ອາເຊນອລ ຍື່ນ 14 ລ້ານປອນ ຫວັງດຶງ ນາບາສ
ສະປອດ ສື່ກິລາຂອງແຄວ້ນກາຕາລຸນຢ່າ ລາຍງານວ່າ: ອາເຊນອລ ຍື່ນຂໍ້ສະເໜີຂໍຊື້ ເກຍ໌ລໍ ນາບາສ ຜູ້ຮັກສາປະຕູ ຣີລ ມາດຣິດ ດ້ວຍເງິນຈຳນວນ 14 ລ້ານປອນ ຫລັງຈາກຕອນນີ້ ນາບາສ ມີແວວໝົດອະນາຄົດກັບ ຣີລ ມາດຣິດ ແລ້ວ.
ອາເຊນອລ ຍອດສະໂມສອນແຫ່ງເວທີ ພຣີເມຍລີກ ອັງກິດ ຍື່ນຂໍ້ສະເໜີເປັນເງິນຈຳນວນ 14 ລ້ານປອນ ເພື່ອຂໍຊື້ ເກຍ໌ລໍ ນາບາສ ຜູ້ຮັກສາປະຕູ ຣີລ ມາດຣິດ ໄປຮ່ວມທີມ.
ຫລາຍລະດູການກ່ອນໜ້ານີ້ ນາບາສ ໄດ້ລົງຮັກສາປະຕູໃນຖານະມື 1 ຂອງ ຣີລ ມາດຣິດ ມາໂດຍຕະຫລອດ ເຊິ່ງລາວຊ່ວຍໃຫ້ທີມໄດ້ແຊ້ມມາຄອງຫລາຍລາຍການ, ແຕ່ໃນລະດູການນີ້ ລາວພັດບໍ່ໄດ້ຮັບໂອກາດລົງສະໜາມເທົ່າທີ່ຄວນ ພາຍຫລັງ ຣີລ ມາດຣິດ ຄວ້າ ຕິໂບ ກູກຕົວ ມາຮ່ວມທີມ ໂດຍລາວຫາກໍໄດ້ເປັນຕົວຈິງໃນລີກພຽງ 2 ເກມເທົ່ານັ້ນ ຈົນເຮັດໃຫ້ມີກະແສຂ່າວວ່າ: ລາວອາດຈະຍ້າຍທີມໃນຕະຫລາດຊື້-ຂາຍນັກເຕະຮອບສອງ ເດືອນມັງກອນນີ້.
ນອກຈາກ ອາເຊນອລ ແລ້ວ, ອາແອສ ໂຣມ່າ ເປັນອີກທີມທີ່ໃຫ້ຄວາມສົນໃຈ ນາບາສ ໂດຍຕອນນີ້ ອາເຊນອລ ຕ້ອງການຜູ້ຮັກສາປະຕູຝີມືດີເພື່ອມາເປັນຄູ່ແຂ່ງຍາດຕຳແໜ່ງກັບ ແບນ ເລໂນ່ ເພາະ ປີເຕີ ເຊັກ ມີອາຍຸຫລາຍຈົນຝີມືຕົກ ແລະ ບໍ່ສາມາດເປັນຄູ່ແຂ່ງຍາດຕຳແໜ່ງກັບ ເລໂນ່ ໄດ້ອີກແລ້ວ.
