ນັກທຸລະກິດ ທີ່ເປັນຕົວແບບແຫ່ງປີ 2018
ໂດຍ: ທິດກ່ຳ
ກ່ອນອື່ນ, ທິດກ່ຳ ຕ້ອງຂໍໂທດທີ່ໄດ້ນຳເອົານັກທຸລະກິດ 2 ທ່ານ ມາເປັນຕົວແບບແຫ່ງປີ 2018. ແທ້ຈິງແລ້ວ, ທິດກ່ຳ ກໍບໍ່ເຄີຍໄດ້ສຳພັດ ແລະ ເຫັນໜ້າຕາກັບພວກເພິ່ນ ຈັກເທື່ອແຕ່ເນື່ອງດ້ວຍເຮົາ ເປັນຄົນສື່ໄດ້ຕິດຕາມເຫັນ ຂ່າວຄາວການເຄື່ອນໄຫວ ຂອງນັກທຸລະກິດສອງທ່ານ ນີ້ໄດ້ມີຜົນງານ ແລະ ມີຄຸນ ງາມຄວາມດີຕໍ່ປະເທດຊາດ ແລະ ປະຊາຊົນກໍເລີຍຢາກຍົກເອົາມາເວົ້າ.
ນັກທຸລະກິດ 2 ທ່ານທີ່ວ່ານີ້ ຜູ້ທີ່ໜຶ່ງກໍແມ່ນ ທ່ານ ປີເຕີຈັນ ຫລື ວ່າຊື່ໜຶ່ງແມ່ນ ທ່ານ ສັກໄຊ ວົງມາລາ ສິດ ແລະ ຜູ້ທີສອງກໍແມ່ນ ທ່ານ ເກຍ ອູ່ສິດທິເດດ.
ເມື່ອຕັ້ງໂຈດ ກັນວ່າ ດ້ວຍ ສາເຫດໃດຈຶ່ງໄດ້ ຍົກເອົາມາ ເປັນຕົວແບບແຫ່ງປີ 2018? ສາເຫດກໍມີຢູ່ວ່າ: ສຳລັບທ່ານ ປີເຕີຈັນ ຫລື ວ່າ ທ່ານ ສັກໄຊ ວົງມາລາສິດ ນັ້ນໃນປີ 2015 ໄດ້ມີເຫດ ການນັກຮຽນຊັ້ນປະຖົມ ບ້ານ ທ່າກົກໄຮ-ນາບົງພາກັນ ຂີ່ເຮືອຂ້າມນ້ຳງື່ມໄປ ສອບເສັງຈົບຊັ້ນເລີຍເກີດ ອຸປະຕິເຫດເຮືອແພຫລົ້ມເຮັດ ໃຫ້ ເດັກນັກຮຽນ ດັ່ງກ່າວເສຍຊີວິດນັບເປັນ 10 ຄົນ.
ດັ່ງນັ້ນ ເພື່ອເປັນການ ຫລີກເວັ້ນບັນຫາທີ່ອາດຈະເກີດຂຶ້ນຊ້ຳຊ້ອນ ແລະ ເປັນ ການຊ່ວຍເຫລືອປະຊາຊົນ ໃນເຂດບ້ານດັ່ງກ່າວໄປມາ ຫາສູ່ກັນລະຫວ່າງສອງ ຝາກນ້ຳງື່ມມີຄວາມສະດວກສະບາຍ ທ່ານ ປີເຕີຈັນ ຈຶ່ງໄດ້ສະຫລະ ແຮງ ໃຈ, ແຮງກາຍ ແລະ ແຮງຊັບຊ່ວຍສ້າງຂົວດ້ວຍມູນ ຄ່າເຖິງ 105 ຕື້ກີບ.
ປັດຈຸບັນຂົວແຫ່ງດັ່ງກ່າວ ໄດ້ເປີດນຳໃຊ້ມາແຕ່ ວັນທີ 27 ພະຈິກ 2018. ຜ່ານມາ. ເປັນຂົວທີ່ໄດ້ມາດ ຕະຖານມີຄວາມຍາວ 238 ແມັດກວ້າງ 11 ແມັດລວມ ທາງຍ່າງເບື້ອງລະ 1,50 ແມັດມີແສງສະຫວ່າງຕະ ຫລອດຄວາມຍາວຂອງຂົວ.
