ປີ 2019 ການບັນຈຸຄູໃໝ່ຕ້ອງຜ່ານການສອບເສັງຕາມຊັ້ນ-ສາຍ ແລະ ລາຍວິຊາໃຫ້ລະອຽດ
ໃນປີ 2019ນີ້, ມາດຕະຖານການບັນຈຸຄູໃໝ່ຕ້ອງຜ່ານການຄັດເລືອກຕາມຊັ້ນ-ສາຍ ແລະ ລາຍວິຊາທີ່ຕ້ອງການ ໃຫ້ລະອຽດເພື່ອເປີດໂອກາດໃຫ້ນັກສຶກສາຄູທີ່ຮຽນຈົບໃໝ່, ຄູອາສາສະໝັກທີ່ມີແລ້ວ ຕາມອັດຕາສ່ວນທີ່ເໝາະສົມ, ໂດຍແມ່ນ ກະຊວງສຶກສາທິການ ແລະ ກິລາ (ສສກ) ເປັນຜູ້ກໍານົດຕາມມາດຕະຖານຂອງການຄັດເລືອກຄູໃໝ່ຂອງແຕ່ລະແຂວງ ແລະ ເມືອງ ເພື່ອໃຫ້ສາມາດຮອງຮັບນັກຮຽນ ແລະ ສອດຄ່ອງກັບສະພາບຄວາມຕ້ອງການຄູຕົວຈິງ.
ສ່ວນພະນັກງານຄູທີ່ເຫລືອຈາກການຊັບຊ້ອນແມ່ນຈະໄດ້ໄປບໍາລຸງຍົກລະ ດັບວິຊາຂອງຕົນໃຫ້ດີ ແລະ ຫລັງຈາກສໍາເລັດການບໍາລຸງຍົກລະດັບເເລ້ວຈຶ່ງຈະພິຈາລະນາຊັບຊ້ອນຕາມແຕ່ລະວິຊາທີ່ຂາດຄູພາຍໃນໂຮງຮຽນ ຫລື ໄປສອນຢູ່ໂຮງຮຽນໃກ້ຄຽງ, ພາຍໃນກຸ່ມໂຮງຮຽນ ແລະ ເມືອງອື່ນໆທີ່ຂາດເຂີນຄູ. ສ່ວນຄູອາສາສະໝັກມາໄດ້ຫລາຍປີ ແຕ່ບໍ່ໄດ້ຮັບການບັນຈຸ ແລະ ມີວິຊາສະເພາະບໍ່ສອດຄ່ອງກັບຄວາມຕ້ອງການແມ່ນໃຫ້ລະດົມໄປບໍາລຸງຍົກລະດັບວິຊາຊີບອື່ນໆ ໃຫ້ສອດຄ່ອງກັບວິຊາສະເພາະທີ່ຮຽນຈົບ, ສ້າງເງື່ອນໄຂ ແລະ ສົ່ງເສີມຄູອາສາສະໝັກ ໄປຊ່ວຍສອນໂຮງຮຽນເອກະຊົນພາກສ່ວນອື່ນທີ່ມີຄວາມຕ້ອງການຄູ ແລະ ແຕ່ລະເເຂວງໃຫ້ມີໂຄງການຄູສອນຕາມພັນທະສັນຍາໃນເຂດຫ່າງໄກສອກຫລີກ ເເລະ ບ່ອນທີ່ຂາດເຂີນຄູ ພາຍໃນກໍານົດ 3-5 ປີ ດ້ວຍການຊັບປ່ຽນໝູນວຽນກັນໄປ ພ້ອມທັງກໍານົດນະໂຍບາຍກ່ຽວກັບແຮງຈູງໃຈບາງດ້ານຄື: ການສະໜອງຫໍພັກຄູ, ການຍົກລະດັບການສຶກສາ, ການຝຶກອົບຮົມ ແລະ ການສົ່ງເສີມຄວາມກ້າວໜ້າຕາມລະບຽບການ ເມື່ອສິ້ນສຸດພັນທະສັນຍາແລ້ວ ການຈັດຕັ້ງຈະໄດ້ຄົ້ນຄວ້າຊັບຊ້ອນຜູ້ກ່ຽວຕາມຄວາມເໝາະສົມ.
ສໍາລັບການແກ້ໄຂບັນຫາຄູເຫລືອ, ຄູບໍ່ພໍ ແລະ ຄູອາສາສະໝັກໃນໄລຍະສັ້ນ ໂດຍມີວິທີການ ແລະ ມາດຕະການຄື: ໄລຍະສັ້ນທີ່ໄດ້ປະຕິບັດໃນໄລຍະຜ່ານມາ ແມ່ນໄດ້ບັນຈຸຊັບຊ້ອນຈໍານວນຕົວເລກລັດຖະກອນໃໝ່ສົກປີ 2017- 2018 ຈໍານວນ 1.850 ຕົວເລກທີ່ລັດຖະບານອະນຸມັດໃຫ້, ໂດຍເນັ້ນໃສ່ຄູອາສາສະໝັກທີ່ສອນມາໄດ້ຫລາຍປີ, ວິຊາທີ່ມີຄວາມຈໍາເປັນ ແລະ ຂາດເຂີນຄູ ເເທ້ ໃນເຂດຫ່າງໄກສອກຫລີກ ໂດຍຜ່ານການສອບເສັງ ແລະ ການປະເມີນປະຈໍາປີ, ໄດ້ອອກຂໍ້ຕົກລົງວ່າດ້ວຍການແຕ່ງຕັ້ງຄະນະຮັບຜິດຊອບຄົ້ນຄວ້າປັບປຸງນິຕິກໍາກ່ຽວກັບການບັນຈຸຊັບບຊ້ອນ, ນໍາໃຊ້ ແລະ ຈັດສັນຄູຂອງຂະແໜງ ການສຶກສາທິການ ແລະ ກິລາ ສະບັບເລກທີ 5341/ສສກ ໄດ້ປັບປຸງນິຕິກໍາກ່ຽວກັບການສ້າງແຜນຄວາມຕ້ອງການຄູປະຈໍາປີ. ສ່ວນຊັ້ນການສຶກສາກ່ອນໄວຮຽນ ແລະ ປະຖົມສຶກສາ ແມ່ນເນັ້ນໃສ່ອັດຕາສ່ວນນັກຮຽນຕໍ່ຄູເປັນຫຼັກ ສໍາລັບຊັ້ນມັດທະຍົມສຶກສາແມ່ນອີງໃສ່ຈໍານວນນັກຮຽນຕໍ່ຫ້ອງ ແລະ ຈໍານວນຊົ່ວໂມງສອນຕໍ່ອາທິດ.
