ສະພາພິຈາລະນາ ແລະ ຮັບຮອງເອົາຮ່າງມະຕິວ່າດ້ວຍການ ຄຸ້ມຄອງລາຄາສິນຄ້າ, ຄ່າບໍລິການ ແລະ ມາດຕະການແກ້ໄຂ

ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ VIII ໃນເຊົ້າວັນທີ 18 ພຶດສະພານີ້, ໄດ້ພ້ອມກັນຄົ້ນຄວ້າປະກອບຄຳເຫັນໃສ່ຮ່າງມະຕິວ່າດ້ວຍການຄຸ້ມຄອງລາຄາສິນຄ້າ, ຄ່າບໍລິການ ແລະ ມາດຕະການແກ້ໄຂ, ເພື່ອຫລຸດຜ່ອນຜົນກະທົບຕໍ່ການຜະລິດ ແລະ ການດຳລົງຊີວິດຂອງປະຊາຊົນ, ຈາກການສະເໜີຂອງທ່ານນາງ ສວນສະຫວັນ ວິຍະເກດກຳມະການຄະນະປະຈຳສະພາແຫ່ງຊາດ, ເລຂາທິການສະພາແຫ່ງຊາດວ່າ: ຜ່ານການຄົ້ນຄ້ວາ ແລະ ປະກອບຄຳເຫັນຂອງສະມາຊິກສະພາແຫ່ງຊາດຢ່າງເລິກເຊິ່ງຕໍ່ບົດລາຍຂອງລັດຖະບານທີ່ສະເໜີໂດຍກະຊວງອຸດສາຫະກຳ ແລະ ການຄ້າ ກ່ຽວກັບວຽກງານຄຸ້ມຄອງລາຄາສິນຄ້າ ແລະ ມາດຕະການແກ້ໄຂຈຳນວນໜຶ່ງ ເພື່ອຫລຸດຜ່ອນຜົນກະທົບຕໍ່ການຜະລິດ ແລະ ການດຳລົງຊີວິດຂອງປະຊາຊົນ ໃນວັນທີ 27 ເມສາຜ່ານມານີ້, ເຫັນວ່າກອງປະຊຸມໄດ້ຕົກລົງ ຮັບຮອງເອົາບົດລາຍງານຂອງລັດຖະບານກ່ຽວກັບການຄຸ້ມຄອງລາຄາສິນຄ້າ, ຄ່າບໍລິການ ແລະ ມາດຕະການແກ້ໄຂ ເພື່ອຫລຸດຜ່ອນຜົນກະທົບຕໍ່ການຜະລິດ ແລະ ການດຳລົງຊີວິດຂອງປະຊາຊົນ, ພ້ອມທັງສະແດງຄວາມຊົມເຊີຍຕໍ່ລັດຖະບານທີ່ໄດ້ເອົາໃຈໃສ່ໃນການຄຸ້ມຄອງລາຄາສິນຄ້າ ທີ່ກະທົບໄວຕໍ່ການຜະລິດ ແລະ ຊີວິດການເປັນຢູ່ຂອງປະຊາຊົນ ເຮັດໃຫ້ລາຄາສິນຄ້າອຸປະໂພກ-ບໍລິໂພກ ພາຍໃນປະເທດມີຄວາມສະຫງົບໂດຍພື້ນຖານ, ເຮັດໃຫ້ອັດຕາເງິນເຟີ້, ອັດຕາແລກ ປ່ຽນຢູ່ໃນເກນປົກກະຕິ, ຊີວິດການເປັນຢູ່ຂອງປະຊາຊົນໂດຍທົ່ວໄປມີຄວາມສະຫງົບໂດຍພື້ນຖານ, ພ້ອມນີ້ ກອງປະຊຸມຍັງເຫັນວ່າ ບັນດານິຕິກຳ ແລະ ມາດຕະການຕ່າງໆ ທີ່ລັດຖະບານໄດ້ອອກກຳນົດອອກຜ່ານມານັ້ນ ຍັງບໍ່ທັນຄົບຖວ້ນ, ຮັດກຸມ ແລະ ມາດຕະການໃນການຈັດຕັ້ງປະຕິບັດຜ່ານມາບໍ່ທັນເຂັ້ມງວດ ແລະ ບໍ່ມີປະສິດທິພາບສູງເທົ່າທີ່ຄວນ, ລາຄາສິນຄ້າສະບຽບອາຫານບາງປະເພດ ມີການເໜັງຕີງ ແລະ ມີລາຄາແພງກວ່າປະເທດໃກ້ຄຽງ, ການວາງນະໂຍບາຍສົ່ງເສີມ ກໍຄືຄວາມສາມາດໃນການດັດສົມລາຄາສິນຄ້າທີ່ຈຳເປັນຂອງລັດຍັງບໍ່ທັນພຽງພໍ, ຊັກຊ້າ, ແກ່ຍາວ ເຮັດໃຫ້ມີຜົນກະທົບໂດຍກົງຕໍການຜະລິດ ແລະ ການດຳລົງຊີວິດຂອງພະນັກງານ, ທະຫານ, ຕຳຫລວດ ແລະ ປະຊາຊົນຜູ້ທີ່ມີລາຍໄດ້ໜ້ອຍ. ພ້ອມທັງປະຕິບັດມາດຕະການຢ່າງເຂັ້ມງວດຕໍ່ຜູ້ນຳເຂົ້າ ແລະ ຕໍ່ຜູ້ຄ້າຂາຍທີ່ບໍ່ຖືກຕ້ອງ, ຄ້າຂາຍ ເຖື່ອນ ແລະ ຄ້າຂາຍນອກລະບົບ, ສິນຄ້າສະບຽງອາຫານ, ຢາປົວພະຍາດ, ສິນຄ້າທີ່ບໍ່ມີສະຫຼາກ ແລະ ຜູ້ສວຍໂອກາດຂຶ້ນລາຄາສິນຄ້າໂດຍລຳພັງ, ບໍ່ໃຫ້ ນຳເຂົ້າຊີ້ນ, ເຄື່ອງໃນສັດ, ປາ, ໄຂ່, ສິ້ນສ່ວນສັດປີກ, ອາຫານທະເລ, ຢາປົວ ພະຍາດ, ເຄື່ອງສຳອາງ, ອາຫານເສີມສຳເລັດຮູບ ແລະ ອຸປະກອນການແພດ ເພື່ອເປົ້າໝາຍທາງການຄ້າ, ໂດຍບໍ່ໄດ້ຜ່ານບໍລິສັດຂາເຂົ້າ – ຂາອອກທີ່ໄດ້ຮັບ ອະນຸຍາດຖືກຕ້ອງຕາມກົດໝາຍ ແລະ ໃນຕອນທ້າຍ ບັນດາສະມາຊິກສະພາແຫ່ງຊາດ ໄດ້ລົງຄະແນນສຽງຮັບຮອງເອົາຮ່າງມະຕິດັ່ງກ່າວດ້ວຍສຽງສ່ວນຫລາຍ.