ສາກົນຊົມເຊີຍອັດຕາການເສຍຊີວິດຂອງເດັກອາຍຸຕໍ່າກວ່າ 5 ປີ ໃນລາວຫລຸດລົງເລື້ອຍໆ
ໃນໂອກາດມີຄໍາເຫັນຕໍ່ພິທີໃຫ້ທຶນຊ່ວຍເຫລືອ “ໂຄງການສ້າງຄວາມເຂັ້ມແຂງ ເບິ່ງແຍງດູແລສຸຂະພາບເດັກນ້ອຍລາວ ຢູ່ແຂວງຫົວພັນ” ເມື່ອບໍ່ດົນມານີ້, ທ່ານ ນາງ ຢູໂກະ ໂຢເນດະ, ຜູ້ດໍາເນີນໂຄງການຂອງອົງການແພດໂລກຍີ່ປຸ່ນ (MdMJ) ໄດ້ຍົກໃຫ້ເຫັນວ່າ: ຕົນເອງມີຄວາມຍິນດີທີ່ເຫັນວ່າອັດຕາການເສຍຊີວິດຂອງເດັກອາຍຸຕໍ່າກວ່າ 5 ປີ ແມ່ນຫລຸດລົງເລື້ອຍໆ ຈາກ 163 ຄົນ ໃນປີ 1990 ຫລຸດລົງ 66 ຄົນ ໃນປີ 2015 ແລະ ໃນປີ 2017 ແມ່ນມີ 46 ຄົນ, ເຊິ່ງມັນສະແດງໃຫ້ເຫັນຄວາມພະຍາຍາມຂອງລັດຖະບານລາວໃນການເອົາໃຈໃສ່ຕໍ່ວຽກງານດັ່ງກ່າວ, ແນວໃດກໍ່ຕາມ ເພື່ອບັນລຸເປົ້າໝາຍການພັດທະນາ ຍືນຍົງ SDG ໃນການຫລຸດອັດຕາການຕາຍຂອງເດັກອາຍຸຕໍ່າກວ່າ 5 ປີ ໃຫ້ເຫລືອພຽງ 25 ຄົນ ແລະ ອັດຕາການຕາຍຂອງເດັກທີ່ມີຕົວເລກຫລາຍກວ່າໝູ່ ແມ່ນມາຈາກຄອບ ຄົວທີ່ທຸກຍາກ ແລະ ຫ່າງໄກສອກຫລີກຕ້ອງໄດ້ປັບປຸງການເຂົ້າເຖິງການຮັກສາສຸຂະພາບທີ່ມີຄຸນນະພາບໃຫ້ແກ່ເດັກນ້ອຍອາຍຸຕໍ່າກວ່າ 5 ປີ ໃນເຂດທ້ອງຖິ່ນຫ່າງໄກສອກຫລີກຫລາຍກວ່າເກົ່າ.
