ນະຄອນຫລວງເລັ່ງສ້ອມແປງຊົນ ລະປະທານໃຫ້ທັນການຜະລິດລະດູແລ້ງ
ເມື່ອບໍ່ດົນມານີ້, ຫົວໜ້າກົມຊົນລະປະທານພ້ອມດ້ວຍວິຊາການໄດ້ລົງຕິດ ຕາມກວດກາຄອງຊົນລະປະທານ ແລະ ການສ້ອມແປງຈັກສູບນ້ຳຢູ່ສະຖານີບ້ານຈະເລີນໄຊເມືອງໄຊທານີ, ທີ່ຈະສະໜອງນ້ຳໃຫ້ເນື້ອທີ່ການຜະລິດລະດູແລ້ງຂອງປະຊາຊົນ ແລະ ສູນກະສິກໍາອິນຊີຂອງກົມປູກຝັງກວ່າ 150 ເຮັກຕາ, ຊຶ່ງຈັກສູບນໍ້າຈຸດນີ້, ໄດ້ຖືກໃຊ້ງານມາເປັນເວລາດົນ ແລະ ເກີດສະພາບເປ່ເພ ແລະ ຕ້ອງໄດ້ປ່ຽນຖ່າຍອາໄຫລ່ທີ່ຕ້ອງໄດ້ສັ່ງມາຈາກຕ່າງປະເທດ, ຊຶ່ງຄາດວ່າການສ້ອມແປງຈະໃຫ້ສໍາເລັດທັນການສະໜອງນໍ້າໃນການຜະລິດລະດູແລ້ງນີ້.
ຫົວໜ້າກົມຊົນລະປະທານ ໃຫ້ຮູ້ວ່າ: ຢູ່ນະຄອນຫລວງວຽງຈັນມີຊົນລະປະທານທີ່ຈະໄດ້ສ້ອມແປງທັງໝົດ 25 ໂຄງການ, ລວມມີມູນຄ່າສ້ອມແປງແກ້ໄຂສຸກເສີນ 3 ກວ່າຕື້ກີບ. ມາຮອດປັດຈຸບັນການສ້ອມແປງມີຄືບໜ້າກວ່າ 90% ແລະ ຄາດວ່າຈະສຳເລັດໄວໆນີ້ ເພື່ອເຮັດໃຫ້ການສະໜອງນໍ້າເຂົ້າໃນເນື້ອທີ່ການຜະລິດພືດລະດູແລ້ງມີພຽງພໍ.
ພະແນກກະສິກຳ ແລະ ປ່າໄມ້ ນະຄອນຫລວງວຽງຈັນ ໃຫ້ຮູ້ວ່າ: ປັດຈຸບັນ ນະຄອນຫລວງວຽງຈັນ ໄດ້ນຳໃຊ້ສະຖານີຊົນລະປະທານເຂົ້າໃນການຜະລິດ 85 ແຫ່ງ, ສາມາດຫົດເນື້ອທີ່ໄດ້ 15.900 ເຮັກຕາ, ໃນນັ້ນມີໂຄງການລັດຄຸ້ມຄອງ 9 ໂຄງການ ແລະ 71 ໂຄງການແມ່ນກຸ່ມຊາວນາທີ່ນຳໃຊ້ຄຸ້ມຄອງ ແລະ 5 ໂຄງການຢູ່ໃນໄລຍະການກໍ່ສ້າງ, ໃນນີ້ມີ 68 ສະຖານີນຳໃຊ້ພະລັງງານໄຟຟ້າ ແລະ ເພື່ອເຮັດໃຫ້ການນໍາໃຊ້ລະບົບຊົນລະປະທານເຂົ້າໃນການຜະລິດກະສິກຳໄດ້ຢ່າງມີປະສິດທິພາບ ຈຶ່ງໄດ້ເລັ່ງປັບປຸງລະບົບຊົນລະປະທານ ໂດຍປ່ຽນຖ່າຍຈັກສູບນ້ຳເກົ່າແກ່ແລ້ວຫັນມານຳໃຊ້ຈັກດູດນ້ຳທີ່ປະຢັດພະລັງງານ ແລະ ມີປະສິດທິພາບສູງ, ຊຶ່ງຄາດວ່າມີຄວາມຕ້ອງການງົບປະມານກ່ວາ 50 ຕື້ກີບ.
