ຈີນເລັ່ງປ່ອຍກູ້ເພີ່ມໂຄງການ ໜຶ່ງແລວໜຶ່ງເສັ້ນທາງ ປີ 2019
ທະນາຄານກາງຈີນ (PBOC) ກຳນົດພາລະກິດທີ່ສຳຄັນປະຈຳປີ 2019 ຂອງທະນາຄານ ເຊິ່ງລວມທັງການເດີນໜ້າສະໜັບສະໜູນການລົງທຶນ ແລະ ການຮ່ວມມືດ້ານການເງິນໃນໂຄງການໜຶ່ງແລວໜຶ່ງເສັ້ນທາງ.
PBOC ຈະເຂົ້າມາມີສ່ວນຮ່ວມໃນການເບິ່ງແຍງເສດຖະກິດລະດັບສາກົນ ແລະ ດ້ານການເງິນ ໂດຍທະນາຄານກາງຈະສະໜັບສະໜູນການເປີດກວ້າງຂອງອຸດສາຫະກຳການເງິນຈີນ ເພື່ອໃຫ້ສອດຄ່ອງກັບຫລັກການລົງທຶນໂດຍເສລີ ເຊິ່ງຈະປະຕິບັດກັບນັກລົງທຶນຕ່າງປະເທດຄືຄົນໃນປະເທດ ນັບແຕ່ກ່ອນຈະເຂົ້າມາລົງທຶນ.
ນອກຈາກນີ້ PBOC ຍັງໃຫ້ຄຳໝັ້ນອີກວ່າ: ມາດຕະການທີ່ປະກາດອອກຈະມີການນຳໄປປະຕິບັດໂດຍໄວທີ່ສຸດ, ພ້ອມເດີນໜ້າສຶກສາ ແລະ ສະເໜີມາດຕະການໃໝ່ໆ ເພື່ອເປີດເສລີການເງິນໃຫ້ຫລາຍຂຶ້ນ, ພ້ອມທັງຈະໃຫ້ການສະໜັບສະໜູນຜູ້ປະກອບການຊາວຈີນດ້ານການລົງທຶນໃນຕ່າງປະເທດ ເພື່ອຍົກລະດັບແຜນການກ້າວອອກໄປລົງທຶນໃນຕ່າງແດນ.
ສຳນັກຂ່າວຊິນຮົວລາຍງານວ່າ: PBOC ຈະຊຸກຍູ້ນະໂຍບາຍທີ່ສະໜັບສະໜູນໃຫ້ເງິນຢວນເປັນສະກຸນເງິນສາກົນ ໂດຍຈະມີການປັບປຸງນະໂຍບາຍການໃຊ້ສະກຸນເງິນຢວນຂ້າມແດນ, ພ້ອມພັດທະນາຂອບການຮ່ວມມືທາງການເງິນລະຫວ່າງທະນາຄານກາງນຳກັນ ລວມທັງພັດທະນາຂອບການບໍລິການ ເພື່ອຮັກສາສະພາບຄ່ອງຂອງສະກຸນເງິນຢວນໃນຕ່າງປະເທດ.
ທັງນີ້, PBOC ຈະສະໜັບສະໜູນເຂດການຄ້າເສລີ ແລະ ລະບົບການຄ້າເສລີ ເພື່ອກ້າວເປັນຜູ້ນຳໃນການປະຕິຮູບການຈັດການຕະຫລາດແລກປ່ຽນສະກຸນເງິນ, ພ້ອມພັດທະນາຂອບການຈັດການແບບລະມັດລະວັງໃນລະດັບມະຫາພາກ ແລະ ການເບິ່ງແຍງໃນລະດັບຈຸລະພາກຂອງກະແສເງິນທຶນຂ້າມແດນ ແລະ ຈະເດີນໜ້າພັດທະນາການກະຈາຍການລົງທຶນໃນທຶນສຳຮອງສາກົນຢ່າງຕໍ່ເນື່ອງ.
