ຈຳນວນຜູ້ຕິດເຊື້ອໄວຣັສຊິກາຢູ່ກູບາເພີ່ມເກີນ 1.800 ຄົນ
ຮາວານາ 19 ພຶດສະພາ: ສື່ຂອງທາງການກູບາລາຍງານຈຳນວນຜູ້ຕິດເຊື້ອໄວຣັສຊິກາໃນປະເທດເພີ່ມສູງຂຶ້ນເກີນ 1.800 ຄົນ, ແຕ່ຍັງໜ້ອຍເມື່ອທຽບໃສ່ປະເທດອື່ນໃນເຂດທະເລກາລິບຽນ.
ສື່ຂອງທາງການລາຍງານ, ຈຳນວນຜູ້ຕິດເຊື້ອໄວຣັສຊິກາໃນປີ 2016 ຮອດຕົ້ນປີ 2017 ມີປະມານ 1.850 ຄົນ, ຂະນະທີ່ເຈົ້າໜ້າທີ່ດ້ານການປ້ອງກັນໄພຝ່າຍພົນລະເຮືອນເປີດເຜີຍວ່າ: ພື້ນທີ່ພົບຜູ້ຕິດເຊື້ອຫລາຍທີ່ສຸດໄດ້ແກ່ແຂວງຮາວານາ, ແຂວງກວນຕານາໂມ ແລະ ແຂວງຊຽນຟວຍໂກສ. ກ່ອນໜ້ານີ້, ທາງການກູບາບໍ່ມີການລາຍງານຈຳນວນຜູ້ຕິດເຊື້ອໄວຣັສຊິກາໃນປະເທດໃນຫລາຍເດືອນຜ່ານມາ ໂດຍເທື່ອຫລ້າສຸດມີລາຍງານພົບຜູ້ຕິດເຊື້ອພາຍໃນປະເທດພຽງ 3 ຄົນໃນປີຜ່ານມາ.
ເຖິງຢ່າງໃດກໍດີ, ຈຳນວນຜູ້ຕິດເຊື້ອໄວຣັສຊິກາຢູ່ກູບາຍັງຢູ່ລະດັບຕໍ່າກວ່າພື້ນທີ່ອື່ນໆ ຢູ່ເຂດທະເລກາລິບຽນ ໂດຍຫລ້າສຸດລັດເປີໂຕຣິໂກຂອງອາເມລິກາລາຍງານຈຳນວນຜູ້ຕິດເຊື້ອໄວຣັສຊິກາເພີ່ມສູງເຖິງ 40.000 ຄົນ.
