ສຳເລັດແລ້ວ ຢາຄຸມເພດຊາຍ ຫລຸດລະດັບຮໍໂມນການຜະລິດອະສຸຈິ
ສຳນັກຂ່າວຕ່າງປະເທດ Scienewsຂອງສະຫະລັດອາເມລິກາ ລາຍງານຂ່າວທີ່ໜ້າສົນໃຈ ໂດຍລະບຸວ່າ : ນັກວິທະຍາ ສາດສະຫະລັດໄດ້ທົດລອງໃຊ້ແຄັບຊູນແບບກິນເພື່ອໃຊ້ໃນການຂັດຂວາງຮໍໂມນການຈະເລີນພັນໃນເພດຊາຍໄດ້ເປັນຜົນສຳເລັດ ເຊິ່ງຢາແຄັບຊູນດັ່ງກ່າວເປັນຢາເມັດຊະນິດໃໝ່ທີ່ຊື່ວ່າ : dimethandroloneundecanoateຫລື DMAU ທີ່ທົດລອງກັບກຸ່ມ ເພດຊາຍໃນໄວຈະເລີນພັນ 83 ຄົນ.
ຢາດັ່ງກ່າວເປັນຢາທີ່ຫລຸດລະດັບຮໍໂມນເພດຊາຍທີ່ຈຳເປັນຕໍ່ການຜະລິດອະສຸຈິ ໂດຍຫລັງການທົດລອງໃນໄລຍະເວລາ 1 ເດືອນ ກຸ່ມທົດລອງທັງ 83 ຄົນບໍ່ມີຜົນຂ້າງຄຽງໃດໆຈາກຜົນກະທົບທີ່ເຮັດໃຫ້ຮໍໂມນໃນພາກສ່ວນຜະລິດອະສຸຈິຫລຸດລົງ ທັງນີ້ ຜົນສຳເລັດດັ່ງກ່າວຈະມີການລາຍງານຕໍ່ກອງປະຊຸມປະຈຳປີຂອງສະມາຄົມຕ່ອມບໍ່ມີທໍ່ໃນວັນທີ 08 ມີນາ 2019 ນີ້.
ຢາດັ່ງກ່າວຈະຄວບຄຸມລະດັບຮໍໂມນທ່ີຜະລິດອະສຸຈິ ຊື່ວ່າຮໍໂມນ ລູທີນນິ່ງຊິງ ແລະ ຮໍໂມນກະຕຸ້ນຮູຂຸມຂົນ ເຊິ່ງຈະຢຸດອັນທະຈາກການສ້າງຮໍໂມນເທສໂທສເຕີໂຣນ ແລະ ອະສຸຈິ ແລະ ເມື່ອຢຸດໃຊ້ຢາ ຮ່າງກາຍຂອງຜູ້ຊາຍກໍຈະກັບໄປຜະລິດຮໍໂມນການສືບພັນ ແລະ ສະພາບການຈະເລີນພັນກໍຈະກັບມາເປັນປົກກະຕິຄືເກົ່າໄດ້.
ຜົນການທົດລອງຍັງລະບຸຕື່ມວ່າ : ຢາ DAMU ຈະຂັດຂວາງຮໍໂມນເທສໂທສເຕີໂຣນ, ແຕ່ກໍບໍ່ໄດ້ຢູ່ໃນເລືອດຫລາຍປານໃດ ຈຶ່ງສາມາດກັບຄືນສູ່ສະພາບປົກກະຕິໄດ້ ແລະ ຜົນການທົດລອງຢາຍັງບໍ່ມີຜົນກະທົບຕໍ່ການເຮັດວຽກຂອງຕັບ. ການທົດລອງໃຊ້ 28 ມື້ ແລະ ມີຜົນຂ້າງຄຽງເລັກນ້ອຍ, ແຕ່ມີຜົນໄປເຖິງຄ່າຄໍເລສເຕີໂຣນທີ່ຫລຸດລົງ ແຕ່ມີຄວາມໜາແໜ້ນສູງ. ແນວໃດກໍຕາມ ຈາກນີ້ທີມນັກວິໄຈຈະທົດລອງຕື່ມກ່ຽວກັບຈຳນວນອະສຸຈິຂອງຜູ້ຊາຍທີ່ໄດ້ກິນຢາ DAMU ຫາກຜົນອອກມາດີຈະນຳໄປສູ່ການທົດລອງກັບຄູ່ຮັກ ເພື່ອໃຊ້ໃນການຄຸມກຳເນີດໂດຍກົງ.
ນອກຈາກນີ້, ຢາ DAMU ມີຄວາມສຳຄັນໃນການປ້ອງກັນການຖືພາທີ່ບໍ່ໄດ້ວາງແຜນໄວ້ ແຕ່ຢາດັ່ງກ່າວກໍບໍ່ໄດ້ຊ່ວຍໃນການປ້ອງກັນພະຍາດທີ່ເກີດຈາກການມີເພດສຳພັນ.
