ປະທານສະພາເນັ້ນໃຫ້ໄອຍະການເອົາໃຈໃສ່ຕິດຕາມການປະຕິບັດການໝາຍໃຫ້ຖືກຕ້ອງ

  ໃນໂອກາດໂອ້ລົມກອງປະຊຸມວຽກງານໄອຍະການປະຊາຊົນທົ່ວປະເທດປະຈໍາປີ 2018 ຂອງທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດ ເມື່ອວັນທີ 4 ກຸມພານີ້, ໂດຍໄດ້ແນະນໍາໃຫ້ຄະນະພັກ-ຄະນະນໍາອົງການດັ່ງກ່າວເພີ່ມທະວີການຕິດຕາມກວດກາການປະຕິບັດກົດໝາຍໃຫ້ຖືກຕ້ອງ, ສືບຕໍ່ປັບປຸງກົນໄກການຕິດຕາມກວດກາການປະຕິບັດກົດໝາຍຂອງເຈົ້າໜ້າທີ່ສືບສວນ-ສອບສວນໃຫ້ຖືກຕ້ອງສອດຄ່ອງຕາມກົດໝາຍວ່າດ້ວຍການດຳເນີນຄະດີອາຍາສະບັບປັບປຸງໃໝ່, ເພີ່ມທະວີການຕິດຕາມກວດກາການປະຕິບັດຄຳຕັດສິນຂອງສານທີ່ໃຊ້ໄດ້ຢ່າງເດັດຂາດແລ້ວໃຫ້ໄດ້ປະຕິບັດຢ່າງຖືກຕ້ອງຕາມລະບຽບກົດໝາຍ, ເອົາໃຈໃສ່ຕິດຕາມກວດກາການສວຍໃຊ້ສິດ ແລະ ໜ້າທີ່ຕຳແໜ່ງຂອງເຈົ້າໜ້າທີ່ພະນັກງານໃນທາງບໍ່ຊອບທຳ ເຊັ່ນ: ການກັກຕົວບໍ່ຖືກຕ້ອງ, ການບີບຄັ້ນເອົາຄຳໃຫ້ການ ຫລື ຄໍາສາລະພາບດ້ວຍການທຸບຕີທໍລະມານ ຫລື ການກະທໍາອື່ນໆທີ່ບໍ່ເໝາະສົມຂອງພະນັກງານທີ່ເປັນການລະເມີດສິດອັນຊອບທໍາດ້ວຍກົດໝາຍຂອງປະຊາຊົນ ເພາະບັນຫາດັ່ງກ່າວສົ່ງຜົນກະທົບໂດຍກົງຕໍ່ຄວາມເຊື່ອໝັ້ນຕໍ່ລະບອບການເມືອງຂອງພວກເຮົາ. ສະນັ້ນ, ຮຽກຮ້ອງໃຫ້ຄະນະພັກ-ຄະນະນໍາທຸກຂັ້ນເພີ່ມຄວາມເອົາໃຈໃສ່ຕິດຕາມກວດກາບັນຫາດັ່ງກ່າວ ແລະ ເມື່ອກວດເຫັນແລ້ວຕ້ອງກ້າສັ່ງຟ້ອງຜູ້ກະທຳຜິດຕາມຂະບວນການຍຸຕິທຳ, ພ້ອມທັງສືບຕໍ່ປະສານສົມທົບກັບກະຊວງຍຸຕິທຳ ເພື່ອຈັດພິມປະມວນກົດໝາຍອາຍາ ແລະ ກົດໝາຍວ່າດ້ວຍການດຳເນີນຄະດີອາຍາ ລວມທັງກົດໝາຍວ່າດ້ວຍອົງການໄອຍະການປະຊາຊົນສູງສຸດທີ່ປັບປຸງໃໝ່ໃຫ້ສໍາເລັດໂດຍ, ພ້ອມທັງເອົາໃຈໃສ່ຕິດຕາມການປະຕິບັດກົດໝາຍ ແລະ ການສັ່ງຟ້ອງຜູ້ກະທໍາຜິດຂຶ້ນສານໃຫ້ມີຄຸນນະພາບສູງຂຶ້ນ ແລະ ຮັບປະກັນໃຫ້ມີຄວາມຖືກຕ້ອງ ແລະ ຍຸຕິທຳ.