ທຣຳ ເລີ່ມຢ້ຽມຢາມຕ່າງປະເທດດ້ວຍການເຮັດຂໍ້ຕົກລົງຂາຍອາວຸດໃຫ້ຊາອຸ
ຣິຍາດ 21 ພຶດສະພາ: ລັດຖະບານອາເມລິກາປະກາດເຮັດຂໍ້ຕົກລົງຂາຍອາວຸດໃຫ້ອາຣັບບີ ຊາອຸດິດແລ້ວ ໂດຍມີເປົ້າໝາຍໃສ່ອີຣານ, ຂະນະທີ່ປະທານາທິບໍດີ ໂດນັນ ທຣຳ ຜູ້ນຳອາເມລິກາ ເລີ່ມພາລະກິດຢ້ຽມຢາມຕ່າງປະເທດທີ່ອາຣັບບີ ຊາອຸດິດ ເປັນປະເທດທຳອິດ.
ຂໍ້ຕົກລົງດ້ານອາວຸດມູນຄ່າ 110.000 ລ້ານໂດລາສະຫະລັດ ຈະຄວບຄຸມການຂະຫຍາຍອາວຸດຍຸດໂທປະກອນ ແລະ ບໍລິການຈາກອາເມລິກາໃຫ້ແກ່ອາຣັບບີ ຊາອຸດິດ ໃນໂອກາດທີ່ຜູ້ນຳອາເມລິກາເລີ່ມຕົ້ນພາລະກິດຢ້ຽມຢາມຕ່າງປະເທດເປັນເວລາ 8 ວັນ ໂດຍມີກຳນົດໄປນະຄອນເຢຣູຊາເລັມ, ວາຕິກັນ ແລະ ພົບກັບຜູ້ນຳໃນປະເທດເອີຣົບ. ນອກຈາກນີ້ ປະທານາທິບໍດີ ທຣຳ ກ່າວສະແດງຄວາມຍິນດີຕໍ່ການບັນລຸຂໍ້ຕົກລົງທາງທຸລະກິດຫລາຍສະບັບລະຫວ່າງພົບປະຫາລືກັບທ່ານ ອາເດລ ອັດຈູເບອີ ລັດຖະມົນຕີຕ່າງປະເທດອາຣັບບີ ຊາອຸດິດ ໂດຍບອກວ່າມີມູນຄ່າຫລາຍກວ່າ 380.000 ລ້ານໂດລາສະຫະລັດ. ຜູ້ນຳອາເມລິກາກ່າວໃນໂອກາດເຂົ້າພົບສົມເດັດພະຣາຊາທິບໍດີ ຊັດມານ ແຫ່ງອາຣັບບີ ຊາອຸດິດ ວ່າ: ເປັນການລົງທຶນຄັ້ງຍິ່ງໃຫຍ່ກັບອາເມລິກາ, ສ່ວນທ່ານ ໝອນ ສະໄປເຊີ ໂຄສົກທຳນຽບຂາວປະກາດວ່າ: ຂໍ້ຕົກລົງທາງທະຫານອາເມລິກາ-ອາຣັບບີ ຊາອຸດິດຄັ້ງນີ້ ຖືເປັນການເຮັດຂໍ້ຕົກລົງດ້ານອາວຸດພາຍໃນວັນດຽວທີ່ມີມູນຄ່າສູງທີ່ສຸດໃນປະຫວັດສາດຂອງອາເມລິກາ.
