ໂຮງຮຽນກຽດຕິສັກນາໆຊາດ ຄວ້າຂັນຊະນະເລີດ ບານບ້ວງເຍົາວະຊົນ U16 ທີ່ຈຳປາສັກ
ການແຂ່ງຂັນບານບ້ວງເຍົາວະຊົນ ຮຸ່ນອາຍຸບໍ່ເກີນ 12 ປີ, 14 ປີ ແລະ 16 ປີ ປະເພດ 7 ຄົນ (7×7) ທີ່ນະຄອນປາກເຊ ແຂວງຈຳປາສັກ ໃນວັນທີ 2-3 ກຸມພາຜ່ານມາ ຄັ້ງນີ້ມີ 18 ທີມຈາກ 4 ພາກສ່ວນເຂົ້າຮ່ວມຄື: ທີມນະຄອນປາກເຊ ຈາກແຂວງຈຳປາສັກ ເຈົ້າພາບ, ແຂວງເຊກອງ ແລະ 2 ທີມຈາກນະຄອນຫລວງວຽງຈັນຄື: ໂຮງຮຽນກຽດຕິສັກນາໆຊາດ ແລະ ມສ ວຽງຈັນ ທຸກທີມສົ່ງເຂົ້າຮ່ວມຄົບທຸກລຸ້ນ.
ຜ່ານການແຂ່ງຂັນ ໂຮງຮຽນກຽດຕິສັກນາໆຊາດ ສາມາດຄວ້າຂັນຊະນະເລີດ ຮຸ່ນອາຍຸບໍ່ເກີນ 16 ປີ ຮອບຊີງເອົາຊະນະທີມນະຄອນປາກເຊ ຈາກແຂວງຈຳປາສັກ ເຈົ້າພາບ 43-38 ຄະແນນ, ທີ 3 ແມ່ນແຂວງເຊກອງ. ຂະນະທີ່ ຮຸ່ນອາຍຸບໍ່ເກີນ 14 ປີ ທີ 1 ແຂວງເຊກອງ, ທີ 2 ໂຮງຮຽນກຽດຕິສັກນາໆຊາດ ແລະ ທີ 3 ເປັນຂອງແຂວງເຊກອງອີກໜຶ່ງທີມ, ສ່ວນຮຸ່ນອາຍຸບໍ່ເກີນ 12 ປີ ທີ 1 ແລະ ທີ 2 ເປັນຂອງແຂວງເຊກອງ ແລະ ທີ 3 ແມ່ນໂຮງຮຽນກຽດຕິສັກນາໆຊາດ.
ການແຂ່ງຂັນຄັ້ງນີ້ ຈັດຂຶ້ນເພື່ອເປັນການປຸກລະດົມສົ່ງເສີມໃຫ້ນັກຮຽນໃຊ້ເວລາຫວ່າງໃຫ້ເປັນປະໂຫຍດ ໂດຍການອອກກຳລັງເພື່ອສຸຂະພາບຫ່າງໄກຈາກສິ່ງເສບຕິດ ແລະ ປາກົດການຫຍໍ້ທໍ້ຕ່າງໆໃນສັງຄົມ, ສ້າງໂອກາດໃຫ້ນັກກິລາໄດ້ທົດສອບຄວາມສາມາດ, ແລກປ່ຽນບົດຮຽນ ແລະ ປະສົບການເຊິ່ງກັນ ແລະ ກັນ ທັງເປັນການພົບປະຮັດແໜ້ນຄວາມສາມັກຄີໄມຕີຈິດມິດຕະພາບ ແລະ ເປັນການສ້າງນັກກິລາຮຸ່ນສືບທອດ.
