ລັດເອົາແທ້ ແກ້ພິດເຄມີ

ໂດຍ : ມຶກບໍແຫ້ງ

ການປູກພືດກະສິກຳ ເພື່ອເປັນສິນຄ້າ ນຳໃຊ້ຢາເຄມີທີ່ເປັນພິດ ແລະ ບໍ່ຄິດນຳຜົນກະທົບຕໍ່ສະພາບແວດລ້ອມ ແລະ ສັງຄົມຜ່ານມານັ້ນ ແມ່ນມີຫຼວງຫຼາຍກ່າຍກອງ ແຕ່ມາດຽວນີ້ລັດກຳລັງຈິງຈັງ ທີ່ຈະປາບປາມກຸ່ມຜູ້ຄົນທີ່ດຳເນີນການກະທຳດັ່ງກ່າວ.

ປະເທດເຮົາມີທ່າແຮງໃນການຜະລິດກະສິກຳ ເພື່ອເປັນສິນຄ້າ ຍ້ອນເນື້ອທີ່ດິນອຸດົມສົມບູນ ແລະ ຍັງເປົ່າວ່າງຫຼາຍ. ຍ້ອນແນວນັ້ນ ຂະແໜງການນີ້ ຈຶ່ງຂະຫຍາຍຕົວດີໃນໄລຍະເກືອບໜຶ່ງທົດສະຫວັດທີຜ່ານມາ ແລະ ລັດຖະບານກໍໄດ້ເປີດໂອກາດໃຫ້ນັກລົງທຶນຕ່າງປະເທດເຂົ້າມາລົງທຶນປູກພືດອຸດສາຫະກຳເພື່ອສົ່ງອອກ ໃນນັ້ນເດັ່ນກວ່າໝູ່ແມ່ນການປູກກ້ວຍ ເຊິ່ງສ່ວນໃຫຍ່ແມ່ນນັກລົງທຶນ ຈາກ ສປ ຈີນ ທີ່ເຂົ້າມາລົງທຶນ ໂດຍສະເພາະ ເຂດພາກເໜືອ ຫາ ພາກກາງ ຂອງປະເທດ.

ເນື່ອງຈາກຫຼາຍສາເຫດ ບໍ່ວ່າທາງດ້ານຄວາມໂປ່ງໃສ, ຂາດການຕິດຕາມກວດກາ ຢ່າງລະອຽດທີ່ຖ້ວນ, ການບັງຄັບໃຊ້ ລະບຽບກົດໝາຍຢ່າງເຄັ່ງຄັດ ໃນໄລຍະຜ່ານມາ ຈຶ່ງເຮັດໃຫ້ມີຊ່ອງວ່າງ ທີ່ນັກລົງທຶນ ປູກກ້ວຍຈຳນວນໜຶ່ງ ທີ່ຢາກໄດ້ກຳໄລຫຼາຍ ແຕ່ບໍ່ຢາກຈ່າຍ ເພື່ອຄວາມປອດໄພ ໃນການໃຊ້ສານເຄມີ, ຂາດຄວາມ ຮັບຜິດຊອບ ໂດຍເຮັດໃຫ້ ສານເຄມີທີ່ໃຊ້ໃນສວນກ້ວຍ (ແລະພືດຊະນິດອື່ນໆ) ໄຫຼລົງສູ່ແມ່ນໍ້າ, ຊຶມລົງດິນ ທັງເປັນ ພິດໂດຍກົງຕໍ່ກັບ ກຳມະກອນຜູ້ຮັບຈ້າງ ເຊິ່ງເປັນຄວາມອັນຕະລາຍ ກາຍເປັນສິ່ງສັງຄົມ ກັງວົນຍິ່ງຂຶ້ນ.

ສະຖາບັນຄົ້ນຄວ້າກະສິກຳ ແລະປ່າໄມ້ແຫ່ງຊາດ ກໍໄດ້ເຜີຍແຜ່ ຜົນການຄົ້ນຄວ້າ ກ່ຽວກັບການປູກກ້ວຍ ຢູ່ພາກເໜືອຂອງລາວ ໃນປີ 2016 ເຫັນວ່າ ມີແນວໄດ້ ໜ້ອຍກວ່າແນວເສຍ ໂດຍສະເພາະ ຜົນກະທົບ ຕໍ່ສະພາບແວດລ້ອມ ແລະສັງຄົມ ເຊິ່ງຕໍ່ມາ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປລາວ ກໍໄດ້ປະກາດຕໍ່ ສະມາຊິກສະພາແຫ່ງຊາດ ໃນປີດຽວກັນ ກ່ຽວກັບ ຄຳສັ່ງຫ້າມການລົງທຶນ ປູກກ້ວຍພາຍຫຼັງພົບເຫັນ ຜົນເສຍຫາຍທາງສິ່ງແວດລ້ອມດັ່ງກ່າວ.

