ກອງປະຊຸມສະພາປະຊາຄົມວັດທະນະທຳ-ສັງຄົມອາຊຽນຄັ້ງທີ 17 ໄຂຂຶ້ນຢ່າງເປັນທາງການທີ່ຟີລິບປິນ
ກອງປະຊຸມປະຊາຄົມຄັ້ງທີ 17 ໄດ້ຮັບຟັງການລາຍງານຜົນການປຶກສາຫາລື ຂອງກອງປະຊຸມເຈົ້າໜ້າທີອາວຸໂສວັດທະນະທຳ-ສັງຄົມອາຊຽນຄັ້ງທີ 22 ຊຶ່ງໄດ້ຈັດຂຶ້ນໃນວັນ 6-7 ມີນານີ້, ສະເໜີໂດຍປະທານກອງປະຊຸມດັ່ງກ່າວເພື່ອລາຍງານກ່ຽວກັບການປະຕິບັດວຽກງານຂອງບັນດາຂະແໜງການຕ່າງໆ ທີ່ນອນຢູ່ໃນເສົາຄ້ຳວັດທະນະທຳ-ສັງຄົມອາຊຽນ, ຕະຫລອດໄລຍະທີ່ຟີລິບປິນ ຮັບໜ້າທີ່ເປັນປະທານອາຊຽນຕໍ່ຈາກ ສປປ ລາວ ໃນປີ 2016 ຜ່ານມາ. ຫົວໜ້າເຈົ້າໜ້າທີ່ອາວຸໂສຟີລິບປິນໃນນາມປະທານກອງປະຊຸມໄດ້ສະເໜີເພີ່ມເຕີມ ກ່ຽວກັບຄວາມຄືບໜ້າໃນການຈັດຕັ້ງປະຕິບັດບັນດາກິດຈະກຳຕ່າງໆພາຍໃຕ້ແຜນແມ່ບົດຂອງປະຊາຄົມວັດທະນະທຳ-ສັງຄົມອາຊຽນ 2025 ແລະ ວິໃສທັດອາຊຽນ 2025 ສຳລັບ 1 ປີຜ່ານມາ. ພ້ອມນັ້ນ, ຮ່າງແຜນວຽກບູລິມະສິດ ພາຍໃຕ້ການເປັນປະທານຂອງຟີລິປິນໃນປີ 2017 ປະກອບມີ 6 ແຜນວຽກໃຫຍ່ທີ່ເນັ້ນກ່ຽວກັບສັນຕິພາບ ແລະ ສະຖຽນລະພາບໃນພາກພື້ນ, ການຮ່ວມມື ແລະ ການຮັກສາຄວາມປອດປອດໄພທາງທະເລ.
ກອງປະຊາຄົມວັດທະນະທຳ-ສັງຄົມອາຊຽນ ຄັ້ງທີ 17 ໂດຍການເປັນປະທານຂອງຟີລິປິນ ໃນປີນີ້ ມີເປົ້າໝາຍ ແລະ ຈຸດປະສົງຫລັກເພື່ອສ້າງບັນດາແຜນວຽກ ແລະ ກິດຈະກຳເຄື່ອນໄຫວຕ່າງໆຮັບໃຊ້ໃນການຈັດຕັ້ງ ສະເຫລີມສະຫລອງການສ້າງຕັ້ງປະຊາຄົມອາຊຽນ ຄົບຮອບ 50 ປີ ຊຶ່ງແນ່ນອນວ່າບັນດາກິດຈະກຳຕ່າງໆກ່ຽວຂ້ອງທີ່ຈະໄດ້ຈັດຕັ້ງປະຕິບັດ ຢູ່ປະເທດຟີລິປິນ ກໍ່ຄືບັນດາປະເທດສະມາຊິກອາຊຽນອື່ນໆອີກດ້ວຍ. ກອງປະຊຸມໄດ້ພິຈາລະນາ ແລະ ຮັບຮອງເອົາ 2 ເອກະສານເພື່ອສະເໜີໃຫ້ຜູ້ນຳອາຊຽນຮັບຮອງ ແລະ ລົງນາມຢູ່ກອງປະຊຸມສຸດຍອດຊຽນ ຄັ້ງທີ 30 ຄື: ເອກະສານເພື່ອລົງນາມ: Declaration on the Role of Civil Service as Catalyst for Achieving ASEAN Community Vision 2025ເອກະສານເພື່ອຮັບຮອງ: ASEAN Instrument on the Protection and Promotion of the Rights of Migrant Workers
ທ່ານ ສະຫວັນຄອນ ລາຊະມຸນຕີ ໄດ້ປະກອບຄຳເຫັນຕໍ່ກອງປະຊຸມ ເຊິ່ງມີເນື້ອໃນລະບຸວ່າ: ສປປ ລາວ ໄດ້ມີຜົນສຳເລັດການເປັນປະທານອາຊຽນໃນປີ 2016 ພາຍໃຕ້ຄຳຂວັນ“ ຫັນວິໄສທັດອາຊຽນເປັນຮູບປະທຳ ເພື່ອຄວາມເຂັ້ມແຂງຂອງປະຊາຄົມອາຊຽນ” ໂດຍເອກະສານ 9 ສະບັບ ທີ່ໄດ້ສະເໜີໃຫ້ຜູ້ນຳອາຊຽນລົງນາມ, ຮັບຮອງ ແລະ ຮັບຊາບ ຢູ່ກອງປະຊຸມສຸດຍອດອາຊຽນຄັ້ງທີ 28 ແລະ 29 ກັນຍາ 2016 ທີ່ນະຄອນຫລວງວຽງຈັນ. ບັນດາເອກະສານເຫລົ່ານັ້ນ ໄດ້ປະກອບສ່ວນອັນສຳຄັນ ແລະ ຕອບສະໜອງໃຫ້ການຈັດຕັ້ງປະຕິບັດບັນດາ 8 ແຜນວຽກບຸລິມະສິດ ພາຍໃຕ້ການເປັນປະທານຂອງສປປ ລາວ 2016.
ພາຍຫລັງກອງປະຊຸມ ສະພາປະຊາຄົມວັດທະນະທຳ-ສັງຄົມອາຊຽນ ຄັ້ງທີ 15 ແລະ 16 ທີ່ໄດ້ຈັດຂຶ້ນຢູ່ແຂວງຫລວງພະບາງ ແລະ ນະຄອນຫລວງວຽງຈັນ 2016 ນັ້ນ, ໃນນາມເປັນປະທານ ສປປ ລາວ ກໍ່ໄດ້ເອົາໃຈໃສ່ຮ່ວມມືກັບ 10 ປະເທດອາຊຽນ ແລະ ບັນດາປະເທດຄູ່ຮ່ວມມືຕ່າງໆ ໃນການຈັດຕັ້ງ ແລະ ເຂົ້າຮ່ວມໃນບັນດາກິດຈະກຳຫລາກຫລາຍຮູບການ ເພື່ອບັນລຸໄດ້ຕາມເປົ້າໝາຍຂອງບັນດາເອ ກະສານ ແລະ ຖະແຫລງການຕ່າງໆ ຂອງອາຊຽນ ກໍ່ຄືໝາກຜົນຈາກກອງປະຊຸມສຸດຍອດອາຊຽນ ຄັ້ງທີ່ 28 ແລະ 29 ສະແດງອອກ ເຊັ່ນ: ຈັດຕັ້ງປະຕິບັດບັນດາກິດຈະກໍາສະເຫລີມສະຫລອງການສ້າງຕັ້ງອາຊຽນຄົບຮອບ 49 ປີ ແລະ ການເຂົ້າຮ່ວມເປັນສະມາຊິກອາຊຽນຂອງ ສປປ ລາວ ຄົບຮອບ 19 ປີ ທີ່ປະກອບດ້ວຍກິດຈະກຳໃນຮູບການຕ່າງໆ ເຊັ່ນ: ດ້ານກິລາ, ການຖາມ-ຕອບກ່ຽວກັບອາຊຽນ, ກິດຈະກຳສົ່ງເສີມດ້ານສິລະປະການສະແດງວັດທະນະທຳຕ່າງໆ ແລະ ກອງປະຊຸມສຳຄັນຕ່າງໆ ທີ່ຂະແໜງການຂອງ ASCC ຈະໄດ້ເປັນເຈົ້າພາບເຊັ່ນ: ກອງປະຊຸມຄະນະກຳມະການວັດທະນະທຳ – ຖະແຫລງຂ່າວອາຊຽນ, ກອງປະຊຸມຄັ້ງທີ 30 ຂອງຄະນະກຳມະການບໍລິຫານຈັດການໄພພິບັດອາຊຽນ. ກອງປະຊຸມຂອງຄະນະກຳມະການສູນປ້ອງກັນໄພ-ຊ່ວຍເຫລືອທາງໄພພິບັດອາຊຽນ ຫລື AHA Centre ຄັ້ງທີ່ 6, ກອງປະຊຸມຮ່ວມສະເພາະກິດຄັ້ງທີ 7 ຫລື 7th Joint Task Force Meeting to Promote Synergy with other relevant ASEAN bodies on HARD and OpenSession on AADMER Partnership ທີ່ຈະຈັດຢູ່ທີ່ ນະຄອນຫລວງວຽງຈັນ ລະຫວ່າງເດືອນມີນາ 2017 ແລະ ກອງປະຊຸມລັດຖະມົນຕີສິ່ງແວດລ້ອມອາຊຽນ ຄັ້ງທີ່ 5 ແລະ ກອງປະຊຸມຕິດພັນອື່ນໆ ທີ່ຈະຈັດຂຶ້ນທີ່ແຂວງ ຫລວງພະບາງ ລະຫວ່າງເດືອນຕຸລາ 2017 ນີ້.
ນອກນັ້ນ, ຢູ່ນະຄອນຫລວງວຽງຈັນ ແລະ ບັນດາແຂວງຕ່າງໆ ໃນທົ່ວປະເທດກໍ່ໄດ້ມີການຈັດເວ ທີສຳມະນາ ແລະ ກອງປະຊຸມເຜີຍແຜ່ຜົນສຳເລັດ ການເປັນເຈົ້າພາບກອງປະຊຸມສຸດຍອດອາຊຽນຄັ້ງທີ 28 ແລະ 29 ໃຫ້ກັບຫລາກຫລາຍຂະແໜງການ ແລະ ລວມທັງພາກເອກະຊົນກໍໄດ້ເຂົ້າຮ່ວມ.
