ເວເນຊຸເອລາເດີນໜ້າປະທ້ວງໃຫຍ່ຂັບໄລ່ຜູ້ນຳ

ຝ່າຍຄ້ານເວເນຊຸເອລາເດີນຂະບວນປະທ້ວງຄັ້ງໃຫຍ່ສຸດໃນວັນທີ 20 ພຶດສະພາ ເພື່ອຂັບໄລ່ປະທານາທິບໍດີ ນິກ ຄຣຳ ມາດູ ໂຣ ອອກຈາກອຳນາດ, ຂະນະທີ່ຕົວເລກຜູ້ເສຍຊີວິດຈາກການປະທ້ວງເພີ່ມຂຶ້ນເປັນ 47 ຄົນ ແລະ ຖືກຈັບປະມານ 2.200 ຄົນ.

ສຳນັກຂ່າວ AFP ລາຍງານຈາກນະຄອນຫລວງກາຣາກັດ ປະເທດເວເນຊຸເອລາ ໃນວັນທີ 21 ພຶດສະພາວ່າ: ມີ ຜູ້ເສຍຊີວິດແລ້ວ 47 ຄົນ ແລະ ຖືກຈັບ 2.200 ຄົນ ນັບແຕ່ການເດີນຂະບວນປະທ້ວງຂັບໄລ່ທ່ານ ມາດູ ໂຣ ເລີ່ມຂຶ້ນໃນວັນທີ 1 ເມສາຜ່ານມາ ໂດຍໃນວັນທີ 20 ພຶດສະພາເຊິ່ງເປັນວັນທີ 50 ຂອງການປະທ້ວງ ມີປະຊາ ຊົນຫລັ່ງໄຫລອອກມາຮ່ວມການປະທ້ວງຫລາຍທີ່ສຸດເທົ່າທີ່ເຄີຍມີມາ. ທ່ານ ຮວນ ອັນເດຣສ ເມເຍ ສສ ໜຶ່ງໃນ ແກນນຳການປະທ້ວງ ກ່າວວ່າ: ການປະທ້ວງຄັ້ງໃໝ່ມີເປົ້າໝາຍເພື່ອສະແດງໃຫ້ລັດຖະບານຂອງທ່ານ ມາດູໂຣ ເຫັນວ່າຝ່າຍຕໍ່ຕ້ານຍັງມີພະລັງເຫລືອຫລາຍ.

ເກີດການປະທະໃນແຕ່ລະວັນ ລະຫວ່າງກຸ່ມຜູ້ປະທ້ວງກັບຕຳຫລວດ ແລະ ທະຫານ. ການປະທ້ວງລຸກລາມຈາກ ເມືອງຫລວງໄປເມືອງຕ່າງໆທົ່ວປະເທດ, ປະຊາຊົນອອກມາຮ່ວມການປະທ້ວງເພື່ອສະແດງຄວາມບໍ່ພໍໃຈຕໍ່ການ ບໍລິຫານເສດຖະກິດຂອງທ່ານ ມາດູໂຣ ທັງທີ່ເວເນຊຸເອລາເປັນປະເທດທີ່ມີປະລິມານນ້ຳມັນສຳຮອງຢ່າງຫລວງ ຫລາຍ ແລະ ປະເທດເກີດສະພາບຂາດເຂີນສິນຄ້າອຸປະໂພກ-ບໍລິໂພກພື້ນຖານຢ່າງໜັກ ແລະ ຕໍ່ເນື່ອງ ແລະ ຈາກການຕີລາຄາຂອງກອງທຶນການເງິນສາກົນ ຫລື IMF ຄາດວ່າຕົວເລກເງິນເຟີ້ຂອງເວເນຊຸເອລາຈະເພີ່ມຂຶ້ນ ເຖິງ 720% ໃນປີນີ້. ນອກຈາກນັ້ນ ເວເນຊຸເອລາຍັງເປັນໜຶ່ງໃນປະເທດທີ່ມີສະຖິຕິອາດຊະຍາກຳສູງທີ່ສຸດໃນ ໂລກ.