ, ສົມມາຜູ້ເຖົ້າຜູ້ແກ່ພໍ່ແມ່ຢ່າມີບາບມີກຳ, ມີພິທີຜູກຂໍ່ຕໍ່ແຂນຄົນໃນຄອບຄົວເຮືອນ ຊານໃຫ້ມີຄວາມສຸກຄວາມຈະເລີນ, ມີການພົບປະສັງສັນ, ຂັບລຳ, ເປົ່າແຄນ, ເປົ່າ ສະໄນ, ຕີກອງອີ່ຕຸ້ມປະສານ ສຽງຂັບສຽງລຳຈັງວະຜູ້ ໄທຖືວ່າສຸດຍອດຂອງ ຄວາມມ່ວນຊື່ນທີ່ເກີດມາເປັນຄົນລາວ ພິເສດແມ່ນຊົນເຜົ່າຜູ້ໄທ.
ຕົກມາຮອດຍຸກບ້ານ ເມືອງມີຄວາມຈະເລີນຍິ່ງມີ ຫລາກຫລາຍສີສັນເພີ່ມເຂົ້າ ເພື່ອເຮັດໃຫ້ການສະຫລອງ ບຸນປະເພນີເດືອນ 3 ອອກໃໝ່ 3 ຄ່ຳຂອງຊົນເຜົ່າຜູ້ ໄທ ໃຫ້ມີຄວາມໝາຍຍິ່ງຂຶ້ນ ເລື້ອຍໆ.
ໂດຍລວມແລ້ວ, ປະຊາ ຊົນບັນດາເຜົ່າຂອງລາວເຮົາມີຮີດຄອງປະເພນີທີ່ຫລາກຫລາຍສີສັນເໝືອນຕົ້ນໄມ້ ທີ່ມີຫລາຍກິ່ງຫລາຍງ່າ, ເໝືອນພົ້ວດອກໄມ້ທີ່ມີຫລາຍສີສັນຢູ່ເຕົ້າໂຮມ ແລະ ສາມັກຄີກັນດ້ວຍຄວາມ ຮັກແພງ.
ໃນປະຫວັດສາດບໍ່ເຄີຍ ໄດ້ໄປບຸກລຸກຮຸກຮານເອົາດິນດອນຕອນຫຍ້າຂອງປະເທດໃດມາເປັນຂອງຕົນເອງ, ກົງ ກັນຂ້າມ, ພັດຖືກປະເທດອື່ນ ມາບຸກລຸກຮຸກຮານຍາດເອົາ ຊັບສິນ, ດິນດອນຕອນຫຍ້າ ແລະ ພົນລະເມືອງໄປກາຍ ເຄິ່ງຂອງປະເທດ. ພິເສດ, ຊົນເຜົ່າຜູ້ໄທໄດ້ແຕກສະລຸ ພຸພ່າຍຢັງຢາຍໄປຮອດຟາກ ຂອງໜອງຫານໃນປັດຈຸບັນ.
ໃນປະຫວັດສາດ ຂອງ ປະເທດພວກເຮົາເປັນປະເທດທີ່ເຕັມໄປດ້ວຍອະລິຍະທຳ, ວັດທະນະທຳທີ່ລືຊື່ໂດ່ງດັງ ໄປທົ່ວໂລກໃນອະດີດຕະ ການເຊັ່ນ: ຍຸກຂອງພະເຈົ້າ ຟ້າງຸ່ມ ມະຫາລາດ, ໄຊເຊດ ຖາທິລາດ, ເຈົ້າສຸລິຍະວົງສາທຳມີກະລາດ ແລະ ເຈົ້າອະນຸວົງ. ພວກເພິ່ນມີພາລະກິດເຕົ້າຄວາມສາມັກຄີ, ສ້າງວັດວາອາຮາມ ແລະ ສະຖາປັດຕະຍະກຳອື່ນໆ ໃຫ້ກາຍ ເປັນມໍລະດົກຂອງຊາດ.
ຕົກມາໃນຍຸກປັດຈຸບັນ, ພາຍໃຕ້ການປົກຄອງໃນລະບອບປະຊາທິປະໄຕ ປະຊາຊົນ. ພັກ ແລະ ລັດຖະບານກໍຄື ການຈັດຕັ້ງສັງຄົມທຸກພາກ ສ່ວນຍິ່ງເອົາໃຈໃສ່ປົກປັກຮັກສາ ແລະ ເສີມຂະຫຍາຍໃຫ້ດີ ແລະ ມີຄວາມໝາຍຍິ່ງຂຶ້ນ.
ປະເພນີວັດທະນະທຳ ຂອງຊາດ ແລະ ຂອງປະຊາຊົນບັນດາເຜົ່ານີ້ລະຈະເປັນ ມໍລະດົກກວມລວມຂອງຊາດ ແລະ ຈະເປັນສິ່ງດຶງດູດໃຫ້ ແຂກຕ່າງດ້າວທ້າວຕ່າງ ແດນເຂົ້າມາທ່ອງທ່ຽວ ແລະ ສຶກສາຄົ້ນຄວ້ານັບມື້ນັບ ຫລາຍຂຶ້ນ./.
