ຜູ້ນຳ ສປປ ເກົາຫລີ ຢ້ຽມຢາມ ຈີນ ຢ່າງເປັນທາງການ
ທ່ານ ກິມ ຈ໋ອງອຸນ ຢ້ຽມຢາມນະຄອນຫລວງປັກກິ່ງຢ່າງເປັນທາງການ ໃນອາທິດນີ້ ເພື່ອເຂົ້າພົບປະທານປະເທດ ສີ ຈິ້ນຜິງ ເພີ່ມຄວາມເປັນໄປໄດ້ວ່າການພົບປະຫາລືຄັ້ງທີ 2 ລະຫວ່າງຜູ້ນຳ ສປປ ເກົາຫລີ ກັບປະທານາທິບໍດີອາເມລິກາ ອາດເກີດຂຶ້ນ.
ສຳນັກງານຂ່າວຊິນຮົວຂອງທາງການຈີນ ແລະ ສຳນັກຂ່າວກາງເກົາຫລີ (KCNA) ກະບອກສຽງຂອງລັດຖະບານພຽງຢາງ ລາຍງານໃນເວລາໄລ່ລຽງກັນວ່າ: ທ່ານ ກິມ ຈ໋ອງອຸນ ຜູ້ນຳສູງສຸດຂອງ ສປປ ເກົາຫລີ ພ້ອມພັນລະຍາ ແລະ ຄະນະເຈົ້າໜ້າທີ່ລະດັບສູງຂອງລັດຖະບານພຽງຢາງ ຢ້ຽມຢາມນະຄອນຫລວງປັກກິ່ງຢ່າງເປັນທາງ ການ ລະຫວ່າງວັນທີ 7-10 ມັງກອນນີ້ ໂດຍເປັນການເດີນທາງດ້ວຍຂະບວນລົດໄຟອອກຈາກນະຄອນຫລວງພຽງຢາງໃນວັນທີ 7 ມັງກອນ. ຖືເປັນການຢ້ຽມຢາມຈີນເປັນເທື່ອທຳອິດໃນປີນີ້ຂອງທ່ານ ກິມ ຈ໋ອງອຸນ ແລະ ເປັນການພົບປະຫາລືເປັນຄັ້ງທີ 4 ກັບປະທານປະເທດ ສີ ຈິ້ນຜິງ.
ທັງນີ້, ທ່ານ ກິມ ຈ໋ອງອຸນ ພົບປະຫາລືກັບທ່ານ ສີ ຈິ້ນຜິງ 3 ຄັ້ງຢູ່ຈີນໃນປີຜ່ານມາ ໂດຍທຸກຄັ້ງລ້ວນເປັນການປະຊຸມທີ່ເກີດຂຶ້ນກ່ອນ ແລະ ຫລັງການພົບປະຫາລືລະຫວ່າງຜູ້ນຳຂອງ ສປປ ເກົາຫລີ ກັບປະທານາທິບໍດີ ໂດນັລ ທຣຳ ຜູ້ນຳອາເມລິກາ ແລະ ປະທານາທິບໍດີ ມຸນແຈອິນ ຜູ້ນຳ ສ.ເກົາຫລີ ຫລາຍຝ່າຍຈຶ່ງວິເຄາະການຢ້ຽມຢາມນະຄອນຫລວງປັກກິ່ງຂອງທ່ານ ກິມ ຈ໋ອງອຸນ ໃນຄັ້ງນີ້ວ່າອາດເປັນການສົ່ງສັນຍານວ່າການພົບປະຫາລືກັບທ່ານ ທຣຳ ຄັ້ງທີ 2 ກຳລັງຈະເກີດຂຶ້ນ ຫລື ບໍ່, ຫລັງການພົບກັນຄັ້ງປະຫວັດສາດຢູ່ສິງກະໂປ ໃນເດືອນມິຖຸນາປີຜ່ານມາ.
