ນ້ຳຖ້ວມເມືອງແມ່ນບັນຫາບໍ່ໄກຕົວ
ສອງ-ສາມມື້ມານີ້ ຢູ່ນະຄອນຫລວງວຽງຈັນໄດ້ມີສະພາບຝົນຕົກໜັກ ແລະ ຕົກເປັນໄລຍະຍາວ ໂດຍສະເພາະວານນີ້ (18 ພຶດສະພາ) ອັນໄດ້ເຮັດໃຫ້ເສັ້ນທາງຫລາຍສາຍ ແລະ ເຂດພື້ນທີ່ຕໍ່າຢູ່ໃຈກາງນະຄອນຫລວງຖືກນ້ຳຖ້ວມ ແລະ ອັ່ງຂັງເປັນເວລາຍາວ ແລະ ຮ້າຍແຮງທີ່ສຸດອາດແມ່ນຢູ່ບໍລິເວນເສັ້ນທາງຕັດໃໝ່ໂພນສີນວນ. ຜູ້ເຫັນເຫດການຫລາຍຄົນໃຫ້ຮູ້ວ່າ: ນ້ຳຖ້ວມເຂດເສັ້ນທາງດັ່ງກ່າວແກ່ຍາວມາແຕ່ທ່ຽງວັນຈົນຮອດແລງ ໄດ້ສົ່ງຜົນໃຫ້ການສັນຈອນໄປມາຖືກຕັດຂາດເປັນຫລາຍຊົ່ວໂມງ ຍ້ອນມີສະພາບອຸປະຕິເຫດ ແລະ ລົດຫລາຍຄັນຕາຍຄາກາງທາງ ແລະ ກໍຍັງມີຫລາຍເສັ້ນທາງອື່ນໆອີກກໍຕົກຢູ່ໃນສະພາບດັ່ງກ່າວ ຍ້ອນຄອງລະບາຍນ້ຳບໍ່ສາມາດເຮັດວຽກລະບາຍນ້ຳໄດ້ທ່ວງທັນ ແລະ ສ່ວນໜຶ່ງກໍແມ່ນເກີດຈາກສະພາບຖົມດິນຖົມດອນທີ່ຂາດການຄຸ້ມຄອງ. ດັ່ງຂ່າວ ລາວພັດທະນາພວກເຮົາໄດ້ອອກມາຕັກເຕືອນຢ່າງລຽນຕິດ ເພື່ອໃຫ້ຂະແໜງການກ່ຽວຂ້ອງມີວິທີການຄຸ້ມຄອງ ແລະ ແກ້ໄຂໃຫ້ມີປະສິດທິຜົນ ເພື່ອບໍ່ໃຫ້ຜົນຮ້າຍຂອງສະພາບນ້ຳຖ້ວມດັ່ງນີ້ເກີດຂຶ້ນ, ແຕ່ແລ້ວ ສະພາບດັ່ງກ່າວກໍຍັງບໍ່ທັນໄດ້ຮັບການແກ້ໄຂ ແລະ ຫວັງວ່າສະພາບນ້ຳຖ້ວມແຮງໃນມື້ວານນີ້ອາດເປັນບົດຮຽນທີ່ດີໃຫ້ແກ່ນະຄອນຫວງວຽງຈັນ ເພື່ອຫາວິທີການແກ້ໄຂໃຫ້ຕົກ.
