ລາວຈະຈັດກິດຈະກໍາແຂ່ງຂັນຖີບລົດ Bike For Her ເພື່ອຢຸດຕິການໃຊ້ຄວາມຮຸນແຮງຕໍ່ແມ່ຍິງ

      ການແຂ່ງຂັນກິລາຖີບ​ລົດຖີບ ໄບ໋ຟໍເຮີ (Bike For Her)  ວຽງຈັນ 2019 ຊີງແຊ໋ມຫລາຍລາຍການຈະມີ​ຂຶ້ນໃນຕົ້ນເດືອນມີນາທີ່ຈະມາເຖິງນີ້, ເພື່ອເປັນການຢຸດຄວາມຮຸນແຮງຕໍ່ແມ່ຍິງ ແລະ ຄັດເລືອກນັກກິລາຖີບລົດທີ່ມີພອນສະຫວັນດີເດັ່ນ​ເຂົ້າ​ຮ່ວມທີມຊາດເພື່ອກຽມສົ່ງເຂົ້າຮ່ວມແຂ່ງຂັນ​ໃນງານມະຫາກໍາກິລາຊີເກມຄັ້ງທີ 30 ທີ່ປະເທດຟີລິບປິນຮັບກຽດເປັນເຈົ້າພາບ ​ເຊິ່ງຈະຈັດຂຶ້ນໃນທ້າຍປີນີ້.

          ອີງຕາມຂໍ້ມູນຈາກ​ເພສເຟດບຸກ Bike For Her ວຽງຈັນ 2019 ແຈ້ງໃຫ້ຮູ້ວ່າ: ເພື່ອເປັນການປຸກລະດົມ​ສັງຄົມ​ຢຸດຕິ​ການ​ໃຊ້ຄວາມຮຸນແຮງຕໍ່ແມ່ຍິງ ແລະ ອີກດ້ານໜຶ່ງກໍ​ເພື່ອເປັນການສົ່ງເສີມການອອກກໍາລັງກາຍເພື່ອສຸຂະພາບ ແລະ ຄັດ​ເລືອກ​ເອົາ​ນັກ​ຖີບ​ລົດດີ​ເດັ່ນ​ເຂົ້າ​ຮ່ວມ​ທີ​ມຊາດ. ດັ່ງນັ້ນ, ໃນວັນທີ 10 ມີນາຈະມາເຖິງນີ້ ສະຫະພັນປັ່ນລົດຖີບແຫ່ງຊາດລາວຮ່ວມກັບວາລະສານຂວັນໃຈ ຈະຈັດການແຂ່ງຂັນປັ່ນລົດຖີບຊິງແຊ໋ມຫລາຍລາຍການ ​ໂດຍຈະນໍາໃຊ້​ເສັ້ນທາງອ້ອມຂ້າງນະຄອນຫລວງວຽງຈັນ ເປັນການຊິງໄຊຊິງຄວາມເປັນ 1 ທັງປະເພດຍິງ ແລະ ເພດຊາຍຂອງແຕ່ລະລາຍການ, ໃນນີ້ສໍາລັບນັກກິລາທີ່ສາມາດຕິດອັນດັບທີ 1, ທີ 2 ແລະ ທີ 3 ຈະໄດ້ຮັບຂັນ, ລາງວັນເງິນສົດ, ເສື້ອສັນຍາລັກຂອງນັກປັ່ນມືອາຊີບ ແລະ ຫລຽນລາງວັນອີກ​ດ້ວຍ.

       ລາຍການດັ່ງກ່າວມີການຊິງໄຊ 12 ລາຍການ, ໃນນັ້ນ 11 ລາຍການແມ່ນການແຂ່ງຂັນແບບມືອາຊີບ ແລະ ນັກກິລາຈະໄດ້ເສຍຄ່າສະໝັກຜູ້ໜຶ່ງ 2 ແສນກີບ, ປະເພດລົດກວກໄລຍະທາງ 90 ກິໂລແມັດມີ 3 ລາຍການຄື: ຮຸ່ນທົ່ວໄປ, ຮຸ່ນອາຍຸ 30-39 ປີ ແລະ ຮຸ່ນອາຍຸ 40 ປີ ປະເພດລົດເທັນເທີນຍິງໄລຍະທາງ 90 ກິໂລແມັດ ມີ 2 ລາຍການຄື: ຮຸ່ນອາຍຸບໍ່ເກີນ 35 ປີລົງມາ ແລະ ຮຸ່ນອາຍຸ 35 ປີ ຂຶ້ນໄປ, ປະເພດລົດກວກໄລຍະທາງ 90 ກິໂລຍິງມີ 2 ລາຍການຄື: ຮຸ່ນອາຍຸບໍ່ເກີນ 35 ປີລົງມາ ແລະ ຮຸ່ນອາຍຸ 35 ປີ ຂຶ້ນໄປ ແລະ ປະເພດລົດເທັນເທີນໄລຍະທາງ 90 ແມັດຊາຍມີ 4 ລາຍການປະກອບມີຮຸ່ນທົ່ວໄປ, ຮຸ່ນອາຍຸ 30-39 ປີ ແລະ ຮຸ່ນອາຍຸ 40-49 ປີ, ຮຸ່ນ 50 ປີ ທົ່ວໄປ. ທັງ 4 ປະເພດດັ່ງກ່າວນັກກິລາຈະແຂ່ງຂັນຈາກຈຸດເສັ້ນໄຊໃນຕົວເມືອງນະຄອນຫລວງວຽງຈັນ ມຸ່ງໜ້າໄປທີ່ເມືອງສັງທອງ ບ້ານປາກ ແລ້ວ​ໂຄ້ງກັບມາຈຸດເດີມຜູ້ໃດມາຮອດເສັ້ນໄຊກ່ອນຜູ້ນັ້ນຈະໄດ້ຊະນະເລີດອັນດັບທີ 1 ໄປຄອງ. ສ່ວນລາຍການທີ 12 ແມ່ນການແຂ່ງຂັນຄາລະວານຖີບ​ລົດ ລາຍການນີ້ນັກກີລາຈະໄດ້ເສຍຄ່າສະໝັກຜູ້ໝັກ 120.000 ກີບ ຈະແຂ່ງຂັນ ພາຍໃນຕົວເມືອງໃນໄລຍະທາງ 13 ກິໂລແມັດ ​ເຊິ່ງຈະມີລາງວັນທີ່ລະລຶກມອບໃຫ້.