ເດວປໍໂຕຣ ເຈັບເຂົ່າ ຖອນຕົວຈາກ ອັອສເຕຣລ້ຽນ ໂອເພັນ 2019
ຮວນ ມາຕິນ ເດວປໍໂຕຣ ນັກເທັນນິສຊາວອາເຈນຕິນາ ໄວ 30 ປີ ມື 5 ຂອງໂລກ ຂໍຖອນຕົວຈາກການແຂ່ງຂັນເທັນນິສແກຣນສະແລມທຳອິດຂອງປີ ອັອສເຕຣລ້ຽນ ໂອເພັນ 2019 ເຊິ່ງຈະມີຂຶ້ນໃນວັນທີ 14-27 ມັງກອນນີ້ ທີ່ເມວເບິນ ປະເທດອົດສະຕຣາລີ ເນື່ອງຈາກເຈັບຫົວເຂົ່າ ນັບແຕ່ເດືອນຕຸລາ 2018 ລາຍການ ຊຽງໄຮ້ ມາສເຕີ.
ເດວປໍໂຕຣ ແຊ້ມແກຣນສະແລມ ຢູເອັສ ໂອເພັນ 2009 ຜົນງານດີສຸດໃນແກຣນສະແລມ ອັອສເຕຣລ້ຽນ ໂອເພັນ ເຂົ້າເຖິງຮອບ 8 ທີມສຸດທ້າຍໃນປີ 2009, 2012.
ຂະນະທີ່ ຣາຟາເອວ ນາດາວ ອະດີດແຊ້ມ ອັອສເຕຣລ້ຽນ ໂອເພັນ ປີ 2009 ຫວັງວ່າຕົນເອງຈະພ້ອມເຕັມຮ້ອຍໃນການແຂ່ງຂັນຄັ້ງນີ້ ເພາະຍັງເຈັບກົກຂາຊ້າຍ, ຫລ້າສຸດຖອນຕົວຈາກລາຍການ ບຣິສເບນ ອິນເຕີເນເຊິນນໍລ 2019 ໃນວັນທີ 30 ທັນວາ 2018 ຫາວັນທີ 6 ມັງກອນ 2019. ຂະນະທີ່ ແອນດີ້ ເມີຣີ້ ອະດີດຮອງແຊ້ມ 5 ສະໄໝ ຢືນຢັນຈະເຂົ້າຮ່ວມແຂ່ງຂັນ.
