ນະຄອນຫລວງວຽງຈັນ ຈະປັບປຸງລະບົບການເກັບມ້ຽນຂີ້ເຫຍື້ອ ໃຫ້ດີຂຶ້ນ
ເມື່ອບໍ່ດົນມານີ້, ຢູ່ ໃນກອງປະຊຸມສະຫລຸບວຽກງານ ອົງການພັດທະນາຄຸ້ມຄອງ ແລະ ບໍລິຫານຕົວເມືອງ ນະຄອນຫລວງວຽງຈັນ ໄດ້ຕີລາຄາວ່າ: ປັດຈຸບັນ ການເກັບມ້ຽນຂີ້ເຫຍື້ອ ໃນນະຄອນຫຼວງວຽງຈັນຍັງບໍ່ສາມາດເຮັດໄດ້ຢ່າງທົ່ວເຖິງ, ເນື່ອງຈາກຫລາຍປັດໄຈ, ເປັນຕົ້ນແມ່ນປະຊາຊົນ ແລະ ບ້ານ ຈຳນວນໜຶ່ງຍັງບໍ່ເປັນເຈົ້າການໃຊ້ບໍລິການເກັບມ້ຽນຂີ້ເຫຍື້ອກັບໜ່ວຍງານເຈົ້າໜ້າທີ່ ແລະ ມີການນຳເອົາຂີ້ເຫຍື້ອໄປຖີ້ມຕາມສະຖານທີ່ຕ່າງໆເປັນຕົ້ນເສັ້ນທາງປ່ຽວ ແລະ ອື່ນໆ, ພ້ອມນີ້, ການເກັບມ້ຽນຂີ້ເຫຍື້ອກໍຍັງບໍ່ພຽງພໍກັບ ຈຳນວນປະລິມານຂີ້ເຫຍື້ອທີ່ນັບມື້ມີປະລິມານເພີ່ມຂຶ້ນ, ຊຶ່ງປັດຈຸບັນນີ້, ໂດຍສະເລ່ຍມື້ໜຶ່ງຢູ່ໃນນະຄອນຫຼວງວຽງຈັນ ຜະລິດຂີ້ເຫຍື້ອອອກປະມານ 300-350 ໂຕນ, ຂະນະ ທີ່ຄວາມສາມາດ ໃນການເກັບມ້ຽນ ແລະ ເອົາໄປທຳລາຍຖິ້ມຢູ່ສະໜາມບຳບັດຂີ້ເຫຍື້ອຫຼັກ 32 ແມ່ນປະຕິບັດໄດ້ພຽງ 200-250 ໂຕນຕໍ່ວັນ. ສ່ວນທີ່ເຫຼື່ອ ແມ່ນປະຊາຊົນສວຍໂອກາດເອົາຂີ້ເຫຍື້ອໄປຖິ້ມ ແລະ ທຳລາຍເອງ ດ້ວຍວິທີທີ່ບໍ່ຖືກຕ້ອງເປັນຕົ້ນ ລັກຖິ້ມ ຢູ່ບ່ອນສາທາລະນະ, ຖິ້ມລົງແມ່ນ້ຳ, ຈູດທຳລາຍ ຫຼື ຝັງ ເຊິ່ງເປັນການທຳລາຍສະພາບແວດລ້ອມ ແລະ ສ້າງຄວາມບໍ່ຈົບງາມໃນຕົວເມືອງ. ປີຜ່ານມາ ກອງຄຸ້ມຄອງຂີ້ເຫຍື້ອໄດ້ວາງແຜນເດີນລົດ (ເປັນເຂດ) ເພື່ອເກັບມ້ຽນຂີ້ເຫຍື້ອແຕ່ລະບ້ານ, ສໍານັກງານ ອົງການຕ່າງໆ ຕາມວັນເວລານັດໝາຍ ເຊິ່ງສາມາດປະຕິບັດໄດ້ 14.949 ຖ້ຽວ, ມີບໍລິມາດຂີ້ເຫຍື້ອປະມານ 79.568 ໂຕນ, ຊຶ່ງທຽບກັບຄວາມຕ້ອງການແລ້ວແມ່ນຍັງບໍ່ທັນພຽງພໍ.
ທ່ານ ຫົວໜ້າກອງບໍລິການຂົນສົ່ງຂີ້ເຫຍື້ອ ຫ້ອງການຄຸ້ມຄອງ ແລະ ບໍລິການຕົວເມືອງ ນະຄອນຫຼວງວຽງຈັນ (ຄບຕ) ໃຫ້ຮູ້ວ່າ: ເພື່ອເຮັດໃຫ້ ນະຄອນຫລວງວຽງຈັນ ມີຄວາມສະອາດຈົບງາມ, ຊຶ່ງຈະຕ້ອງໄດ້ເພີ່ມຖັງຖີ້ມຂີ້ເຫຍື້ອໃນຊຸມຊົນໃຫ້ຫລາຍຈຸດ ແລະ ສ້າງຈິດສຳນຶກໃຫ້ສັງຄົມຮູ້ຈັກຫມູນໃຊ້ເສດຂີ້ເຫຍື້ອໃຫ້ຫລາຍຂຶ້ນ ແລະ ຈະຕ້ອງໄດ້ເອົາໃຈໃສ່ປັບປຸງຂອດບໍລິການເກັບມ້ຽນຂີ້ເຫຍື້ອໃຫ້ດີຂຶ້ນ ເພື່ອຮັບປະກັນຄວາມສະອາດໃນຂອບເຂດບໍລິການ ໂດຍສະເພາະ ລະບົບການຈັດຕັ້ງລົດຂົນສົ່ງຕາມຮູບແບບບໍລິການແບບໃໝ່ ແລະ ຖືກຕາມເວລານັດໝາຍ ພ້ອມສືບຕໍ່ປັບປຸງສະໜາມຂີ້ເຫຍື້ອຫຼັກ 32 ໃຫ້ຖືກຕາມມາດຕະຖານເຕັກນິກໃນການຝັງຂີ້ເຫຍື້ອ ແລະ ເອົາໃຈໃສ່ຂະຫຍາຍລູກຄ້າຜູ້ໃຊ້ບໍລິການ ໃນຂອບເຂດຄວາມຮັບຜິດຊອບໃຫ້ໄດ້ 10% ຕໍ່ປີ ແລະ ໄດ້ທົດລອງໃຫ້ປະຊາຊົນພາຍໃນເມືອງ ແລະ ບ້ານ ແຍກຂີ້ເຫຍື້ອ ເຫັນວ່າໄດ້ຮັບຜົນດີ ແລະ ຈະສືບຕໍ່ຈັດຕັ້ງ ປະຕິບັດຢູ່ທຸກໆເມືອງ ເພື່ອເອົາຂີ້ເຫຍື້ອທີ່ຈຳເປັນປະເພດເສດຜັກ, ໝາກໄມ້ ມາຜະລິດເປັນແກັສຫຸງຕົ້ມໄດ້.
