ກະຊວງການເງິນເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກຄັ້ງທີ 7
ໃນວັນທີ 22-23 ມັງກອນນີ້, ກະຊວງການເງິນໄດ້ຈັດກອງປະຊຸມເຊື່ອມຊຶມ ແລະ ຜັນຂະຫຍາຍມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 7 ຂອງຄະນະບໍລິຫານງານສູນກາງພັກສະໄໝທີ X, ພາຍໃຕ້ການເປັນປະທານຂອງສະຫາຍ ສົມດີ ດວງດີ ກໍາມະການສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ໂດຍມີສະມາຊິກພັກພະນັກງານພາຍໃນກະຊວງເຂົ້າຮ່ວມຢ່າງພ້ອມພຽງ.
ກອງປະຊຸມໄດ້ຮັບຟັງການເຜີຍແຜ່ເອກະສານສຳຄັນ 2 ສະບັບຄື: ມະຕິກ່ຽວກັບການເພີ່ມທະວີການນຳພາແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ສ້າງຄວາມເຂັ້ມແຂງຂອງການຄຸ້ມຄອງມະຫາພາກ ເພື່ອຄວາມເຂົ້າໃຈເປັນເອກະພາບໃນລະດັບສູງ ກັບທິດທາງວິທີການ ແລະ ມາດຕະການທີ່ສູນກາງວາງອອກ, ສ້າງຄວາມຕັດສິນໃຈເດັດດ່ຽວແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນ ໃນຕໍ່ໜ້າ, ພ້ອມທັງຄົ້ນຄວ້າກຳນົດບັນດາມາດຕະການໃຫ້ແທດກັບຕົວຈິງ ແລະ ມີປະສິດທິຜົນສູງ ເພື່ອແກ້ໄຂສະພາບການດັ່ງກ່າວ, ສ້າງຂະບວນການຈັດຕັ້ງປະຕິບັດຢ່າງແຂງແຮງທົ່ວເຖິງ ກໍ່ໃຫ້ເກີດການຫັນປ່ຽນຕົວຈິງ ທີ່ມີລັກສະນະບຸກທະລຸໃນທຸກຂົງເຂດວຽກງານ ເພື່ອຍູ້ແຮງດ້ານການພັດທະນາໃນດ້ານຕ່າງໆ ໃຫ້ບັນລຸຄາດໝາຍທີ່ກອງປະຊຸມໃຫຍ່ ຄັ້ງທີ X ຂອງພັກວາງອອກ ແລະ ມະຕິວ່າດ້ວຍການປັບປຸງຮາກຖານການເມືອງ ຂອງລະບອບປະຊາທິປະໄຕປະຊາຊົນ ໃຫ້ເຂັ້ມແຂງໜັກແໜ້ນ.
ໃນໂອກາດດັ່ງກ່າວ, ສະຫາຍ ສົມດີ ດວງດີ ໄດ້ໂອ້ລົມຮຽກຮ້ອງໃຫ້ຄະນະພັກ-ຄະນະນໍາ ແຕ່ລະຂັ້ນ ເປັນເຈົ້າການ ໃນການຈັດຕັ້ງເຊື່ອມຊຶມມະຕິກອງປະຊຸມຄົບຄະນະ ບໍລິຫານງານສູນກາງພັກ ຄັ້ງທີ 7 ນີ້ ແລະ ສຸມໃສ່ແກ້ໄຂບັນຫາທີ່ສຳຄັນ ໃນຂົງເຂດເສດຖະກິດ-ການເງິນ ກໍຄື ການກໍ່ ສ້າງຮາກຖານການເມືອງ ຂອງລະບອບປະຊາທິປະໄຕປະຊາຊົນ ທີ່ຕິດພັນກັບພຶດຕິກຳຕົວຈິງຂອງຂະ ແໜງການຂອງຕົນ, ແກ້ໄຂບັນດາຈຸດອ່ອນຂໍ້ຄົງຄ້າງ, ຊອກໃຫ້ເຫັນບັນດາ ສາເຫດທີ່ເປັນພື້ນຖານ ແລະ ຕົ້ນຕໍ ເພື່ອວາງມາດຕະການ, ທິດທາງ, ວິທີການແກ້ໄຂທີ່ຖືກຕ້ອງ ສາມາດປະຕິບັດໄດ້ຢ່າງມີປະສິດທິພາບ ແລະ ປະສິດທິຜົນ.
