ຫວຽດນາມກຽມຕ້ອນຮັບຜູ້ນຳ ສປປ ເກົາຫລີ
ແຫລ່ງຂ່າວເປີດເຜີຍວ່າ: ລັດຖະບານຫວຽດນາມກຳລັງກຽມການຕ້ອນຮັບທ່ານ ກິມ ຈ໋ອງອຸນ ຜູ້ນຳ ສປປ ເກົາຫລີ ທີ່ຈະມາຢ້ຽມຢາມຢ່າງເປັນທາງການຫລັງກຸດຈີນໃນຕົ້ນເດືອນໜ້າ ທ່າມກາງກະແສຂ່າວວ່າ: ຫວຽດນາມຈະໄດ້ເປັນເຈົ້າພາບກອງປະຊຸມສຸດຍອດຄັ້ງທີ 2 ລະຫວ່າງທ່ານ ກິມ ຈ໋ອງອຸນ ກັບປະທານາທິບໍດີ ໂດນັລ ທຣຳ ຂອງອາເມລິກາ.
ແຫລ່ງຂ່າວບໍ່ໄດ້ຢືນຢັນວ່າ: ການຢ້ຽມຢາມຂອງທ່ານ ກິມ ຈ໋ອງອຸນ ຈະມີຂຶ້ນພ້ອມກັບກອງປະຊຸມສຸດຍອດ ຫລື ບໍ່, ເຖິງວ່າມີຂ່າວວ່າຫວຽດນາມອາດຈະໄດ້ເປັນສະຖານທີ່ຈັດກອງປະຊຸມສຸດຍອດຄັ້ງທີ 2 ຂອງຜູ້ນຳ ສປປ ເກົາຫລີ ກັບ ອາເມລິກາ ຫລາຍທີ່ສຸດ ເພາະມີການພົວພັນອັນດີກັບທັງສອງປະເທດ. ສ່ວນໂຄສົກສະຖານທູດອາເມລິກາໃນຫວຽດນາມບໍ່ຂໍຕອບເລື່ອງນີ້ ແລະ ຂໍໃຫ້ສື່ໄປຖາມທຳນຽບຂາວແທນ. ນັກວິເຄາະເບິ່ງວ່າ: ນະຄອນຫລວງຮ່າໂນ້ຍ ທາງຕອນເໜືອຂອງຫວຽດນາມ ແລະ ເມືອງດານັງ ທາງຕອນກາງຂອງຫວຽດນາມ ອາດຈະໄດ້ເປັນເຈົ້າພາບກອງປະຊຸມສຸດຍອດຄັ້ງນີ້.
ປະທານາທິບໍດີ ທຣຳ ບອກກັບສື່ຢູ່ນະຄອນຫລວງວໍຊິງຕັນ ໃນວັນທີ 6 ມັງກອນວ່າ: ອາເມລິກາ ແລະ ສປປ ເກົາຫລີ ກຳລັງເຈລະຈາເລື່ອງສະຖານທີ່ຈັດກອງປະຊຸມສຸດຍອດຄັ້ງທີ 2 ແລະ ຈະປະກາດໃນຮູ້ໃນມໍ່ໆນີ້.
