ເປີດງານວາງສະແດງຜະລິດຕະພັນເຟີນີເຈີລາວຄັ້ງທີ 5
ງານວາງສະແດງຜະລິດຕະພັນເຟີນີເຈີລາວຄັ້ງທີ 5
ໄດ້ເປີດຂຶ້ນຢ່າງຄຶກຄື້ນໃນວັນທີ 14 ມັງກອນນີ້,ຢູ່ສູນການຄ້າລາວໄອເຕັກນະຄອນຫລວງວຽງຈັນ, ໂດຍການເຂົ້າຮ່ວມຂອງທ່ານພັນທອງພິດທຸມມາຮອງລັດຖະມົນຕີກະຊວງອຸດສາຫະກຳ ແລະການຄ້າ, ພ້ອມດ້ວຍຜູ້ປະກອບການທັງພາຍໃນ ແລະຕ່າງປະເທດເຂົ້າຮ່ວມເປັນຈໍານວນຫລາຍ.
ງານວາງສະແດງຜະລິດຕະພັນເຟີນີເຈີໄມ້ລາວໄດ້ຈັດໃນທຸກໆປີ, ເພື່ອເປັນການໂຄສະນາສິນຄ້າໄມ້ລາວແລະທັງເປັນການແລກປ່ຽນບົດຮຽນ ແລະປະສົບການດ້ວຍກັນຂອງບັນດາຫົວໜ່ວຍການຜະລິດເຟີນີເຈີເພື່ອສົ່ງເສີມໃຫ້ ຜະລິດຕະພັນໄມ້ລາວເປັນທີ່ຮັບຮູ້ຢ່າງກວ້າງຂວາງຂອງສັງຄົມ, ພ້ອມທັງເປັນການສົ່ງເສີມຫົວຄິດປະດິດສ້າງແລະສີມືນາຍຊ່າງໃຫ້ມີຄວາມຊຳນິຊຳນານ ແລະຄວາມປານີດສາມາດແຂ່ງຂັນກັບພາຍນອກໄດ້.
ທ່ານກອງມາລາພົມມາໄລຮອງປະທານສະມາຄົມເຟີນີເຈີລາວ ໃຫ້ຮູ້ວ່າ: ງານວາງສະແດງຄັ້ງນີ້ມີຫົວໜ່ວຍທຸລະກິດເຂົ້າຮ່ວມ 177 ຫ້ອງມາວາງສະແດງ, ໃນນັ້ນມີສິນຄ້າໂອດ໋ອບ, ຈາກຕ່າງແຂວງ ແລະບັນດາປະເທດໃກ້ຄຽງມາຮ່ວມວາງສະແດງນຳດ້ວຍ, ຄາດວ່າຈະມີຜູ້ເຂົ້າຮ່ວມຊົມຫລາຍກ່ວາ 2ແສນຄົນ ແລະມີມູນຄ່າການຊື້-ຂາຍສິນຄ້າສູງປະມານ 14 ຕື້ກວ່າກີບ.
