ຈີນເຕືອນໄພສີເຫລືອງຫລັງຫລາຍ ພື້ນທີ່ພົບບັນຫາໝອກໜາ
ສູນອຸຕຸນິຍົມວິທະຍາແຫ່ງຊາດຈີນ ອອກປະກາດເຕືອນໄພລະດັບສີເຫລືອງອີກໃນວັນທີ 6 ກຸມພານີ້ ເນື່ອງຈາກມີໝອກໜາແຜ່ປົກຄຸມເປັນວົງກວ້າງໃນຫລາຍພື້ນທີ່ຂອງປະເທດ.
ລາຍງານລະບຸວ່າ: ຈະເກີດໝອກໜາໃນແຂວງອັນຮຸຍ, ສົງຊິ່ງ, ຫູເປຍ, ຫູໜານ ແລະ ຈຽງຊູ ໃນວັນທີ 7 ກຸມພານີ້ ເຊິ່ງຈະເຮັດໃຫ້ການແນມເຫັນໃນບາງພື້ນທີ່ຫລຸດລົງເຫລືອບໍ່ຮອດ 200 ແມັດ ໂດຍທາງສູນດັ່ງກ່າວຂໍໃຫ້ຜູ້ຂັບຂີ່ໃນພື້ນທີ່ທີ່ໄດ້ຮັບຜົນກະທົບຢຸດຄວາມໄວໃນການໃຊ້ລົດໃຊ້ຖະໜົນ. ຂະນະທີ່ຂໍໃຫ້ສະໜາມບິນ, ທາງດ່ວນ ແລະ ທ່າເຮືອຕ່າງໆ ດຳເນີນມາດຕະການເບິ່ງແຍງຄວາມປອດໄພທີ່ເໝາະສົມ.
ທັງນີ້ ນັບແຕ່ຄືວັນທີ 6 ກຸມພານີ້ ອາກາດໜາວ ແລະ ລົມແຮງຈະເຮັດໃຫ້ໝອກຄ່ອຍໆກະຈາຍຈາກທາງເໜືອໄປທາງຕອນໃຕ້ ແລະ ເຮັດໃຫ້ອຸນຫະພູມຫລຸດລົງ 6-10 ອົງສາ ໃນພື້ນທີ່ສ່ວນຫລາຍທາງພາກກາງ ແລະ ພາກຕາເວັນອອກຂອງຈີນ.
ນອກຈາກນີ້ ຄາດວ່າຈະເກີດຫິມະຕົກໜັກໃນພື້ນທີ່ທາງເໜືອຂອງຊິນຈຽງ ແລະ ທາງໃຕ້ຂອງທິເບດໃນອີກ 3 ວັນຕໍ່ໜ້າ, ສ່ວນທາງພາກເໜືອ ແລະ ຕາເວັນອອກສຽງເໜືອຂອງຈີນອາດຈະມີຫິມະຕົກປານກາງ.
ສຳນັກຂ່າວຊິນຮົວລາຍງານວ່າ: ຈີນໃຊ້ລະບົບເຕືອນໄພສະພາບອາກາດ 4 ລະດັບ ໂດຍແບ່ງລະດັບຄວາມຮຸນແຮງຕາມສີ ໄດ້ແກ່ ສີແດງ ເຊິ່ງເປັນການເຕືອນໄພຂັ້ນສູງສຸດ, ຮອງລົງມາຄື ສີສົ້ມ, ສີເຫລືອງ ແລະ ສີຟ້າ.
