ລັດຖະບານລາວມອບຫລຽນໄຊອິດສະຫລະຊັ້ນ II ໃຫ້ສຳນັກຂ່າວສານຫວຽດນາມ
ລັດຖະບານແຫ່ງ ສປປ ລາວ ປະດັບຫລຽນໄຊອິດສະຫລະຊັ້ນ II ໃຫ້ບຸກຄົນ ແລະ ກົມກອງລວມໝູ່ຂອງສຳນັກຂ່າວສານຫວຽດນາມ ໃນໂອກາດສະເຫລີມສະຫລອງວັນສ້າງຕັ້ງຂ່າວສານປະເທດລາວ ຄົບຮອບ 50 ປີ (6/1/1968-6/1/2018) ທີ່ໄດ້ທຸ້ມເທເຫື່ອແຮງສະຕິປັນຍາຂອງຕົນປະກອບສ່ວນເຂົ້າໃນການພັດທະນາຂ່າວສານປະເທດລາວດ້ວຍການໃຫ້ຄວາມຮ່ວມມື ແລະ ຊ່ວຍເຫລືອທາງດ້ານວິຊາການດ້ານຂ່າວ, ເຕັກນິກ ແລະ ວັດຖຸອຸປະກອນຮັບໃຊ້ລະບົບສື່ສານ, ຂໍ້ມູນຂ່າວສານ ແລະ ອື່ນໆ ໃຫ້ສຳນັກຂ່າວສານປະເທດລາວຕະຫລອດມາ.
ພິທີມອບ-ຮັບຫລຽນດັ່ງກ່າວໄດ້ຈັດຂຶ້ນໃນວັນທີ 15 ມັງກອນນີ້ ທີ່ນະຄອນຫລວງຮ່າໂນ້ຍ ສສ ຫວຽດນາມ ໂດຍສະຫາຍ ບໍ່ແສງຄຳ ວົງດາລາ ກຳມະການສູນກາງພັກ, ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ໃຫ້ກຽດມອບຫລຽນໄຊອິດສະຫລະຊັ້ນ II ໃຫ້ສະຫາຍ ຫງວຽນ ດຶກ ເລີ້ຍ ກຳມະການສູນກາງພັກກອມມູນິດຫວຽດນາມ, ຜູ້ອຳນວຍການໃຫຍ່ສຳນັກຂ່າວສານຫວຽດນາມ, ຫລຽນໄຊອິດສະຫລະຊັ້ນ II ໃຫ້ກົມກອງລວມໝູ່ສຳນັກຂ່າວສານຫວຽດນາມ ແລະ ຫລຽນໄຊແຮງງານຊັ້ນ III ໃຫ້ແກ່ 8 ກົມກອງລວມໝູ່ຂອງສຳນັກຂ່າວສານຫວຽດນາມ.
ໃນໂອກາດດັ່ງກ່າວນີ້, ສະຫາຍ ສູນທອນ ຄັນທະວົງ ຜູ້ອຳນວຍການໃຫຍ່ສຳນັກຂ່າວສານປະເທດລາວ ກໍໄດ້ກ່າວສະແດງຄວາມຂອບໃຈ, ຊົມເຊີຍ ແລະ ຕີລາຄາສູງຕໍ່ການຮ່ວມມືລະຫວ່າງສຳນັກຂ່າວສານປະເທດລາວ ແລະ ສຳນັກຂ່າວສານຫວຽດນາມ ຕະຫລອດໄລຍະ 50 ປີຜ່ານມາ ຖືວ່າສອງສຳນັກໄດ້ໃຫ້ການຮ່ວມມືຊ່ວຍເຫລືອເຊິ່ງກັນ ແລະ ກັນຕະຫລອດມາ ໂດຍນັບແຕ່ຊຸມປີ 1960 ສຳນັກຂ່າວສານຫວຽດນາມ ໄດ້ສົ່ງພະນັກງານນັກຂ່າວ, ເຕັກນິກ ແລະ ວັດຖຸອຸປະກອນຮັບໃຊ້ມາຊ່ວຍເຫລືອວຽກງານຂ່າວສານຂອງພວກເຮົາ, ຊ່ວຍສ້າງບຸກຄະລາກອນ ແລະ ເຮັດໃຫ້ສຳນັກຂ່າວສານປະເທດລາວຖືກສ້າງຕັ້ງຂຶ້ນໃນວັນທີ 6 ມັງກອນ 1968, ໄດ້ເປັນບາດກ້າວໃໝ່ໃນການຮ່ວມມືລະຫວ່າງສຳນັກຂ່າວສານປະເທດລາວ ແລະ ສຳນັກຂ່າວສານຫວຽດນາມ ໂດຍສະເພາະແມ່ນການນຳເອົາຂ່າວ, ໝາກຜົນຂອງການຕໍ່ສູ້ກູ້ຊາດ, ການເຄື່ອນໄຫວຂອງຜູ້ນຳ, ກອງທັບ ກໍຄືປະຊາຊົນລາວເພື່ອກະຈາຍສູ່ໂລກພາຍນອກໂດຍຜ່ານສຳນັກຂ່າວສານຫວຽດນາມ, ນັ້ນເປັນຈຸດເດັ່ນທີ່ພວກເຮົາບໍ່ສາມາດຫລົງລືມໄດ້. ນອກຈາກນີ້ ຍັງມີຮູບພາບທີ່ໄດ້ຖ່າຍຈາກເຫດການຕ່າງໆໃນສະໜາມຮົບ ແລະ ການເຄື່ອນໄຫວຂອງການນຳພັກ-ລັດ ກໍຄືການຕໍ່ສູ້ຂອງປະຊາຊົນໃນແຕ່ລະບັ້ນຮົບ ແລະ ໃນແຕ່ລະສະໜາມຮົບທີ່ເປັນມູນມໍລະດົກອັນລ້ຳຄ່າທີ່ນັກຂ່າວຈາກສຳນັກຂ່າວສານຫວຽດນາມໄດ້ໃຫ້ການຊ່ວຍເຫລືອ ແລະ ໄດ້ບັນທຶກໄວ້ ເຊິ່ງມາຮອດປັດຈຸບັນໄດ້ມອບໃຫ້ແກ່ຂ່າວສານປະເທດລາວຈຳນວນໜຶ່ງ ແລະ ພວກເຮົາກໍໄດ້ນຳໃຊ້ຢ່າງມີຄຸນປະໂຫຍດໃນການໂຄສະນາເຜີຍແຜ່ຂໍ້ມູນຂ່າວສານ, ປະຫວັດການເຄື່ອນໄຫວຕ່າງໆໃນສະໄໝສົງຄາມໃຫ້ແກ່ຄົນຮຸ່ນຫລັງໄດ້ສຶກສາຮຽນຮູ້.
ໃນມື້ດຽວກັນນີ້, ກໍໄດ້ມີການພົບປະສອງຝ່າຍລະຫວ່າງສຳນັກຂ່າວສານປະເທດລາວ ແລະ ສຳນັກຂ່າວສານຫວຽດນາມ ເຊິ່ງທັງສອງຝ່າຍໄດ້ເຫັນດີເປັນເອກະພາບກັນຈະສືບຕໍ່ຍົກສູງຄຸນນະພາບດ້ານແລກປ່ຽນຂໍ້ມູນຂ່າວສານ, ຊຸກຍູ້ບັນດາກິດຈະກຳໂຄສະນາເຜີຍແຜ່ກ່ຽວກັບສາຍພົວພັນຮ່ວມມືແບບພິເສດລະຫວ່າງ ລາວ-ຫວຽດນາມ ກໍຄືປະເທດຊາດ ແລະ ປະຊາຊົນຂອງແຕ່ລະປະເທດໃຫ້ເຂັ້ມແຂງຂຶ້ນກວ່າເກົ່າ, ຂ່າວສານປະເທດລາວສືບຕໍ່ຊ່ວຍເຫລືອຂ່າວສານຫວຽດນາມຈຳໜ່າຍໜັງສືພິມ ຮູບພາບຫວຽດນາມ (ເປັນພາສາລາວ) ຢູ່ລາວເພື່ອຍົກປະສິດທິຜົນໃນການໂຄສະນາວຽກງານການທູດ, ຂ່າວສານຫວຽດນາມໃຫ້ຄຳໝັ້ນສັນຍາວ່າດ້ວຍຄວາມສາມາດຂອງຕົນເອງຈະສືບຕໍ່ຈັດຕັ້ງປະຕິບັດບັນດາໂຄງການກໍ່ສ້າງ, ຝຶກອົບຮົມແຕ່ລະໄລຍະໃຫ້ເໝາະສົມກັບສະພາບ. ການນຳທັງສອງສຳນັກຂ່າວ ລາວ-ຫວຽດນາມ ມອບໃຫ້ພາກສ່ວນກ່ຽວຂ້ອງຂອງສອງສຳນັກຂ່າວສານສືບຕໍ່ປະສານສົມທົບ ແລະ ເຮັດວຽກນຳກັນ ເພື່ອເອກະພາບບັນດາເນື້ອໃນການຮ່ວມມືຢ່າງລະອຽດ ແລະ ອື່ນໆ.
ພາຍຫລັງສຳເລັດການພົບປະສອງຝ່າຍ, ຄະນະນຳສຳນັກຂ່າວສານປະເທດລາວ ນຳໂດຍສະຫາຍ ສູນທອນ ຄັນທະວົງ ຜູ້ອຳນວຍການໃຫຍ່ສຳນັກຂ່າວສານປະເທດລາວ ໄດ້ເຂົ້າຢ້ຽມຂໍ່ານັບສະຫາຍ ນາງ ຕອງທິຟ໊ອງ ກຳມະການກົມການເມືອງສູນກາງພັກ, ຮອງປະທານຜູ້ປະຈຳການສະພາແຫ່ງຊາດຫວຽດນາມ.