ເຫດການທີ່ຕົກໃຈ ເມື່ອບໍ່ດົນຜ່ານມາ ກໍແມ່ນ ສານເຄມີ ຈາກບໍລິສັດປູກກ້ວຍ ຄົນຈີນ ໄຫຼລົງສູ່ ແມ່ນໍ້າຕອນ ເຂດເມືອງສັງທອງ ເມື່ອທ້າຍປີ 2018  ເຮັດໃຫ້ ຄຸນນະພາບນໍ້າ ເສື່ອມໂຊມ ແລະປາຕາຍເປັນຈຳນວນຫຼວງຫຼາຍ   ຍ້ອນແນວນັ້ນ ທາງການ ໂດຍສະເພາະ ພະແນກຊັບພະຍາກອນທຳມະຊາດ ແລະສິ່ງແວດລ້ອມ ນະຄອນຫຼວງວຽງຈັນ ສົມທົບກັບ ພາກສ່ວນທີ່ກ່ຽວຂ້ອງ ຈຶ່ງມີຄວາມສະດຸ້ງໄວ ໃນການແກ້ໄຂບັນນີ້ ເປັນການດ່ວນ.

ອີງຕາມຂໍ້ມູນຈາກ ໜັງສືພິມວຽງຈັນທາມ ສະບັບ ວັນທີ 8 ມັງກອນ 2019 ໄດ້ລະບຸວ່າ ສະພາ ປະຊາຊົນນະຄອນຫຼວງວຽງຈັນ ໄດ້ຮັບຮອງເອົາມາດຕະການແກ້ໄຂ ໂດຍຮຽກຮ້ອງໃຫ້ ບໍລິສັດດັ່ງກ່າວ ຕ້ອງປະຕິບັດຕາມ ລະບຽບທາງສິ່ງແວດລ້ອມຢ່າງເຄັ່ງຄັດ ບໍ່ດັ່ງນັ້ນ ຈະຕ້ອງໄດ້ໂຈະສັນຍາສຳປະທານ.

ພ້ອມນັ້ນ ທາງພະແນກກະສິກຳ ແລະປ່າໄມ້ ນະຄອນຫຼວງກໍໄດ້ແນະນຳ ວິທີການດຳເນີນການຜະລິດ ທີ່ປອດໄພໃຫ້ແກ່ບໍລິສັດດັ່ງກ່າວ ແລະ ຖ້າພົບເຫັນການລະເມີດ ອີກຄັ້ງ ຈະຕ້ອງໄດ້ໂຈະການໃຫ້ສຳປະທານ ທັນທີ.

ການນຳໃຊ້ ມາດຕະການດັ່ງກ່າວ ແມ່ນເປັນແບບຢ່າງທີ່ດີໃນການ ບັງຄັບໃຊ້ ລະບຽບກົດໝາຍ ເພື່ອຮັບປະກັນການດຳເນີນການຜະລິດທີ່ປອດໄພ ຫຼຸດຜ່ອນຜົນກະທົບທາງລົບ ຕໍ່ສະພາບແວດລ້ອມ ແລະສັງຄົມ. ພ້ອມດຽວກັນນັ້ນ, ເວລາໃດກໍຕາມ ທີ່ພວກເຮົາ ພິຈາລະນາ ໃນການແກ້ໄຂບັນຫາ ໂດຍສະເພາະ ກັບຜູ້ລົງທຶນທີກະທຳຜິດນັ້ນ ຕ້ອງໄດ້ມີການດຳເນີນການກວດກາ ແລະລະມັດລະວັງ ເພື່ອຮັບປະກັນວ່າ ປະຊາຊົນ ຜູ້ທີ່ໃຫ້ ນາຍທຶນເຊົ່າທີ່ດິນ ບໍ່ໄດ້ເສຍຜົນປະໂຫຍດ ໂດຍສະເພາະ ການຈ່າຍຄ່າເຊົ່າທີ່ດິນ ແລະຄ່າແຮງງານ ຂອງນາຍທຶນຕ້ອງໄດ້ປະຕິບັດຢ່າງເໝາະສົມ.