ໂລຄີນຢີວ ຄວ້າແຊ້ມດອກປີກໄກ່ Thailand Masters 2019
ການແຂ່ງຂັນດອກປີກໄກ່ ລາຍການ ໄທແລນ ມາສເຕີ້ 2019 (Badminton Thailand Masters 2019) ລາຍການລະດັບ ຊຸບເປີ້ 300 ຊີງເງິນລາງວັນລວມ 150.000 ໂດລາ ແຂ່ງຂັນທີ່ສະໜາມອິນດໍຫົວໝາກ ນະຄອນຫລວງບາງກອກ ປະເທດໄທ ໃນວັນທີ 8-13 ມັງກອນ 2019.
ປະເພດຊາຍດ່ຽວຮອບຊີງ ໂລຄີນຢິວ ມື 125 ໂລກ ອາຍຸ 21 ປີ ຈາກສິງກະໂປ ເປັນນັກກິລາທີ່ມາຈາກຮອບຄັດເລືອກ ຊະນະ ຫລິນຕັ່ນ ອະດີດມື 1 ຂອງໂລກ ເປັນມື 13 ໂລກປັດຈຸບັນ ແລະ ເປັນມື 1 ຂອງລາຍການ ອາຍຸ 35 ປີ ຈາກ ສປ ຈີນ 2-0 ເຊັດ: 19-21, 18-21. ໂລຄີນຢີວ ຄວ້າແຊ້ມລະດັບ BWF World Tour ເປັນລາຍການທຳອິດ ຮັບເງິນລາງວັນຊະນະເລີດ 11.250 ໂດລາ ພ້ອມຄະແນນສະສົມ 7.000 ຄະແນນ, ສ່ວນ ຫລິນຕັ່ນ ຮອງແຊ້ມຮັບເງິນລາງວັນ 5.700 ໂດລາ ພ້ອມຄະແນນສະສົມ 5.950 ຄະແນນ.
ປະເພດຍິງດ່ຽວ ຟີເຕຣຍນີ້ ມື 33 ໂລກ ຈາກອິນໂດເນເຊຍ ຊະນະ ບຸດສະນັນ ອຶງບຳລຸງພັນ ມື 29 ໂລກ, ມື 8 ຂອງລາຍການ ແຊ້ມປີ 2017 ຈາກເຈົ້າພາບໄທ 2-0 ເຊັດ: 21-12, 21-14 ຄວ້າແຊ້ມ BWF World Tour ເປັນຄັ້ງທຳອິດ ຮັບເງິນລາງວັນຊະນະເລີດ 11.250 ໂດລາ ພ້ອມຄະແນນສະສົມ 7.000 ຄະແນນ, ສ່ວນ ບຸດສະນັນ ອຶງບຳລຸງພັນ ຮອງແຊ້ມຮັບເງິນລາງວັນ 5.700 ໂດລາ ພ້ອມຄະແນນສະສົມ 5.950 ຄະແນນ.
ສ່ວນປະເພດຄູ່ຊາຍ ແຊ້ມເປັນຄູ່ຈາກມາເລເຊຍ Goh V Shem ແລະ Tan Wee King ຄູ່ມື 14 ໂລກ, ມື 1 ຂອງລາຍການ ຊະນະ Lu Ching-yao ແລະ Yang Po-han ຄູ່ມື 26 ໂລກ, ຄູ່ມື 5 ຂອງລາຍການຈາກຮົງກົງ 2-0 ເຊັດ: 21-1, 21-17 ຮັບເງິນລາງວັນຊະນະເລີດ 11.850 ໂດລາ ພ້ອມຄະແນນສະສົມ 7.000 ຄະແນນ, ສ່ວນຮອງແຊ້ມຮັບເງິນລາງວັນ 5.700 ໂດລາ ພ້ອມຄະແນນສະສົມ 5.950 ຄະແນນ.
ປະເພດຍິງຄູ່ແຊ້ມເປັນຂອງ ພຸດທິຕາ ສຸພະຈິຣະກູລ ແລະ ຊັບສິຣິ ແຕ້ຣັດຕະນະໄຊ ຄູ່ມື 87 ໂລກ ຈາກເຈົ້າພາບໄທ ຊະນະ Li Wenmei ແລະ Zheng Yu ຄູ່ມື 5 ຂອງລາຍການ ທີ່ຫລິ້ນຄູ່ກັນເປັນຄັ້ງທຳອິດ ຈາກ ສປ ຈີນ 2-1 ເຊັດ: 15-21, 21-15 ແລະ 21-10. ພຸດທິຕາ ສຸພະຈິຣະກູລ ແລະ ຊັບສິຣິ ແຕ້ຣັດຕະນະໄຊ ຮັບເງິນລາງວັນ 11.850 ໂດລາ ພ້ອມຄະແນນສະສົມ 7.000 ຄະແນນ, ສ່ວນ Li Wenmei ແລະ Zheng Yu ຮອງແຊ້ມຮັບເງິນລາງວັນ 5.700 ໂດລາ ພ້ອມຄະແນນສະສົມ 5.950 ຄະແນນ.
ປະເພດຄູ່ປະສົມ Chan Peng Soon ແລະ Goh Liu Ying ມື 6 ຂອງໂລກ, ມື 1 ຂອງລາຍການ ຈາກມາເລເຊຍ ຊະນະ ເດດຊະພົນ ພົວວາຣານຸເຄາະ ແລະ ຊັບສິຣິ ແຕ້ຣັດຕະນະໄຊ ມື 5 ຂອງໂລກ, ມື 2 ຂອງລາຍການ ຈາກເຈົ້າພາບໄທ 2-0 ເຊັດ: 21-16, 21-15 ຮັບເງິນລາງວັນ 11.850 ໂດລາ ພ້ອມຄະແນນສະສົມ 7.000 ຄະແນນ, ສ່ວນ ເດດຊະພົລ ພົວວາຣານຸເຄາະ ແລະ ຊັບສິຣິ ແຕ້ຣັດຕະນະໄຊ ຮອງແຊ້ມຮັບເງິນລາງວັນ 5.700 ໂດລາ ພ້ອມຄະແນນສະສົມ 5.950 ຄະແນນ.
