ລາວ-ໄທ ຫາລືການແລກປ່ຽນຊື້ຂາຍສິນຄ້າລະຫວ່າງປະເທດ

          ວັນທີ 13 ມີນານີ້, ກົມສົ່ງເສີມການຄ້າລະຫວ່າງປະເທດ, ກະຊວງອຸດສາຫະກຳ ແລະ ການຄ້າ ແລະ ສະພາອຸດສາຫະກຳ, ກະຊວງພານິດ ປະເທດໄທ, ໄດ້ຈັດເຈລະຈາທຸລະກິດການຄ້າລາວ-ໄທ ຂຶ້ນທີ່ນະຄອນຫລວງວຽງຈັນ, ໂດຍມີນັກທຸລະກິດຈາກປະເທດລາວ ແລະ ໄທເຂົ້າຮ່ວມຫລາຍກວ່າ 50 ພາກ ສ່ວນ, ຊຶ່ງການເຈລະຈາຄັ້ງນີ້ ໄດ້ເລືອກເອົານັກທຸລະກິດກ່ຽວກັບເຄື່ອງໃຊ້ໄຟຟ້າ, ເຄື່ອງເອເລັກໂທນິກ ແລະ ສ່ວນປະກອບຍານພາຫະນະ  ມາແລກປ່ຽນ ແລະ ສັ່ງຊື້ສິນຄ້າໂດຍກົງຈາກບໍລິສັດນັ້ນໆ, ໂດຍບໍ່ຈຳເປັນຕ້ອງຜ່ານຜູ້ປະສານງານຄົນກາງຕໍ່ໄປ. ການເຈລະຈາແບບນີ້ຈັດຂຶ້ນຫລາຍນີ້, ໂດຍການໝູນວຽນໄປຕາມປະເທດໃກ້ຄຽງ, ຊຶ່ງໄດ້ເລືອກເອົາປະເພດສິນຄ້າທີ່ແຕກຕ່າງກັນຕາມຄວາມເໝາະສົມ.

ເວທີເຈລະຈາດັ່ງກ່າວ ສະແດງໃຫ້ເຫັນເຖິງສັກກະຍະພາບຂອງຂະແຫນງອຸດສາຫະກຳສອງປະເທດ ໂດຍປະເທດໄທເປັນຖານການຜະລິດສິນຄ້າເຄື່ອງໃຊ້ໄຟຟ້າ ແລະ ອີເລັກໂທນິກແຫ່ງໃຫຍ່ໃນໂລກ, ປັດຈຸບັນໄທເປັນຜູ້ຜະລິດ Hard Disk Drive ອັນດັບທີ 1 ຂອງໂລກ, ຜະລິດເຄື່ອງປັບອາກາດອັນດັບທີ 2 ຂອງໂລກ ແລະ ເປັນຜູ້ຜະລິດຕູ້ເຢັນອັນດັບທີ 4 ຂອງໂລກ, ນອກນັ້ນ ຍັງມີຜະລິດຕະພັນສິນຄ້າອື່ນໆອີກຢ່າງຫລວງຫລາຍ, ໂດຍງານຄັ້ງນີ້ ຈະເປັນຂົວຕໍ່ໃຫ້ກັບງານສະແດງສິນຄ້າ Bangkok RHVAC 2017 ແລະ Bangkok E&E 2017, ທີ່ຈະໄດ້ຈັດຂຶ້ນໃນເດືອນກັນຍາ 2017ນີ້, ທີ່ປະເທດໄທ, ໂດຍເປັນການເປີດເຈລະຈາທຸລະກິດທີ່ຍິ່ງໃຫຍ່ລະດັບອາຊຽນ, ທີ່ມີນັກທຸລະກິດຈາກຫລາຍສາຂາເຂົ້າຮ່ວມເປັນຈຳນວນຫລາຍ.