ຫວຽດນາມ ຊະນະຈຸດໂທດ ຈໍແດນ ເຂົ້າຮອບ 8 ທີມ ເອຊຽນ ຄັບ 2019
ເຕະບານຊາຍຊີງແຊ້ມອາຊີ ຫລື ເອຊຽນ ຄັບ 2019 ທີ່ສະຫະລັດອາຣັບເອມິເຣສ ໃນວັນທີ 20 ມັງກອນ 2019 ຮອບ 16 ທີມ ຫວຽດນາມ ແຊ້ມອາຊຽນ 2018 ເອົາຊະນະຈຸດໂທດ ຈໍແດນ 4-2 ໃນເວລາ 90 ນາທີ ສະເໝີກັນ 1-1, ຖືກຂຶ້ນນຳກ່ອນຈາກການຍິງລູກໂທດ 2 ຈັງຫວະໃນເຂດໂທດຂອງ ບາຮາ ອາບບາດຸຣາມານ ນາທີ 39, ແຕ່ ຫວຽດນາມ ຍິງປະຕູຕີສະເໝີຈາກ ຫງຽນກົງເຟືອງ ນາທີ 51, ສ່ວນເວລາທີ່ເຫລືອບໍ່ມີປະຕູເພີ່ມຈົບ 90 ນາທີ ຕ້ອງຫລິ້ນໃນຊ່ວງຕໍ່ເວລາພິເສດ 30 ນາທີ ແຕ່ກໍບໍ່ສາມາດຍິງປະຕູກັນໄດ້ ຕ້ອງດວນຈຸດໂທດ ແລະ ເປັນຫວຽດນາມທີ່ຍິງຄົມກວ່າເອົາຊະນະໄປ 4-2 ເຂົ້າຮອບ 8 ທີມ ໄປລໍຖ້າພົບຜູ້ຊະນະລະຫວ່າງ ຍີ່ປຸ່ນ ອະດີດແຊ້ມ 4 ສະໄໝ ຫລື ຊາອຸດິ ອາຣັບບີ ອະດີດແຊ້ມ 3 ສະໄໝ ທີ່ຈະແຂ່ງໃນມື້ນີ້ 21 ມັງກອນ 2019 ເວລາ 18:00 ໂມງ, ສ່ວນຮອບ 8 ທີມ ຈະແຂ່ງຂັນໃນວັນທີ 24 ມັງກອນ 2019 ເວລາ 20:00 ໂມງ.
ມື້ນີ້ 21 ມັງກອນ 2019 ຈະມີການແຂ່ງຂັນຮອບ 16 ທີມອີກ 3 ຄູ່: ຍີ່ປຸ່ນ ພົບ ຊາອຸດິ ອາຣັບບີ ແຂ່ງຂັນເວລາ 18:00 ໂມງ; ອົດສະຕຣາລີ ພົບ ອຸດເບກິດສະຖານ ແຂ່ງຂັນເວລາ 21:00 ໂມງ ແລະ ເຈົ້າພາບ ສະຫະລັດອາຣັບເອມິເຣສ ພົບ ກີກິດສະຖານ ແຂ່ງຂັນເວລາ 00:00 ໂມງ.
