ຟີລິບປິນປະຕິເສດຮັບເງິນຊ່ວຍເຫລືອຈາກສະຫະພາບເອີຣົບ
ຟີລິບປິນປະຕິເສດຮັບເງິນຊ່ວຍເຫລືອຈາກສະຫະພາບເອີຣົບ (EU), ພາຍຫລັງຖືກວິພາກວິຈານເລື່ອງສົງຄາມການກວາດລ້າງຢາເສບຕິດ. ການຕັດສິນໃຈດັ່ງກ່າວຈະເຮັດໃຫ້ຟີລິບປິນສູນເສຍເງິນຊ່ວຍເຫລືອຈາກສະຫະພາບເອີຣົບ ມູນຄ່າ 250 ລ້ານເອີໂຣ
Franz Jessen ເຈົ້າໜ້າທີ່ການທູດຈາກສະຫະພາບເອີຣົບ ອອກມາເປີດເຜີຍວ່າ: ໄດ້ຮັບການແຈ້ງຂໍ້ມູນຈາກທາງການຟີລິບປິນວ່າ: ລັດຖະບານຟີລິບປິນບໍ່ຕ້ອງການຮັບງົບປະມານສະໜັບສະໜູນຈາກສະຫະພາບເອີຣົບອີກຕໍ່ໄປ ໂດຍທ່ານ Salvador Medialdea ເລຂານຸການບໍລິຫານຈາກທາງການຟີລິບປິນ ໃຫ້ເຫດຜົນວ່າ: ການປະຕິເສດຮັບເງິນຊ່ວຍເຫລືອຈາກສະຫະພາບເອີຣົບເປັນໄປເພື່ອປົກປ້ອງບໍ່ໃຫ້ສະຫະພາບເອີຣົບເຂົ້າມາແຊກແຊງກິດຈະການພາຍໃນ ເພາະການບໍລິຫານພາຍໃນປະເທດຖືເປັນພາລະໜ້າທີ່ຂອງລັດຖະບານເອງ ໂດຍບໍ່ຂຶ້ນກັບຝ່າຍອື່ນໆ.
+ ຟີລິບປິນປະສົບຜົນສຳເລັດໃນການປາບປາມຢາເສບຕິດ
+ ປະຊາຊົນຟີລິບປິນ 78%ພໍໃຈຕໍ່ການປາບປາມຢາເສບຕິດຂອງລັດຖະບານ
ຂະນະທີ່ຫລາຍຝ່າຍຄາດຄະເນວ່າ: ການອອກມາສະແດງຈຸດຢືນຂອງຟີລິບປິນ ອາດຈະມາຈາກຄວາມບໍ່ພໃຈ, ພາຍຫລັງເດືອນມີນາຜ່ານມາ, ສະຫະພາບເອີຣົບວິພາກວິຈານເລື່ອງການລະເມີດສິດທິມະນຸດຢູ່ຟີລິບປິນ ຫລັງມີການດຳເນີນນະໂນຍບາຍກວາດລ້າງຢາເສບຕິດຂອງປະທານາທິບໍດີ ໂຣດຣິໂກ ດູເຕີເຕ ເຊິ່ງເຮັດໃຫ້ມີຜູ້ບໍລິສຸດເສຍຊີວິດ ຫລາຍກວ່າ 8.000 ຄົນ ໂດຍຍັງໄດ້ຮຽກຮ້ອງໃຫ້ຟີລິບປິນຢຸດການກວາດລ້າງຢາເສບຕິດ ໂດຍວິທີການທີ່ໂຫດຮ້າຍ ແລະ ເລັ່ງປ່ອຍທ່ານ Leila de Lima ສະມາຊິກວຸດທິສະພາ ແລະ ນັກວິຈານການເມືອງໃນປະເທດ.
ໂດຍລາຍງານລະບຸວ່າ: ເງິນຊ່ວຍເຫລືອດັ່ງກ່າວຂອງສະຫະພາບເອີຣົບເປັນໄປເພື່ອການສະໜັບສະໜູນການສ້າງຂະບວນການສັນຕິພາບ ຢູ່ເກາະມິນດາເນົາ ທີ່ຕ້ອງຜະເຊີນບັນຫາຄວາມຂັດແຍ່ງລະຫວ່າງຊາວມຸສລິມ ເຊິ່ງເປັນປະຊາກອນສ່ວນຫລາຍໃນພື້ນທີ່ ກັບປະຊາກອນທີ່ນັບຖືສາສະໜາອື່ນໆມາກວ່າ 50 ປີ ຈົນເຮັດໃຫ້ມີຜູ້ເສຍຊີວິດຫລາຍກວ່າ 120.000 ຄົນ ແລະ ຕ້ອງຜະເຊີນສະພາບການເຈີນເຕີບໃຫຍ່ທາງເສດຖະກິດຕໍ່າ.
ການອອກມາສະແດງຈຸດຢືນຂອງຟີລິບປິນ ເກີດຂຶ້ນພຽງບໍ່ດົນພາຍຫລັງສະຫະພາບເອີຣົບປະກາດວ່າ: ຕ້ອງການຮັດແໜ້ນການພົວພັນກັບພາກພື້ນອາຊຽນ ເຮັດໃຫ້ຫລາຍປະເທດກັງວົນວ່າ: ການຕັດສິນໃຈດັ່ງກ່າວຂອງຟີລິບປິນອາດກະທົບການພົວພັນລະຫວ່າງປະເທດອື່ນໆໃນອາຊຽນກັບສະຫະພາບເອີຣົບ.
