ຈີນສະໜັບສະໜູນການປະຊຸມຮອບ 2 ລະຫວ່າງ ທ່ານ ທຣຳ – ທ່ານ ກິມ ຈ໋ອງອຸນ
ປະທານປະເທດ ສີ ຈິ້ນຜິງ ສະໜັບສະໜູນໃຫ້ທ່ານ ກິມ ຈ໋ອງອຸນ ພົບກັບປະທານາທິບໍດີ ໂດນັລ ທຣຳ ເປັນຄັ້ງທີ 2, ສ່ວນຜູ້ນຳ ສປປ ເກົາຫລີ ໃຫ້ຄຳໝັ້ນເລື່ອງ “ການປົດນິວເຄຼຍ” ແລະ ການພະຍາຍາມເຈລະຈາຄັ້ງໃໝ່ກັບອາເມລິກາ ເພື່ອຜົນໄດ້ຮັບທີ່ເປັນຮູບປະທຳ.
ສຳນັກຂ່າວຊິນຮົວຂອງລັດຖະບານປັກກິ່ງ ແລະ ສຳນັກຂ່າວກາງເກົາຫລີ (KCNA) ຂອງລັດຖະບານພຽງຢາງ ລາຍງານໃນເວລາໄລ່ລຽງກັນ ໃນວັນທີ 10 ມັງກອນວ່າ: ທ່ານ ກິມ ຈ໋ອງອຸນ ຜູ້ນຳສູງສຸດຂອງ ສປປ ເກົາຫລີ ສຳເລັດພາລະກິດຢ້ຽມຢາມ ສປ ຈີນ ລະຫວ່າງວັນທີ 7-9 ເຊິ່ງລະຫວ່າງການພົບປະຫາລືກັບປະທານປະເທດ ສີ ຈິ້ນຜິງ ຜູ້ນຳ ສປ ຈີນ ກ່າວໃນຕອນໜຶ່ງວ່າ: ລັດຖະບານປັກກິ່ງສະໜັບສະໜູນກອງປະຊຸມຄັ້ງທີ 2 ລະຫວ່າງຜູ້ນຳຂອງ ສປປ ເກົາຫລີ ກັບ ປະທານາທິບໍດີ ໂດນັລ ທຣຳ ຜູ້ນຳອາເມລິກາ, ແຕ່ການພົບປະຫາລືຄັ້ງນີ້ “ຄວນມີການບັນລຸຜົນຢ່າງເປັນຮູບປະທຳ” ໃນບັນຫາການປົດອາວຸດນິວເຄຼຍຢູ່ແຫລມເກົາຫລີ.
ຂະນະດຽວກັນ, ທ່ານ ສີ ຈິ້ນຜິງ ກ່າວອີກວ່າ: ອາເມລິກາ ແລະ ສປປ ເກົາຫລີ “ຄວນພົບກັນເຄິ່ງທາງ”. ສ່ວນທ່ານ ກິມ ຈ໋ອງອຸນ ກ່າວວ່າ: ສປປ ເກົາຫລີ ຈະຍຶດໝັ້ນຕາມແນວທາງປະຕິບັດ ເພື່ອໃຫ້ແຫລມເກົາຫລີເປັນພື້ນທີ່ປອດນິວເຄຼຍ ແລະ ການຫລຸດຜ່ອນຄວາມຂັດແຍ່ງທາງການເມືອງຢູ່ແຫລມເກົາຫລີ ໂດຍການເຈລະຈາຢ່າງສັນຕິ ເພື່ອນຳມາເຊິ່ງຜົນໄດ້ຮັບຢ່າງເປັນຮູບປະທຳ ຕາມຄວາມຄາດຫວັງຂອງປະຊາຄົມໂລກ ໂດຍຄຳກ່າວຂອງທ່ານ ກິມ ຈ໋ອງອຸນ ເພີ່ມຄວາມເປັນໄປໄດ້ວ່າ: ການພົບປະຫາລືຄັ້ງທີ 2 ກັບຜູ້ນຳອາເມລິກາ “ຈະເກີດຂຶ້ນ” ຫລັງກອງປະຊຸມຄັ້ງທຳອິດຈັດຂຶ້ນຢູ່ສິງກະໂປ ໃນເດືອນມິຖຸນາປີຜ່ານມາ ເຖິງວ່າຍັງບໍ່ແນ່ນອນວ່າກອງປະຊຸມຄັ້ງໃໝ່ຈະເກີດຂຶ້ນເມື່ອໃດ, ແຕ່ມີລາຍງານວ່າ: ນະຄອນຫລວງບາງກອກ, ນະຄອນຫລວງຮ່າໂນ້ຍ ແລະ ເກາະຮາວາຍ ລວມຢູ່ໃນສະຖານທີ່ທີ່ມີຄວາມເປັນໄປໄດ້ຫລາຍທີ່ສຸດວ່າຈະມີການຂໍໃຊ້ເປັນສະຖານທີ່ຈັດກອງປະຊຸມຄັ້ງທີ 2.
