ກະຊວງສຶກສາຫວນຄືນມູນເຊື້ອວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ
ໃນວັນທີ 9 ມັງກອນນີ້, ກະຊວງສຶກສາທິການ ແລະ ກິລາ ໄດ້ຈັດປາຖະກາຖາ ຫວນຄືນມູນເຊື້ອວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ (20 ມັງກອນ 1949-20 ມັງກອນ 2019) , ໂດຍທ່ານ ພົນຈັດຕະວາ ປະສິດ ທ່ຽງທໍາ ຮອງຫົວໜ້າກົມໃຫຍ່ເສນາທິການກອງທັບ ກະຊວງປ້ອງກັນປະເທດ, ໄດ້ຍົກໃຫ້ເຫັນເຖິງປະຫວັດສາດການກໍາເນີດຂອງກອງທັບປະຊາຊົນລາວ, ທາດແທ້, ມູນເຊື້ອອັນສະຫງ່າອົງອາດ, ໄຊຊະນະ ແລະ ການເຕີບໃຫຍ່ຂະຫຍາຍຕົວຂອງກອງທັບປະຊາຊົນລາວໃນແຕ່ລະໄລຍະ ແລະ ຜົນງານອັນໃຫຍ່ຫຼວງ ທີ່ກອງທັບ ແລະ ປະຊາຊົນລາວຍາດມາໄດ້ ຕະຫຼອດໄລຍະ 70 ປີ ຜ່ານມາ ພາຍໃຕ້ການນໍາພາຂອງພັກປະຊາຊົນປະຕິວັດລາວ.
ເພື່ອແນໃສ່ສຶກສາອົບຮົມພະນັກງານ, ສະມາຊິກພັກ, ປະຊາຊົນຊັ້ນຄົນຕ່າງໆ ໃຫ້ມີຈິດໃຈຮັກຊາດ, ຮັກລະບອບໃໝ່, ຮັກລະບອບປະຊາທິປະໄຕ ປະຊາຊົນ, ສ້າງຄວາມສາມັກຄີໃຫ້ເປັນປຶກແຜ່ນ, ສ້າງສະຕິປັນຍາເປັນເຈົ້າຕົນເອງເພິ່ງຕົນເອງ, ມີສະຕິລະວັງຕົວຕໍ່ກົນອຸບາຍທໍາລາຍມ້າງເພຂອງອິດທິກໍາລັງປໍລະປັກ ແລະ ເປັນເຈົ້າການເຂົ້າຮ່ວມໃນການປະຕິບັດແນວທາງປ້ອງກັນຊາດ-ປ້ອງການຄວາມສະຫງົບທົ່ວປວງຊົນຮອບດ້ານຂອງພັກ; ເພື່ອໂຄສະນາສຶກສາອົບຮົມນໍາໃຈປະຕິວັດ, ຄວາມກະຕັນຍູຮູ້ບຸນຄຸນ ແລະ ຮໍ່າຮຽນເອົາແບບຢ່າງຄຸນສົມບັດສິນທໍາປະຕິວັດ, ຄຸນງາມຄວາມດີຂອງປະທານ ໄກສອນ ພົມວິຫານ ແລະ ບັນດາທ່ານຜູ້ນໍາຮຸ່ນກ່ອນ ແລະ ພະນັກງານນັກຮົບປະຕິວັດ ຖືໂອກາດສ້າງຂະບວນການຕອບບຸນແທນຄຸນຜູ້ທີ່ໄດ້ສຍສະຫຼະຊີວິດ, ຜູ້ເສຍອົງຄະ, ຄອບຄົວຜູ້ທີ່ມີຜົນງານທີ່ໄດ້ປະກອບສ່ວນເຂົ້າໃນພາລະກິດຕໍ່ສູ້ປົດປ່ອຍຊາດ, ປົກປັກຮັກສາ ແລະ ສ້າງສາພັດທະນາປະເທດຊາດ; ເພື່ອໂຄສະນາປຸກລະດົມ ສ້າງຂະບວນການດ້ານຕ່າງໆຢ່າງແຂງແຮງ ແລະ ຟົດຟື້ນ ເພື່ອຄໍານັບຮັບຕ້ອນ ແລະ ລະລຶກເຖິງວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ໃຫ້ມີເນື້ອໃນ ແລະ ຄວາມໝາຍສໍາຄັນ, ມີບັນຍາກາດເບີກບານມ່ວນຊື່ນ, ມີຄວາມສະຫງົບ, ມີຄວາມປອດໄພ ແລະ ມີຄວາມເປັນລະບຽບຮຽບຮ້ອຍ.
