ຄົນຈ່ອຍຜອມກໍສາມາດມີໄຂມັນໃນເລືອດສູງໄດ້
ຕ້ອງໄຈ້ແຍກໃຫ້ອອກວ່າ ໄຂມັນສ່ວນເກີນທີ່ຢູ່ໃນຊັ້ນໃຕ້ຜິວໜັງ ກັບໄຂມັນທີ່ຢູ່ໃນເລືອດ ເປັນໄຂມັນຄົນພາກສ່ວນກັນ. ດັ່ງນັ້ນ ຄົນທີ່ມີຮູບຮ່າງຕຸ້ຍອວບອາດຈະບໍ່ຈຳເປັນຕ້ອງມີໄຂມັນໃນເລືອດສູງ, ໃນຂະນະດຽວກັນຜູ້ທີ່ມີຮູບຮ່າງຈ່ອຍຜອມເຖິງຈະບໍ່ມີໄຂມັນຢູ່ຊັ້ນໃຕ້ຜິວໜັງ, ແຕ່ກໍອາດມີໄຂມັນໃນເລືອດສູງໄດ້ຄືກັນ.
ຄວາມຈິງແລ້ວໄຂມັນໃນຮ່າງກາຍຂອງເຮົາມາຈາກທັງອາຫານການກິນ ໂດຍສະເພາະອາຫານມັນໆ ແລະ ອີກສ່ວນໜຶ່ງກໍ ມາຈາກການສັງເຄາະໃນຮ່າງກາຍຂອງເຮົາເອງ. ໄຂມັນໃນຮ່າງກາຍບໍ່ໄດ້ມີແຕ່ໂທດທີ່ເຮົາຈະຕ້ອງກຳຈັດມັນອອກໄປພຽງຢ່າງ ດຽວ, ແຕ່ໄຂມັນກໍມີໜ້າທີ່ສຳຄັນ ໂດຍການຖືກເອົາໄປໃຊ້ເພື່ອສ້າງຮໍໂມນ, ເອົາໄປສ້າງນຳ້ບີເພື່ອຊ່ວຍໃນການດູດຊຶມອາຫານທີ່ມີໄຂມັນ ແລະ ຖືກເອົາໄປໃຊ້ໃນການສ້າງເນື້ອເຍື່ອຂອງແຊນຕ່າງໆໃນຮ່າງກາຍ. ໄຂມັນໃນເລືອດຈະຢູ່ໃນຮູບແບບຂອງໄລໂປໂປຣຕິນ ທີ່ປະກອບໄປດ້ວຍໂປຣຕິນ ແລະ ໄຂມັນ ໂດຍໃນພາກສ່ວນຂອງໄຂມັນກໍມີທັງຄໍເລສເຕີໂຣນ,ໄຕຣກລີເຊີໄຣ, ຟົສຟໍລິປິດ ແລະ ກົດໄຂມັນອິດສະຫລະ ເຊິ່ງລ້ວນແຕ່ມີປະໂຫຍດຕໍ່ຮ່າງກາຍຕໍ່ການເອົາໄປສ້າງນຳ້ບີເພື່ອຊ່ວຍດູດຊຶມອາຫານທີ່ມີໄຂມັນ ເປັນແຫລ່ງພະລັງງານທ່ີສະສົມເອົາໄວ້ໃນຮ່າງກາຍ ແລະ ເປັນສ່ວນປະກອບສຳຄັນຂອງເນື້ອເຍື່ອໃນຮ່າງກາຍ. ແຕ່ການສົ່ງເສີມໃຫ້ຫລຸດການກິນອາຫານປະເພດໄຂມັນສູງ ກໍເພື່ອຫລຸດປະລິມານຄໍໍເລສເຕີໂຣນ ກໍຍ້ອນການມີປະລິມານໄຂມັນໃນເລືອດຫລາຍເກີນໄປ ອາດເຮັດໃຫ້ຮ່າງກາຍເຮັດວຽກຜິດປົກກະຕິ ຫລື ເປັນພະຍາດໄດ້ນັ້ນເອງ. ຖ້າໃຜທີ່ມີໄຂມັນໃນເລືອດສູງຈະມີຄວາມສ່ຽງຕໍ່ພະຍາດຄວາມດັນເລືອດສູງ, ເບົາຫວານ, ພະຍາດຫລອດເລືອດແຂງໂຕ ເຊິ່ງນຳໄປສູ່ພະຍາດຫົວໃຈຂາດເລືອດ ແລະພະຍາດອື່ນໆທີ່ອາດຕາມມາໃນພາຍຫລັງ.
ໄຂມັນໃນເລືອດບໍ່ສາມາດສັງເກດເຫັນໄດ້ໂດຍຕາເປົ່າ ຈະຕ້ອງໄດ້ຮັບການກວດຢູ່ໂຮງໝໍເທົ່ານັ້ນ ແຕ່ໄຂມັນໃນຜົ້ງທ້ອງ ແລະ ໄຂມັນໃຕ້ຊັ້ນຜິວໜັງສາມາດສັງເກດໄດ້ຈາກຜູ້ທີ່ມີຮູບຮ່າງຕຸ້ຍເກີນລະດັບມາດຕະຖານ. ດັ່ງນັ້ນ ນອກຈາກເຮົາຕ້ອງເອົາໃຈໃສ່ໃນຮູບຮ່າງໃຫ້ໄດ້ມາດຕະຖານເພື່ອໃຫ້ມີຮູບຮ່າງງາມພາຍນອກແລ້ວ ເຮົາຍັງຕ້ອງຮັກສາລະດັບໄຂມັນໃນເລືອດ ໂດຍການກິນອາຫານທີ່ມີໄຂມັນທີ່ດີຢ່າງເໝາະສົມ ແລະ ຄວບຄຸມບໍ່ໃຫ້ກິນອາຫານທີ່ມີໄຂມັນບໍ່ດີຕໍ່ຮ່າງກາຍຫລາຍເກີນໄປ ທ່ານຈຶ່ງຈະໄດ້ສຸຂະພາບທີ່ດີ ທັງພາຍນອກ ແລະ ພາຍໃນ.
