ຕົວເລກເສດຖະກິດຈີນປີ 2018 ຂະຫຍາຍຕົວຊ້າລົງທີ່ສຸດໃນຮອບ 28 ປີ
ຂໍ້ມູນທາງການຈີນລະບຸວ່າ: ອັດຕາການເຕີບໃຫຍ່ທາງເສດຖະກິດຈີນປີ 2018 ຂະຫຍາຍຕົວຊ້າທີ່ສຸດໃນຮອບເກືອບ 3 ທົດສະວັດ ໂດຍສະເພາະໃນໄຕມາດສຸດທ້າຍ. ຂະນະທີ່ຈີນພະຍາຍາມແກ້ໄຂບັນຫາໜີ້ມະຫາສານ ແລະ ສົງຄາມການຄ້າກັບອາເມລິກາ.
ສຳນັກງານສະຖິຕິແຫ່ງຊາດຈີນ ລາຍງານວ່າ: ເສດຖະກິດຈີນເຕີບໃຫຍ່ 6,6% ສູງກວ່າທີ່ທາງການຕັ້ງເປົ້າໝາຍໄວ້ 6,5% ແລະ ກົງກັບນັກວິເຄາະຄາດຄະເນໄວ້, ແຕ່ຖືວ່າຫລຸດລົງຈາກ 6,8% ໃນປີ 2017 ຕົວເລກການເຕີບໃຫຍ່ທີ່ຂະຫຍາຍຕົວຊ້າເຮັດໃຫ້ນາຍົກລັດຖະມົນຕີ ຫລີ ເຄີ້ສຽງ ຂອງຈີນ ປະກາດໃນອາທິດຜ່ານມາວ່າ: ລັດຖະບານຈະປະຄອງເສດຖະກິດບໍ່ໃຫ້ຫລຸດລົງ, ຈີນມີທ່າອ່ຽງຈະຜະເຊີນບັນຫາເສດຖະກິດຕໍ່ເນື່ອງ ເຊິ່ງນັກເສດຖະສາດຄາດຄະເນໄວ້ວ່າ: ເສດຖະກິດຈະຂະຫຍາຍຕົວຫລຸດລົງໜັກ. ຄະນະກຳມາທິການສຳນັກງານສະຖິຕິແຫ່ງຊາດຈີນ ກ່າວວ່າ: ຈີນມີພາລະກິດຄື: ຕ້ອງປ້ອງກັນ ແລະ ຫລຸດຄວາມສ່ຽງທາງເສດຖະກິດ, ແກ້ໄຂບັນຫາຄວາມທຸກຍາກ ແລະ ບັນເທົາບັນຫາມົນລະພິດ, ການພົວພັນຂອງຈີນກັບອາເມລິກາປະເທດຄູ່ຄ້າລາຍໃຫຍ່ຊຸດໂຊມລົງໃນປີຜ່ານມາ ພາຍຫລັງປະທານາທິບໍດີ ໂດນັລ ທຣຳ ໃຊ້ມາດຕະການພາສີກັບສິນຄ້າຈີນ ເພື່ອໃຫ້ຈີນຍອມອ່ອນຂໍ້ທາງການຄ້າ, ສົງຄາມການຄ້າສອງຝ່າຍຢຸດໄປຊົ່ວຄາວ ພາຍຫລັງຜູ້ນຳຈີນ ແລະ ອາເມລິກາຕົກລົງໂຈະຊົ່ວຄາວຄວາມຂັດແຍ່ງ 3 ເດືອນ ເພື່ອເຈລະຈາຫາທາງອອກກັນສອງຝ່າຍຕາມກຳນົດການເຈລະຈາ ຢູ່ນະຄອນຫລວງວໍຊິງຕັນ ໃນທ້າຍເດືອນນີ້.
