ວິຕົກຊາວບ້ານຄໍ້ກິນອາຫານເປັນພິດ 61 ຄົນ ມີອານການເຈັບທ້ອງ ແລະ ປວດຮາກ
ຫ້ອງການສາທາລະນະສຸກເມືອງຈຳພອນ ແຂວງສະຫວັນນະເຂດ ລາຍງານວ່າ: ເນື່ອງຈາກການບໍລິໂພກຊີ້ນງົວເປັນພິດ ເຮັດໃຫ້ປະຊາຊົນພາຍໃນບ້ານຄໍ້ ເຂດຂາມເຖົ້າ ເມືອງຈຳພອນຫລາຍກວ່າ 60 ຄົນ ເຈັບທ້ອງ ແລະ ປວດຮາກຢ່າງຮຸນແຮງ, ພາຍຫລັງມີຄຳຈຳນວນໜຶ່ງໄດ້ພາກັນບໍລິໂພກຊີ້ນງົວທີ່ຂ້າໃນງານເຮັດພິທີຊາປະນາກິດສົບຢູ່ບ້ານດັ່ງກ່າວ ໃນຕອນແລງຂອງວັນທີ 12 ມັງກອນນີ້ ພໍຮອດທ່ຽງຄືນຂອງມື້ດຽວກັນ ໄດ້ມີປະຊາຊົນ 12 ຄົນ ໃນນີ້ມີຍິງ 7 ຄົນ ເກີດມີອາການເຈັບທ້ອງຖ່າຍ ແລະ ປວດຮາກຢ່າງຮຸນແຮງ ແລະ ຕໍ່ມາຮອດວັນທີ 13 ໄດ້ມີຜູ້ຕິດພະຍາດດັ່ງກ່າວຕື່ມອີກ 18 ຄົນ ຍິງ 15 ຄົນ ແລະ ເດັກນ້ອຍ 3 ຄົນ. ໃນຂະນະດຽວກັນ ແພດໝໍປະຈຳເຂດກໍໄດ້ດຳເນີນການປິ່ນປົວ ແລະ ຕົກມາຮອດວັນທີ 14 ກໍມີຜູ້ຕິດພະຍາດຕື່ມອີກຈຳນວນ 31 ຄົນ ຍິງ 3 ຄົນ ແລະ ມີນັກຮຽນ 7 ຄົນ ລວມເປັນ 61 ຄົນ ຍິງ 25 ຄົນ ໃນນີ້ມີເດັກນ້ອຍ 10 ຄົນ. ຈາກນັ້ນ ຫ້ອງການສາທາລະນະສຸກເມືອງຈຳພອນ ສົມທົບກັບໜ່ວຍງານລະບາດວິທະຍາ ແລະ ແພດເລັ່ງດ່ວນເຕົ້າໂຮມເອົາຜູ້ປ່ວຍມາປິ່ນປົວທີ່ສາລາໂຮງໝໍຂອງບ້ານ ເຊິ່ງໂຊກດີບໍ່ມີຜູ້ເສຍຊີວິດໃດໆ ແລະ ມາຮອດປັດຈຸບັນ ການລະບາດຂອງພະຍາດດັ່ງກ່າວໄດ້ສະຫງົບລົງແລ້ວ ໂດຍທີມງານແພດໄດ້ສັນນະສູດເບື້ອງຕົ້ນວ່າ: ອາດຈະເປັນຍ້ອນຂອງການກິນຊີ້ນງົວທີ່ປຸງແຕ່ງບໍ່ສະອາດ ແລະ ອາດມີສານເປັນພິດກໍເປັນໄດ້.
