ເອັມບັບເປ້ ຢືນຢັນ ເປແອສເຊ ບໍ່ກັງວົນດວນ ແມນຢູ
ຄີລີຢັນ ເອັມບັບເປ້ ຫົວຫອກຄົນເກັ່ງຂອງ ປາຣີ ແຊງແຊກແມງ ກ່າວວ່າ: ທີມຕົນບໍ່ຫວັ່ນກັບການດວນກັບ ແມນເຊັສເຕີ ຢູໄນເຕັດ ກາງອາທິດໜ້າ, ແຕ່ຍອມຮັບການປາສະຈາກ ເນມາ ມີຜົນເສຍຕໍ່ທີມແທ້.
ຄີລີຢັນ ເອັມບັບເປ້ ກອງໜ້າດາວຮຸ່ງຄົນເກັ່ງຂອງ ປາຣີ ແຊງແຊກແມງ ສະໂມສອນນຳຕາຕະລາງ ລີກ ເອິງ ຝຣັ່ງ ຢືນຢັນວ່າ: ທີມຕົນບໍ່ມີຫຍັງຕ້ອງກັງວົນ ສຳລັບເກມ ຢູຟາ ແຊມປ້ຽນລີກ ຮອບ 16 ທີມສຸດທ້າຍ, ເລີ່ມຕົ້ນ ເປແອສເຊ ມີຄິວບຸກໄປຢາມ ແມນເຊັສເຕີ ຢູໄນເຕັດ ສະໂມສອນຟອມແຮງແຫ່ງ ພຣີເມຍລີກ ອັງກິດ ວັນທີ 12 ກຸມພານີ້.
ແມນເຊັສເຕີ ຢູໄນເຕັດ ມີຜົນງານດີແບບຕໍ່ເນື່ອງ ນັບແຕ່ ໂອເລ່ ກຸນນາ ໂຊລຊາ ເຂົ້າມາຄຸມທີມແທນ ໂຊເຊ່ ມູຣິນໂຢ ໃນເດືອນທັນວາ. ຂະນະທີ່ ເປແອສເຊ ຫາກໍປະລາໄຊໃນລີກເປັນເທື່ອທຳອິດຂອງລະດູການ ຫລັງອອກໄປເສຍ ໂອລິມປິກ ລີຍົງ 1-2 ໃນວັນທີ 3 ກຸມພາຜ່ານມາ ເຊິ່ງເກມນີ້ ໂຊລຊາ ເຂົ້າມາສັງເກດການເຖິງຂອບສະໜາມນຳອີກ.
ນອກຈາກນີ້ ຍອດທີມແຫ່ງນະຄອນຫລວງປາຣີຈະບໍ່ມີ ເນມາ ດາວຍິງຈອມລີລາຊາວບຣາຊິນ ດວນກັບ ແມນເຊັສເຕີ ຢູໄນເຕັດ ທັງສອງນັດນຳອີກ ເພາະມີບັນຫາບາດເຈັບຕີນຂວາ. ແຕ່ເຖິງຢ່າງໃດ ເອັມບັບເປ້ ປະກາດຈະແຈ້ງວ່າ: ບໍ່ມີຫຍັງຕ້ອງກັງວົນ.