ສ່ວນວ່າ ທ່ານ ເກຍ ອູ່ສິດທິເດດ ເປັນນັກທຸລະກິດ ຢູ່ທີ່ແຂວງສະຫວັນນະເຂດ, ເປັນເຈົ້າຂອງໂຮງງານນ້ຳດື່ມໂລມາຄຳ, ກ່ຽວກັບຜົນງານນັ້ນເພິ່ນໄດ້ສະຫລະວັດຖຸເງິນຄຳທັງສະຫລະເທື່ອແຮງ ແລະ ຈິດໃຈ ຂອງຕົນເອງເປັນຈຳນວນ ເງິນຫລາຍ 10 ຕື້ໄປປົດທຸກໃຫ້ບ້ານຄຳປ່າແໜ ແລະ ບ້ານປ່າກ້ວຍ ເມືອງຈຳ ພອນແຂວງສະຫວັນນະເຂດ ດ້ວຍການພັດທະນາ ແບບຍືນຍົງຕາມແນວທາງນະໂຍບາຍຂອງພັກ ແລະ ລັດຖະບານວາງອອກ, ປັດຈຸບັນ, ປະຊາຊົນ ສອງບ້ານ ດັ່ງກ່າວ ໄດ້ມີຊີວິດການເປັນຢູ່ດີຂຶ້ນ, ເຂົາເຈົ້າມີການຜະລິດ, ປູກຝັງລ້ຽງສັດ ແລະ ມີ ກອງ ທຶນໝູ່ບ້ານເພື່ອຊ່ວຍເຫລືອ ກັນໃນເວລາຂັດຈົນ.
ນັບແຕ່ທ່ານ ເກຍ ອູ່ສິດທິເດດ ໄດ້ໄປນຳພາເຮັດ ນຳພາສ້າງໄດ້ເຮັດໃຫ້ຊີວິດການເປັນຢູ່ຂອງເຂົາເຈົ້າມີ ການປ່ຽນແປງດີຂຶ້ນຢ່າງຂາດຂັ້ນ.
ນີ້ລະຄືເຫດຜົນທີ່ທິດ ກ່ຳຍົກເອົາມາເປັນຕົວແບບແຫ່ງປີ 2018 ນັບແຕ່ ປະເທດຊາດບ້ານເມືອງຂອງພວກເຮົາກ້າວສູ່ການສ້າງສາພັດທະນາຜູ້ມີເງິນມີຄຳກໍຫາກມີຫລາຍຈົນນັບບໍ່ຖ້ວນ, ຫລາຍທ່ານ ຫລາຍສະຫາຍໄດ້ກາຍເປັນ ນັກທຸລະກິດ ໃນລະດັບທ້ອງຖິ່ນ ແລະ ລະດັບຊາດ.
ການຊ່ວຍເຫລືອຜູ້ທຸກຍາກດ້ອຍໂອກາດ ຫລື ຊ່ວຍ ເຫລືອປະເທດຊາດບ້ານ ເມືອງດ້ວຍຄວາມສັດທາ ນັ້ນຄືການໃຫ້ທານທີ່ບໍລິສຸດ, ມີບຸນຄຸນຕໍ່ປະເທດຊາດ ແລະ ປະຊາຊົນ, ຜົນບຸນທີ່ສ້າງໄວ້ ນັ້ນຕົກນ້ຳບໍ່ໄຫລຕົກໄຟບໍ່ໄໝ້.
ທິດກ່ຳຂໍວິ້ງວອນ ແລະ ອ່ວຍໄຊໃຫ້ ທ່ານ ສັກໄຊ ວົງມາລາສິດ ແລະ ທ່ານ ເກຍ ອູ່ສິດທິເດດ ຈົ່ງມີແຕ່ຄວາມສຸກ, ສຸຂະພາບແຂງແຮງ, ອາຍຸໝັ້ນຂວັນຍືນ, ທຸລະກິດເດີນໜ້າ ແລະ ປະສົບຜົນສຳເລັດທຸກປະການ.
ຂໍໃຫ້ຜົນງານທີ່ພວກ ທ່ານໄດ້ສ້າງໄວ້ຕໍ່ປະເທດຊາດບ້ານເມືອງ ແລະ ຕໍ່ປະຊາຊົນຈົ່ງໄປຄ້ຳນ້ຳຊູໃຫ້ພວກ ທ່ານເປັນນັກທຸລະກິດຕົວແບບຂອງຊາດ ແລະ ຂອງປະຊາຊົນຕໍ່ໄປ./.
