ກຽມສະເຫລີມສະຫລອງວັນສ້າງຕັ້ງກອງທັບຄົບຮອບ 70 ປີໃຫ້ຄຶກຄື້ນ
ໃນວັນທີ 14 ມັງກອນນີ້ທີ່ວິທະຍາຄານກົມມະດຳ (ນ້ຳຊ່ວງ) ເມືອງໂພນໂຮງ ແຂວງວຽງຈັນ ໄດ້ມີການຝຶກແອບສະແດງທົດລອງເປັນຄັ້ງທໍາອິດກ່ຽວກັບການກະກຽມຄວາມພ້ອມໃຫ້ແກ່ການສະເຫລີມສະຫລອງວັນສ້າງຕັ້ງກອງທັບປະຊາຊົນລາວຄົບຮອບ 70 ປີ (20ມັງກອນ1949-20ມັງກອນ2019)ໃຫ້ມີບັນຍາກາດຟົດຟື້ນ,ໂດຍມີທ່ານ ພັນຄໍາ ວິພາວັນ ຮອງປະທານປະເທດແຫ່ງສປປ ລາວ, ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ, ທ່ານພົນເອກ ຈັນສະໝອນ ຈັນຍາລາດ ລັດຖະມົນຕີີກະຊວງປອ້ງກັນປະເທດ, ມີພະນັກງານອາວຸໂສບໍານານ, ບັນດານາຍ ແລະ ພົນທະຫານ, ພ້ອມດ້ວຍມວນຊົນແລະນັກສະແດງເຂົ້າຮ່ວມຢ່າງຫລວງຫລາຍ.
ການສະແດງທົດລອງຄັ້ງນີ້, ໄດ້ເລີ່ມດວ້ຍການສະແດງສິລະປະວັນນະຄະດີ, ການສະແດງ ກອ້ນກໍາລັງຫັດກາຍມວຍ ຂອງເຫລົ່າຮົບຕີພິເສດ ແລະເຫລົ່າຮົບສືບຂ່າວ, ການສະແດງມວຍຕໍ່ສູ້ຊາຍ-ຍິງ, ພ້ອມນີ້ ຍັງມີການສະແດງເດີນສວນສະໜາມຂອງກອ້ນກໍາລັງພົນຕ່າງໆເຊັ່ນ: ຂະບວນພະນັກງານປະຕິວັດອາວຸໂສ, ຈຸທຸງໄຊກອງທັບປະຊາຊົນລາວ, ກ້ອນກອງທັບອິດສະຫລະ, ກ້ອນກຳລັງກອງທັບປົດປ່ອຍ, ກ້ອນກຳລັງເພດຍິງ 369, ນາຍທະຫານບົກ, ນາຍທະຫານອາກາດ, ນາຍທະຫານຊາຍແດນ, ນາຍທະຫານຮາບ, ທະຫານຕີພິເສດ, ທະຫານລົດຕັງ-ຍານເກາະ, ທະຫານປືນໃຫຍ່ໜ້າດິນ, ທະຫານປ້ອງກັນອາກາດ, ທະຫານຊ່າງແສງ, ທະຫານສື່ສານ, ທະຫານແພດເພດຍິງ, ທະຫານທ້ອງຖິ່ນ, ກຳລັງກອງຫລອນ ແລະ ກຳລັງປ້ອງກັນຕົວ.ນອກນີ້ຍັງມີຂະບວນພາຫານະອາວຸດຈາກເຫລົ່າຮົບຕ່າງໆຄື: ຂະບວນລົດທະຫານຮາບຍານເກາະ, ຂະບວນເຫລົ່າຮົບລົດຕັງ-ຍານເກາະ, ຂະບວນເຫລົ່າຮົບປືນໃຫຍ່ໜ້າດິນ, ເຫລົ່າຮົບປ້ອງກັນອາກາດ, ເຫລົ່າຮົບຊ່າງແສງແລະອື່ນໆອີກ.
ກອງທັບປະຊາຊົນລາວ ມີນໍ້າໃຈຕໍ່ສູ້ພິລະອາດຫານ ກ້າແກ່ນໜຽວແໜ້ນ ມີໄຫວພິບ ແລະ ປະດິດສ້າງ ໃນເບື້ອງຕົ້ນມີກໍາລັງບໍ່ເທົ່າໃດຄົນ ເຊິ່ງໄດ້ປະກອບອາວຸດປະຖົມປະຖານ, ແຕ່ພາຍໃຕ້ການນໍາພາຂອງພັກ ກອງທັບໄດ້ຮັບການກໍ່ສ້າງແລະປັບປຸງໃຫ້ເຕີບໃຫ່ຍຂະຫຍາຍຕົວທັງປະລິມານແລະຄຸນນະພາບຢ່າງບໍ່ຢຸດຢັ້ງ ມີຄວາມອົງອາດກ້າຫານ ບໍ່ຫວັ່ນໄຫວຄອນແຄນຕໍ່ຄວາມລໍາບາກທຸລະກັນດານໃດໆ ຍິ່ງຕີຍິ່ງກໍຍິ່ງໄດ້ຮັບໄຊຊະນະ ຍິ່ງສູ້ຮົບກໍຍິ່ງເຕີບໃຫ່ຍເຂັ້ມແຂງ. ຜ່ານໄລຍະຕໍ່ສູ້ກູ້ຊາດ ຕ້ານຈັກກະພັດຜູ້ຮຸກຮານອັນ ຍືດເຍື້ອຍາວນານ ໄດ້ເກີດມີບັນດານັກຮົບດີເດັ່ນ, ນັກຮົບແຂ່ງຂັນ ແລະ ວິລະຊົນ ເຊິ່ງລວ້ນແຕ່ໄດ້ສັງກັດຢູ່ໃນກໍາລັງທະຫານຫລວງ ທະຫານທອ້ງຖິ່ນ ແລະ ກອງຫລອນ, ມີກໍາລັງເພດຍິງແລະເພດຊາຍຢ່າງຫລວງ ຫລາຍ.