ທ່ານສະຫວັນຄອນ ລາຊະມຸນຕີ ຍັງໄດ້ຍົກໃຫ້ເຫັນບາງໜ້າວຽກທີ່ສຳຄັນ ຂອງບັນດາສື່ມວນຊົນອາຊຽນ ໃນການປະກອບສ່ວນປະຕິບັດພາລະບົດບາດເປັນສື່ໂຄສະນາ ແລະ ເຜີຍແຜ່ບັນດາກິດຈະກຳຕ່າງໆ ແລະ ຜົນຂອງການຈັດຕັ້ງກອງປະຊຸມສຳຄັນຂອງອາຊຽນ, ເວົ້າສະເພາະ ກໍແມ່ນການເຜີຍແຜ່ ແລະ ລາຍງານຂ່າວກ່ຽວກັບບັນດາຖະແຫລງການຕ່າງໆຂອງອາຊຽນທິີ່ຜູ້ນຳອາຊຽນໄດ້ລົງນາມ, ຮັບຮອງ ແລະ ຮັບຊາບຢູ່ກອງປະຊຸມສຸດຍອດອາຊຽນໃນຊຸມປີຜ່ານມາ ກໍຄືໄລຍະການເປັນປະທານຂອງ ສປປ ລາວ 2016. ການໂຄສະນາສົ່ງເສີມການທ່ອງທ່ຽວອາຊຽນ ໂດຍສະເພາະ ສປປ ລາວ ໄດ້ເປັນເຈົ້າພາບຈັດກອງປະຊຸມລັດຖະມົນຕີທ່ອງທ່ຽວອາຊຽນ ໃນລະຫວ່າງຕົ້ນເດືອນມິຖຸນາ 2016 ຜ່ານມາ ຊຶ່ງກອງປະຊຸມດັ່ງກ່າວ ໄດ້ພິຈາລະນາຮັບຮອງເອກະສານ ຖະແຫລງການປາກເຊ ເພື່ອສະເໜີໃຫ້ຕໍ່ກອງປະຊຸມສຸດຍອດອາຊຽນ 28 ແລະ 29 ພິຈາລະນາຮັບຮອງຕໍ່ ເຊິ່ງເອກະສານດັ່ງກ່າວ ແມ່ນເພື່ອສົ່ງເສີມການທ່ອງທ່ຽວແບບທຳມະຊາດທີ່ຍືນຍົງ ແລະ ເປັນການທ່ອງທ່ຽວແບບປະຊາຊົນມີສ່ວນຮ່ວມຫລາຍຂຶ້ນ. ເວົ້າສະເພາະແລ້ວ ຈຸດປະສົງກໍ່ເພື່ອສ້າງໃຫ້ອາຊຽນ ໃຫ້ເປັນຈຸດໝາຍປາຍທາງຂອງການທ່ອງທ່ຽວແຫ່ງດຽວ ແລະ ໃນໂອກາດທີ່ ສປປ ລາວ ກຳລັງກະກຽມໃນການເປີດປີແຫ່ງການທ່ອງທຽວລາວ “ Visit Laos’ Year 2018” ທ່ານ ສະເໜີ ໃຫ້ບັນດາປະເທດສະມາຊິກອາຊຽນ ຈົ່ງໃຫ້ການສະໜັບສະໜູນເພື່ອເຮັດໃຫ້ປີການທ່ອງທ່ຽວລາວ ໄດ້ຮັບການຈັດຕັ້ງປະຕິບັດຢ່າງມີປະສິດທິຜົນ ພ້ອມທັງເຊີນຊວນບັນດາແຂກ ແລະ ຜູ້ແທນກອງປະຊຸມ ຊອກຫາໂອກາດໄປທ່ຽວຊົມບັນດາສະຖານທີ່ແຫລງທ່ອງທຽວຕ່າງໆໃນ ສປປ ລາວ ໃຫ້ຫລາຍຂຶ້ນ.
ກອງປະຊຸມໄດ້ປິດລົງໃນວັນດຽວກັນ ພ້ອມກັບຜົນສຳເລັດອັນຈົບງາມ ທີ່ບັນດາປະເທດສະມາຊິກອາຊຽນ ຕ່າງກໍເປັນເອກະພາບກັນ ແລະ ໃຫ້ການສະໜັບສະໜູນເຊິງກັນ ແລະ ກັນທາງດ້ານເນື້ອໃນ ແລະ ສະແດງຄວາມຂອບໃຈຕໍ່ຟີລິປິນ ໃນນາມເຈົ້າພາບຈັດກອງປະຊຸມສະພາປະຊາຄົມວັດທະນະທຳ-ສັງ ຄົມອາຊຽນຄັ້ງທີ່ 17. ສ່ວນກອງປະຊຸມ ASCC ຮອບສອງ ຫລື ຄັ້ງທີ 18 ຈະຈັດຂຶ້ນລະຫວ່າງເດືອນກັນຍາທີ່ນະຄອນຫລວງມະນິລາ ປະເທດຟີລິປິນ.
