18 ປີການໃຫ້ບໍລິການຂອງບໍລິສັດ ທີດີເອສ ຈໍາກັດ

    ບໍລິສັດ ທີດີເອສ ຈໍາກັດ (TDS CO, LTD) ເປັນບໍລິສັດໜຶ່ງທີ່ໃຫ້ການບໍລິການແປພາສາຕ່າງປະເທດ ແລະ ການປະກອບເອກະສານຕ່າງໆ, ຊຶ່ງໄດ້ຮັບຄວາມໄວ້ເນື້ອເຊື້ອໃຈຈາກສັງຄົມຕະຫຼອດ.

ທ່ານ ບຸນໄທ ແກ້ວວິໄລ ຜູ້ອໍານວຍການ ທັງເປັນຜູ້ກໍ່ຕັ້ງ ບໍລິສັດ ດັ່ງກ່າວໃຫ້ຮູ້ວ່າ: ບໍລິສັດຂອງຕົນໄດ້ຮັບການອະນຸຍາດດໍາເນີນທຸລະກິດ ແຕ່ກາງປີ 1999 ເປັນຕົ້ນມາ ເປັນບໍລິສັດມີທີມງານທີ່ມີປະສົບການ ແລະ ຄຸນນະພາບຂອງວຽກງານ ເພື່ອຮັບໃຊ້ສັງຄົມ ຄື: ບໍລິການແປພາສາຕ່າງປະເທດ (ອັງກິດ, ຝຣັ່ງ, ລັດເຊຍ, ຍີ່ປຸ່ນ ແລະ ອື່ນໆ ຍົກເວັ້ນແຕ່ພາສາຈີນ), ບໍລິການແລ່ນເອກະສານຂໍອະນຸຍາດແຕ່ງດອງກັບຄົນຕ່າງປະເທດ, ປະກອບເອກະສານຄູ່ໝັ້ນ,  ຂຽນບົດພິພາກເສດຖະກິດ, ແລ່ນເອກະສານຂໍອະນຸຍາດລົງທຶນ ທັງພາຍໃນ ແລະ ຕ່າງປະເທດ, ຂໍຢູ່ລາວຖາວອນ ແລະ ຂໍສັນຊາດ, ພ້ອມໃຫ້ຄໍາປຶກສາ ແລະ ບໍລິການອື່ນໆ ຢ່າງມີຄຸນນະພາບ ແລະ ຜ່ານມາກໍໄດ້ຮັບຄວາມສົນໃຈຫຼາຍກວ່າໝູ່ ແມ່ນການບໍລິການແລ່ນເອກະສານຂໍອະນຸຍາດແຕ່ງດອງກັບຄົນຕ່າງປະເທດ ແລະ ສ່ວນຫຼາຍຈະແມ່ນຄົນຍີ່ປຸ່ນທີ່ມາໃຊ້ບໍລິການຫຼາຍ ເພາະທາງບໍລິສັດໄດ້ຮ່ວມມືກັບປະເທດດັ່ງກ່າວ

    ຜ່ານມາບໍລິສັດໄດ້ຮັບການຊີ້ນໍາຈາກພັກ-ລັດຖະບານມາໂດຍຕະຫຼອດ ໂດຍສະເພາະ ແມ່ນກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ໄດ້ໃຫ້ການຊີ້ນໍາຢ່າງໃກ້ສິດຕະຫຼອດມາ, ນອກນີ້, ຍັງມີກະຊວງຍຸຕິທໍາກໍໄດ້ໃຫ້ຄໍາແນະນໍາໃນການແປພາສາ, ເອກະສານຂໍອະນຸຍາດແຕ່ງດອງກັບຄົນຕ່າງປະເທດ ແລະ ອື່ນໆ, ສ່ວນຂໍ້ຫຍຸ້ງຍາກ ກໍຄືຂອດການບໍລິການຂອງລັດ ເຮົາຍັງໄດ້ຜ່ານຫຼາຍຂັ້ນຕອນ, ຜ່ານຫຼາຍຂອດຫຼາຍຂະແໜງການ, ດັ່ງນັ້ນຈຶ່ງເຮັດໃຫ້ເປັນເຫດໃຫ້ການແລ່ນເອກະສານຕ່າງໆຊັກຊ້າແກ່ຍາວ (ຕົວຢ່າງແຕ່ກ່ອນແລ່ນເອກະສານຂໍອະນຸຍາດແຕ່ງດອງກັບຄົນຕ່າງປະເທດໃຊ້ເວລາພຽງ 3-4 ເດືອນ ແຕ່ປັດຈຸບັນຕ້ອງໃຊ້ເວລາເຖິງ 8 ເດືອນຫາ 1 ປີ ຈຶ່ງສໍາເລັດ).

ໃນຕໍ່ໜ້າທາງບໍລິສັດມີແຜນທີ່ຈະຂະຫຍາຍກິດຈະການເພີ່ມ ເປັນແບບລັກລະນະໂຄສະນາຜ່ານທາງອອນລາຍ ແລະ ຈະປັບປຸງລະບົບການບໍລິການ ໃຫ້ວ່ອງໄວ, ທັນໃຈ ແລະ ຮັບປະກັນຄຸນນະພາບດີຂຶ້ນກວ່າເກົ່າ.

ບໍລິສັດ ທີດີເອສ ຈໍາກັດ ຕັ້ງຢູ່ຖະໜົນຄູວຽງ, ບ້ານບຶງຂະຫຍອງ, ເມືອງສີສັດຕະນາກ ນະຄອນຫຼວງວຽງຈັນ ໂທ: 021 313339 ແລະ 020 99900287, E-mail:tds_co@hotmail.com.